ប្រធានាធិបតីចិនសម្ពោធរោងចក្រឧស្ម័នជាច្រើននៅតួកមេនីស្ថាន
នៅថ្ងៃពុធនេះ ប្រធានាធិបតីចិនស៊ី ជិនពីង បានសម្ពោធរោងចក្រឧស្ម័នជាច្រើនកន្លែង ក្នុងប្រទេសតួកមេនីស្ថាន នៅអាស៊ីកណ្តាល ដោយមានការចូលរួមពីប្រធានាធិបតីតួកមេនីស្ថានផងដែរ។ រោងចក្រឧស្ម័នទាំងនេះ បានសាងសង់ឡើងនៅលើទីកន្លែងផ្ទុកដោយធនធានឧស្ម័នមួយ ក្នុងចំណោមទីកន្លែងសំបូរដោយថាមពលផ្សេងៗទៀត ដែលក្រុងប៉េកាំងចង់ទាញយកប្រយោជន៍មកប្រើប្រាស់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៩
ការសម្ពោធបើកដំណើរការរោងចក្រចំរាញ់ឧស្ម័ន នៅប្រទេសតួកមេនីស្ថាន នៅថ្ងៃពុធនេះ មានការចូលរួមដោយប្រធានាធិបតីចិន ស៊ី ជិនពីង និងប្រធានាធិបតីតួកមេនីស្ថាន ហ្កួរបានហ្គូលី ប៊ែរឌីមូខាមេដូវ។ រោងចក្រឧស្ម័នទាំងនេះ សាងសង់ឡើងដំណាលគ្នានឹងទីកន្លែងនៃក្រុមហ៊ុនឧស្ម័នរដ្ឋចិន ដែលហៅកាត់ថា CNPC ផងដែរ។
កន្លែងផ្ទុកធនធានឧស្ម័នដែលរោងចក្រឧស្ម័នទាំងនោះ ត្រូវដំណើរការសកម្មភាពនោះ មានឈ្មោះថា ហ្កាល់គីនិច ស្ថិតក្នុងតំបន់ម៉ារី ចំងាយ៥០០គម ភាគអាគ្នេយ៍ ពីរដ្ឋអាក់ឆាបាដ។ ហ្កាល់គីនិចផ្តុំទៅដោយកន្លែងមានឧស្ម័ន៤កន្លែងធំៗ។ គេរំពឹងថា មានឧស្ម័នចំណុះប្រមាណ ២ម៉ឺន១ពាន់២រយម៉ែត្រគូប នៅទីនោះ។
រោងចក្រឧស្ម័ននានា ដែលចិននិងតួកមេនីស្ថានបានសម្ពោធ នៅថ្ងៃពុធនេះ អាចចំរាញ់ឧស្ម័នបាន៣០ពាន់លានម៉ែត្រគូប ក្នុងមួយឆ្នាំ។ ក្នុងទំនាក់ទំនងជាមួយចិន តួកមេនីស្ថានចង់ធានាការផ្តល់ឧស្ម័នដល់ចិន អោយបានយូរអង្វែងថែមទៀត។ កន្លងមក ប្រទេសនៃអតីតសហភាពសូវៀតមួយនេះ ធ្លាប់បាននាំឧស្ម័នចេញទៅអោយចិន តាមរយៈបំពង់បង្ហូរមួយ រួចមកហើយ។
នៅថ្ងៃអង្គារដើមសប្តាហ៍នេះដែរ ប្រធានាធិបតីចិនបានចុះហត្ថលេខាលើកិច្ចព្រមព្រៀងថាមពលជាច្រើនជាមួយតួកមេនីស្ថានផងដែរ។ ចិនដែលមានតំរូវការថាមពលខ្ពស់ក្នុងស្រុកជាប្រចាំនោះ កំពុងតែចែចង់ប្រទេសនានា នៅអាស៊ីកណ្តាលដើម្បីទាញយកប្រយោជន៍ធនធានប្រេង និងឧស្ម័នមកប្រើប្រាស់។ ចិនក៏ចង់បង្ហាញពីឥទ្ធិពលខ្លួននៅអាស៊ីកណ្តាលផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ