ចិន៖កម្មករអណ្តូងរ៉ែធ្យូងថ្មចុះផ្លូវធ្វើបាតុកម្មទាមទារឲ្យក្រុមហ៊ុនបើកប្រាក់ខែទាន់ពេល
វិស័យរ៉ែធ្យូងថ្មក្នុងប្រទេសចិនកំពុងជួបវិបត្តិ។ នៅថ្ងៃចន្ទ ទី១៤ មីនា មានកម្មករអណ្តូងរ៉ែជាច្រើនពាន់នាក់ក្នុងស្រុក Shuangyashan ស្ថិតប៉ែកខាងជើងប្រទេសបានចុះផ្លូវធ្វើបាតុកម្មទាមទារឲ្យក្រុមហ៊ុនបើកប្រាក់ខែដែលជំពាក់ពួកគេអស់ជាច្រើនខែកន្លងមក។ កំហឹងរបស់កម្មករអណ្តូងរ៉ែចិនពេលនេះបានកើតមានឡើង ចំពេលដែលរដ្ឋាភិបាលក្រុងប៉េកាំងបានប្រកាសឲ្យដឹងពីបំណងចង់ធ្វើកំណែទម្រង់លើវិស័យមួយនេះដែលកំពុងជួបការលំបាកខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
គឺជាមហាបាតុកម្មមួយដែលគេកម្រឃើញកើតមាននៅក្នុងប្រទេសចិន។ នៅសឹងតែគ្រប់ផ្លូវទាំងអស់ក្នុងស្រុក Shuangyashan ត្រូវបានកកស្ទះដោយហ្វូងបាតុករកម្មករអណ្តូងរ៉ែធ្យូងថ្មក្រោមសម្រែក និងដៃកាន់បដាសរសេរថា « យើងត្រូវការបន្តរស់ យើងត្រូវការទទួលទានអាហារ »។ សម្រែកកំហឹងរបស់បាតុករកម្មករអណ្តូងរ៉ែបានធ្វើឡើងនៅពីមុខក្រុមហ៊ុន Longmay ដែលជាក្រុមហ៊ុនរដ្ឋមានបុគ្គលិកបម្រើការងារជាង ២០០ ០០០នាក់។ តែបច្ចុប្បន្ន ក្រុមហ៊ុនរដ្ឋមួយនេះកំពុងជួបវិបត្តិធ្ងន់ធ្ងរដោយគ្មានលទ្ធភាពបើកប្រាក់ខែឲ្យបុគ្គលិករបស់ខ្លួនទេ ពិសេសបុគ្គលិកជាកម្មករអណ្តូងរ៉ែចំនួន ៨០ ០០០នាក់ដែលក្រុមហ៊ុនជាប់ជំពាក់ប្រាក់ខែតាំងពីប៉ុន្មានខែមកហើយ។
នាប៉ុន្មានថ្ងៃចុងក្រោយ មុនការផ្ទុះបាតុកម្មពេលនេះ រដ្ឋអំណាចក្នុងស្រុកបានឆ្លើយបដិសេធរឿងក្រុមហ៊ុន Longmay ជំពាក់ប្រាក់ខែកម្មករអណ្តូងរ៉ែ។ តែដោយប្រឈមមុខនឹងចលនាបះបោររបស់កម្មករយ៉ាងភ្លូកទឹក ភ្លូកដី រដ្ឋអំណាចបែរជាបានប្រកាសទទួលស្គាល់ថា ពិតជាមានភាពយឺតយ៉ាវក្នុងការបើកប្រាក់ខែឲ្យកម្មករមែន ដោយសារតែក្រុមហ៊ុនជួបបញ្ហាផ្នែកលុយកាក់កាន់តែខ្លាំងឡើងៗនារយៈពេលប៉ុន្មានឆ្នាំចុងក្រោយនេះ។ នៅខែកញ្ញាកន្លងទៅ ក្រុមហ៊ុនរ៉ែធ្យូងថ្មរបស់រដ្ឋមួយនេះបានបណ្តេញបុគ្គលិកចំនួន ១០០ ០០០នាក់។
តម្លៃធ្យូងថ្មធ្លាក់ចុះ ការប្រើប្រាស់ថាមពលមានការធ្លាក់ចុះ និងការគ្រប់គ្រងមិនបានល្អ គឺជាដើមចមនៃវិបត្តិដែលក្រុមហ៊ុនអណ្តូងរ៉ែជាច្រើនកំពុងជួបប្រទះ។ នៅក្នុងខែកម្ភៈកន្លងទៅ ក្រសួងធនធានមនុស្សបានប្រកាសឲ្យដឹងថា មានប្រមាណជា ១លាន ៣សែនការងារជាប់ទាក់ទងនឹងវិស័យធ្យូងថ្មនឹងត្រូវបាត់បង់ និងមាន ៥០០ ០០០ការងារទាក់ទងនឹងវិស័យដែកថែប។ រដ្ឋាភិបាលក្រុងប៉េកាំងបានសន្យាធ្វើកំណែទម្រង់នៅក្នុងវិស័យរ៉ែ និងគ្រោងចំណាយលុយចំនួន ១៤ ០០០លានអឺរ៉ូសម្រាប់ជួយរកការងារថ្មីឲ្យកម្មករអណ្តូងរ៉ែដែលបាត់បង់ការងារ។
ក្រោយបាតុកម្មរបស់កម្មករអណ្តូងរ៉ែ ថ្នាក់ដឹកនាំស្រុក Shuangyashan ក៏បានរួមប្រជុំជាបន្ទាន់ភ្លាមៗ ដោយបានអំពាវនាវឲ្យមានភាពស្ងប់ស្ងាត់ និងធានាថា ក្រុមហ៊ុននឹងប្រឹងប្រែងឲ្យអស់ពីសមត្ថភាពដើម្បីបើកប្រាក់ខែឲ្យកម្មករទាន់ពេល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ