ឥណ្ឌារកមធ្យោបាយទាញផលចំណេញពីវិបត្តិសេដ្ឋកិច្ចចិន
ទុក្ខវេទនារបស់មនុស្សម្នាក់ គឺជាសុភមង្គលរបស់មនុស្សម្នាក់ទៀត។ នេះជាពាក្យ សុភាសិតបារាំង។ នៅក្នុងពេលដែលចិនកំពុងជួបវិបត្តិទីផ្សារភាគហ៊ុន និងការធ្លាក់ចុះនៃសេដ្ឋកិច្ច ឥណ្ឌាឯណោះវិញ ដែលជាមហាអំណាចសេដ្ឋកិច្ចទី ៣នៅអាស៊ី កំពុងរកមធ្យោបាយ ដើម្បីបង្វែរ ប្រែក្លាយវិបត្តិសេដ្ឋកិច្ចចិន ឲ្យមកជាប្រយោជន៍សម្រាប់សេដ្ឋកិច្ចឥណ្ឌា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤២
នាយករដ្ឋមន្រ្តី ឥណ្ឌា លោកណារិនដ្រា ម៉ូឌី នៅថ្ងៃអង្គារ បានកោះប្រជុំរដ្ឋមន្រ្តីហិរញ្ញវត្ថុ ម្ចាស់ធនាគារ ទាំងរដ្ឋ និងឯកជន ប្រធានក្រុមហ៊ុនធំៗ និងមហាសេដ្ឋីគ្រាក់ៗរបស់ឥណ្ឌា នៅក្នុងគេហដ្ឋានរបស់លោក នៅទីក្រុងញូវដេលី។ ទិសដៅ គឺពិភាក្សា រកមធ្យោបាយ កុំឲ្យឥណ្ឌា រងប៉ះពាល់ធ្ងន់ធ្ងរ ដោយសារចំហាយវិបត្តិសេដ្ឋកិច្ចចិន និងឆ្លៀតទាញផលចំណេញនៅក្នុងពេលដែលសេដ្ឋកិច្ចចិន កំពុងដើរអូសជើង។
នៅក្រោយការប្រជុំបិទទ្វារជិត ប្រធានសភាពាណិជ្ជកម្មឥណ្ឌា លោកស្រី ជោតស្នា ស៊ូរី Jyotsna Suriបាននិយាយប្រាប់ទីភ្នាក់ងារព័ត៌មានឥណ្ឌាថា លោកនាយករដ្ឋមន្រ្តីឥណ្ឌាម៉ូឌី បានអំពាវនាវឲ្យក្រុមអ្នកជំនួញ រួមទាំងកំពូលមហាសេដ្ឋីឥណ្ឌា មុកេស អំបានីផង ហ៊ានប្រថុយ និងបង្កើនបោះទុនវិនិយោគនៅ ឥណ្ឌា ជាពិសេស នៅក្នុងពេលគ្រប់គ្នាកំពុងបារម្ភពីសុខភាពមិនល្អរបស់សេដ្ឋកិច្ចចិន។ “លោកនាយករដ្ឋមន្រ្តីបាននិយាយថា នេះជាឱកាសល្អសម្រាប់ពួកយើង ដើម្បីទាញផលប្រយោជន៍ និងវិនិយោគនៅឥណ្ឌា” នេះជាសំដីរបស់លោកស្រីប្រធានសភាពាណិជ្ជកម្មឥណ្ឌា។
តាំងពីចូលកាន់តំណែង ជានាយករដ្ឋមន្រ្តី ឥណ្ឌា លោកណារិនដ្រា ម៉ូឌី អំពាវនាវ មិនឈប់ ឲ្យក្រុមហ៊ុនជាតិ និងអន្តរជាតិបោះទុនវិនិយោគ សាងសង់រោងចក្រ ដើម្បីបង្កើតការងារធ្វើ ដល់យុវជនឥណ្ឌា។ ប៉ុន្តែ ឥណ្ឌា ដែលល្បីខាងការិយាធិបតេយ្យ អំពើពុករលួយ និងហេដ្ឋារចនាសម្ព័ន្ធដ៏ទន់ខ្សោយ នៅតែមិនទាន់អាចទាក់ទាញក្រុមអ្នកវិនិយោគបរទេស។
នៅក្នុងជំនួបជាមួយនាយករដ្ឋមន្រ្តីឥណ្ឌា សហព័ន្ធ សភាពាណិជ្ជកម្ម និងឧស្សាហកម្មឥណ្ឌាវិញបានទាមទារសុំឲ្យរដ្ឋាភិបាលឥណ្ឌាចាត់វិធានការសេដ្ឋកិច្ច ដើម្បីការពារផលប្រយោជន៍ក្រុមហ៊ុនក្នុងស្រុក ដូចជា កាត់បន្ថយអត្រាការប្រាក់ បង្កើនតម្លៃពន្ធអាករ ដើម្បីកាត់បន្ថយ កុំឲ្យទំនិញចិន ហូរចូលច្រើនក្នុងទីផ្សារឥណ្ឌា។
ទីប្រឹក្សាសេដ្ឋកិច្ចរបស់រដ្ឋាភិបាល លោកអារវីន ស៊ូប្រាម៉ានីអាន វិញ បាននិយាយថា រដ្ឋាភិបាលឥណ្ឌា គ្មានបំណងកេងយកប្រយោជន៍ពីប្រទេសដទៃទេ។ យ៉ាងណាក៏ដោយ លោកទទួលស្គាល់ថា ឥណ្ឌា សព្វថ្ងៃ មិនសូវប៉ះទង្គិចខ្លាំង ដោយសារការធ្លាក់ចុះនៃសេដ្ឋកិច្ចចិន ព្រោះឥណ្ឌា មិនសូវនាំចេញ ច្រើនផលិតផល ទៅកាន់អាស៊ី។ ផ្ទុយទៅវិញ តម្លៃប្រេងធ្លាក់ចុះ នឹងជួយជំរុញ កំណើនសេដ្ឋកិច្ចឥណ្ឌា។ មូលនិធិរូបិយវត្ថុអន្តរជាតិFMI បានបង្ហាញ កាលពីថ្ងៃសៅរ៍កន្លងទៅថា ឥណ្ឌា ស្ថិតក្នុងចំណោមប្រទេសមួយចំនួន ដែលនៅតែមានកំណើនសេដ្ឋកិច្ចល្អ គឺល្អ ជាងប្រទេសដែលទើបមានសេដ្ឋកិច្ចរីកលូតលាស់ថ្មី ផ្សេងទៀត ដូចជាចិន ប្រេស៊ីល ឬរុស្ស៊ីជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ