ពលករឥណ្ឌាជាង១៥០លាននាក់ធ្វើបាតុកម្មប្រឆាំងនឹងកំណែទម្រង់សេដ្ឋកិច្ច
ដោយមានការអំពាវនាវរបស់សហជីពចំនួន១០ ពលករ កម្មករ បុគ្គលិក រាប់សិបលាននាក់ បាននាំគ្នាផ្តើមធ្វើបាតុកម្ម នៅថ្ងៃពុធនេះ សម្រាប់រយៈពេល២៤ម៉ោង ដើម្បីប្រឆាំងនឹងកំណែទម្រង់សេដ្ឋកិច្ច របស់រដ្ឋាភិបាលលោក ម៉ូឌី។ សម្រាប់ក្រុមបាតុករ កំណែទម្រង់នេះប៉ះពាល់យ៉ាងខ្លាំងដល់ទីផ្សារការងារ និងសម្រួលដល់តែក្រុមថៅកែប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:០១
ជាបុគ្គលិកក្នុងវិស័យធនាគារ វិស័យរុករករ៉ែ ជាកម្មកររោងចក្រ កម្មករសំណង់ សរុបគ្នាជាង១៥០លាននាក់ បាននាំគ្នាធ្វើបាតុកម្ម ឈប់ធ្វើការ២៤ម៉ោង។ វិស័យដឹកជញ្ជូនក៏រងប៉ះពាល់យ៉ាងខ្លាំងដែរ ពីចលនាបាតុកម្ម ដោយគ្មានរថយន្តក្រុងដឹកជញ្ជូនអ្នកដំណើរ សិស្សានុសិស្សដូចទម្លាប់។ អាកាសយានដ្ឋាន ត្រូវជាប់គាំង ដោយក្រុមអ្នកតាក់ស៊ី រឺម៉ក ភាគច្រើននាំគ្នាមិនទៅធ្វើការ។ ធនាគារត្រូវបិទទ្វារពេញមួយថ្ងៃនេះ ! សូម្បីតែបុគ្គលិកបម្រើតាមផ្ទះ បុគ្គលិកលក់ដូរតូចតាច ក៏បានចូលខ្លួនមកបំប៉ោងចលនាបាតុកម្មនៅថ្ងៃនេះ ដើម្បីទាមទារដំឡើងប្រាក់ខែអប្បបរិមា។
នៅតំបន់Bengale ភាគខាងលិចប្រទេស ដែលក្រុមសហជីពមានឥទ្ធិពលខ្លាំង ផ្លូវថ្នល់ ហាងទំនិញ ក្រុមហ៊ុន បិទទ្វារឡើងស្ងាត់ក្រុង។ នេះបើតាមរូបភាពតាមកញ្ចក់ទូរទស្សន៍ជាតិ។
ចលនាបាតុកម្មយក្សនេះ បានទទួលការគាំទ្រពីសហជីពចំនួន១០ ដែលបន្ទាប់ពីចរចាជាមួយនឹងតំណាងរដ្ឋាភិបាល រដ្ឋមន្ត្រីក្រសួងហិរញ្ញវត្ថុមិនបានសម្រេច នាំគ្នារៀបចំបាតុកម្មនេះឡើង ដើម្បីប្រឆាំងនឹងកំណែទម្រង់សេដ្ឋកិច្ច ដោយទាមទារឱ្យរដ្ឋាភិបាលបោះបង់ចោលគម្រោងលក់ភាគហ៊ុនក្នុងក្រុមហ៊ុនរដ្ឋ ដើម្បីប្រមូលលុយចូលហិប និងបិទទ្វាររោងចក្រហួសអាយុ ព្រមទាំងដំឡើងប្រាក់ខែអប្បបរិមាដល់បុគ្គលិកកម្មករ។
លោក ម៉ូឌី នាយករដ្ឋមន្ត្រីទើបបានជាប់ឆ្នោតកាលពីខែឧសភា ២០១៥ បានសន្យាធ្វើកំណែទម្រង់សេដ្ឋកិច្ច ដើម្បីទាក់ទាញវិនិយោគិនបរទេស ប៉ុន្តែបក្សប្រឆាំងបានបិទខ្ទប់កំណែទម្រង់សំខាន់ៗជាច្រើន ដូចជាលើការបង្កើតពន្ធលើតម្លៃបន្ថែម និងការទិញដីជាកម្មសិទ្ធពីសំណាក់វិនិយោគិន។
ឥណ្ឌាបានស្គាល់កំណើនសេដ្ឋកិច្ចទាបជាងការព្យាករណ៍៧% នៅត្រីមាសហើយអ្នកឯកទេសយល់ថាចាំបាច់ត្រូវមានកំណែទម្រង់ ដើម្បីរក្សាជំហរដឹកនាំនិងបង្កើតការងារដល់យុវជន។ បាតុកម្មមុនៗ ដែលមានការបិទខ្ទប់ក្រុង បានធ្វើឱ្យឥណ្ឌាខាតបង់សេដ្ឋកិច្ចរាប់លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ