អ.ស.ប៖ ការដាំអាភៀននៅក្នុងតំបន់អាស៊ីអាគ្នេយ៍មានការកើនឡើង
ចុះផ្សាយនៅថ្ងៃ៖
ស្តាប់ - ០៥:៣១
ការិយាល័យអង្គការសហប្រជាជាតិទទួលបន្ទុកកិច្ចការគ្រឿងញៀន និងឧក្រិដ្ឋកម្ម ទើបនឹងបានចេញផ្សាយរបាយការណ៍មួយ នៅថ្ងៃចន្ទនេះ ស្តីអំពីការដាំដំណាំអាភៀន នៅក្នុងតំបន់អាស៊ីអាគ្នេយ៍។ របាយការណ៍បានរកឃើញថា ការផលិតអាភៀន នៅក្នុងប្រទេសភូមាមានការថយចុះ ក៏ប៉ុន្តែ ការផលិតអាភៀន នៅក្នុងតំបន់ត្រីកោណមាសវិញមានការកើនឡើង។
ការថយចុះនៃការផលិតអាភៀន នៅក្នុងប្រទេសភូមា គឺជារឿងមួយមិនធ្លាប់មាន ចាប់តាំងពីឆ្នាំ២០០៦មក។ ក៏ប៉ុន្តែ បើយោងតាមរបាយការណ៍របស់អ.ស.ប ការថយចុះនេះមិនមែនមកពីកិច្ចខិតខំប្រឹងប្រែងរបស់រដ្ឋាភិបាលភូមាទេ តែមកពីការធ្លាក់ចុះនៃទិន្នផល ពីព្រោះ គេរកឃើញថា ផ្ទៃដីនៃដំណាំអាភៀននៅភូមា នៅតែបន្តកើនឡើង ប៉ុន្តែ ការប្រមូលផលមិនសូវបានច្រើនដូចឆ្នាំមុន ដោយសារតែលក្ខខណ្ឌអាកាសធាតុ និងកត្តាមួយចំនួនផ្សេងទៀត។
ម្យ៉ាងទៀត គេរកឃើញថា បើទោះបីជាការផលិតអាភៀននៅភូមាមានការថយចុះក៏ពិតមែន តែបើគិតនៅក្នុងក្របខ័ណ្ឌតំបន់ត្រីកោណមាសទាំងមូល ការផលិតអាភៀនមានការកើនឡើងខ្លាំង (ទាំងផ្ទៃដីដាំដុះ និងការប្រមូលផល) ហើយការកើនឡើងនេះ គឺចេញមកពីប្រទេសឡាវ។
មូលហេតុចម្បងជាងគេ ដែលនាំឲ្យការដាំអាភៀន នៅអាស៊ីអាគ្នេយ៍មានការកើនឡើង គឺការកើនឡើងនៃតម្រូវការទីផ្សារហេរ៉ូអ៊ីន ដែលជាគ្រឿងញៀនមួយផលិតចេញពីដំណាំអាភៀន។ របាយការណ៍របស់អ.ស.បបានរកឃើញថា នៅឆ្នាំ២០១៤នេះ ការប្រើប្រាស់ហេរ៉ូអ៊ីនមានការកើនឡើង នៅក្នុងប្រទេសចិន ឡាវ សិង្ហបុរី និងថៃ ដែលជាហេតុនាំឲ្យតម្រូវការនៃផលិតផលដំណាំអាភៀនមានការកើនឡើង។
ចំណុចដែលគួរឲ្យកត់សម្គាល់មួយទៀត គឺនៅត្រង់ថា ការកើនឡើងនៃការផលិតអាភៀន នៅអាស៊ីអាគ្នេយ៍ វាដើរស្របគ្នាទៅនឹងដំណើរការនៃសមាហរ័ណកម្មអាស៊ាន។ តាមពិត កាលពី២០ឆ្នាំមុន តំបន់ត្រីកោណមាសជាប់ឈ្មោះជាតំបន់ដែលផលិតអាភៀនច្រើនជាងគេបង្អស់ នៅលើពិភពលោក។ ក៏ប៉ុន្តែ នៅចន្លោះពីទសវត្សរ៍ឆ្នាំ៩០ ដល់ទសវត្សរ៍ឆ្នាំ២០០០ ការផលិតអាភៀននៅតំបន់ត្រីកោណមាសនេះតែងតែមានការថយចុះជាលំដាប់ រហូតធ្លាក់មកនៅចំណាត់ថ្នាក់ទី២ ក្រោយប្រទេសអាហ្វហ្កានីស្ថាន។ រហូតទាល់តែដល់ឆ្នាំ២០០៦ នៅពេលដែលដំណើរការសមាហរ័ណកម្មអាស៊ានមានការជឿនលឿនទៅមុខ ហេដ្ឋារចនាសម្ព័ន្ធដឹកជញ្ជូនរវាងប្រទេសអាស៊ានក៏ល្អជាងមុន ហើយការឆ្លងកាត់ព្រំដែនក៏មានការងាយស្រួលជាងមុន ស្រាប់តែគេឃើញថា ការផលិតអាភៀន នៅក្នុងតំបន់ត្រីកោណមាសនេះក៏ចាប់ផ្តើមកើនឡើងវិញជារៀងរាល់ឆ្នាំ។
ប្រទេសមួយចំនួន នៅក្នុងតំបន់អាស៊ាន ថ្វីដ្បិតតែមិនមែនជាប្រភពនៃការដាំអាភៀន ឬក៏មិនមែនជាគោលដៅធំនៃការប្រើប្រាស់ហេរ៉ូអ៊ីន ក៏ប៉ុន្តែ បានដើរតួនាទីជាច្រកឆ្លងកាត់នៃការជួញដូរអាភៀន។ នៅក្នុងរបាយការណ៍របស់អ.ស.ប កាលពីឆ្នាំ២០១៣កន្លងទៅ គេបានធ្វើការកត់សម្គាល់ទៅលើប្រទេសអាស៊ាន ២ គឺម៉ាឡេស៊ី ដែលជាច្រកឆ្លងកាត់នៃការជួញដូរផលិតផលដំណាំអាភៀនមិនទាន់កែច្នៃ និងប្រទេសកម្ពុជា ដែលជាច្រកឆ្លងកាត់នៃការជួញដូរអាភៀន ដែលច្នៃជាហេរ៉ូអ៊ីនរួចហើយ ដើម្បីនាំចេញទៅកាន់ប្រទេសអូស្រ្តាលី។
គួររំឭកឡើងវិញថា កាលពីខែមុន អ.ស.បក៏ធ្លាប់បានចេញផ្សាយរបាយការណ៍មួយដែរ ដែលបង្ហាញ អំពីការកើនឡើងនៃការផលិតអាភៀននៅអាហ្វហ្កានីស្ថាន។
បញ្ហាចោទធំបំផុតនៅក្នុងការលុបបំបាត់ ឬកាត់បន្ថយការដាំអាភៀន គឺអស្ថិរភាព និងអសមត្ថភាពរបស់រដ្ឋាភិបាលក្នុងការគ្រប់គ្រងទឹកដី និងការអភិវឌ្ឍតំបន់ជនបទ។
ជាទូទៅ គេសង្កេតឃើញថា ការដាំអាភៀន ទោះជានៅអាហ្វហ្កានីស្ថាន នៅភូមា ឬនៅឡាវ ភាគច្រើនធ្វើឡើង នៅតាមតំបន់ដាច់ស្រយាល ដែលរដ្ឋាភិបាលមិនសូវរវីរវល់យកចិត្តទុកដាក់អភិវឌ្ឍ ឬក៏តំបន់ខ្លះទៀត ដូចជា នៅអាហ្វហ្កានីស្ថាន រដ្ឋាភិបាលមិនអាចគ្រប់គ្រងបានតែម្តង ដោយសារតែជាតំបន់ស្ថិតក្រោមការកាន់កាប់របស់ពួកឧទ្ទាមតាលីបង់។
ម្យ៉ាងទៀត គេសង្កេតឃើញថា ប្រជាជនដែលដាំអាភៀន មិនមែនដាំ ដើម្បីលក់យកធ្វើអ្នកមាន ដូចពួកឈ្មួញដែលជួញដូរអាភៀន ឬហេរ៉ូអ៊ីននោះទេ ក៏ប៉ុន្តែ ពួកគេដាំដើម្បីត្រឹមតែរស់តែប៉ុណ្ណោះ។ របាយការណ៍របស់អ.ស.បបានបញ្ជាក់ថា កសិករដែលដាំដំណាំអាភៀននៅក្នុងតំបន់ត្រីកោណមាស ភាគច្រើនគឺជាប្រជាជនក្រីក្រ ដែលងាយនឹងប្រឈមមុខនឹងបញ្ហាខ្វះស្បៀង ហើយមិនមានមុខរបរអ្វីផ្សេង ដើម្បីចិញ្ចឹមជីវិត ក្រៅតែពីការដាំអាភៀន។
ដូច្នេះហើយបានជា ជាទូទៅ គេតែងតែលើកយកនូវដំណោះស្រាយពីរ ដើម្បីកាត់បន្ថយ ឬលុបបំបាត់ការដាំអាភៀនខុសច្បាប់ នៅអាហ្វហ្កានីស្ថាន ក៏ដូចជា នៅអាស៊ីអាគ្នេយ៍។
ដំណោះស្រាយទីមួយ គឺត្រូវអភិវឌ្ឍតំបន់ដាំអាភៀន ដើម្បីស្វែងរកមុខរបរឲ្យប្រជាជនជំនួសឲ្យការដាំអាភៀន ជាពិសេស គឺការសាងសង់ហេដ្ឋារចនាសម្ព័ន្ធតភ្ជាប់តំបន់ដាំអាភៀន ទៅកាន់ទីក្រុង និងការស្វែងរកទីផ្សារឲ្យប្រជាជនដាំដំណាំអ្វីផ្សេងក្រៅពីអាភៀន។
ដំណោះស្រាយទីពីរ គឺការដាក់ការដាំអាភៀនឲ្យទៅជាសកម្មភាពស្របច្បាប់ ដើម្បីងាយគ្រប់គ្រង ហើយបង្វែរផលិតផលអាភៀន ពីការផលិតគ្រឿងញៀនខុសច្បាប់ ទៅផ្គត់ផ្គង់ទីផ្សារស្របច្បាប់ គឺឧស្សាហកម្មផលិតថ្នាំពេទ្យ។ ក្នុងករណីនេះ ប្រជាជននៅតែអាចបន្តដាំអាភៀន ដើម្បីលក់យកប្រាក់ចំណូលមកចិញ្ចឹមជីវិត ចំណែកឯរដ្ឋក៏អាចបង្កើនប្រាក់ចំណូលពីការជួញដូរស្របច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ