ប៉ាគីស្ថានដាក់ពាក្យប្តឹងឥណ្ឌាដែលបានរំលោភបទឈប់បាញ់ នៅតំបន់កាស្មៀរ
ក្រសួងការពារជាតិប៉ាគីស្ថាន កាលពីថ្ងៃសុក្រ ទី ១៧ កក្កដា បានដាក់ពាក្យប្តឹង សុំឲ្យក្រុមអ្នកអង្កេតការណ៍របស់អង្គការសហប្រជាជាតិ ស៊ើបអង្កេតលើការផ្ទុះអាវុធនៅតំបន់កាស្មៀរ ប៉ាគីស្ថាន ដែលបើតាមទាហានប៉ាគីស្ថាន គឺកងទ័ពឥណ្ឌាដែលបានបាញ់គ្រាប់ផ្លោង សម្លាប់មនុស្ស៤នាក់ នៅសប្តាហ៍នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
ជាបងប្អូនសត្រូវដែលមិនងាយនឹងត្រលប់មកជានានឹងគ្នាវិញ។ កាលពីថ្ងៃព្រហស្បតិ៍ ក្រសួងការបរទេសប៉ាគីស្ថានបានកោះហៅ ឯកអគ្គរដ្ឋទូតឥណ្ឌាប្រចាំទីក្រុងអ៊ីស្លាម៉ាបាដឲ្យចូលជួប បន្ទាប់ពី កងទ័ពប៉ាគីស្ថានបានបាញ់ទម្លាក់យន្តហោះដ្រូនរបស់ឥណ្ឌា ក្នុងតំបន់កាស្មៀរប៉ាគីស្ថាន។ ប៉ាគីស្ថានមិនឈប់ខឹងសម្បារនឹងឥណ្ឌា ដោយ កាលពីថ្ងៃសុក្រ ម្សិលមិញ ក្រសួងការពារជាតិប៉ាគីស្ថានបានដាក់ពាក្យប្តឹង ទៅក្រុមអង្កេតការណ៍របស់អង្គការសហប្រជាជាតិ ទទួលបន្ទុកជម្លោះប៉ាគីស្ថាន និងឥណ្ឌា UNMOGIP និងសុំឲ្យគេស៊ើបអង្កេតលើករណីដែលទាហានឥណ្ឌាបាញ់ផ្លោងលើភូមិប្រជាជនស៊ីវិល ក្នុងតំបន់កាស្មៀរ ប៉ាគីស្ថាន។
UNMOGIP ជាក្រុមអង្កេតការណ៍របស់អង្គការសហប្រជាជាតិ ដែលត្រូវបានបង្កើតឡើងជាពិសេស ដើម្បីតាមដានរាល់ការរំលោភបទឈប់បាញ់ ដែលអាចបង្កឡើងដោយភាគីឥណ្ឌា ឬប៉ាគីស្ថាន។ បន្ទាប់ពីផ្ទុះសង្រ្គាមបង្ហូរឈាម នឹងគ្នា ចំនួន ៣លើកចាប់តាំងពីឆ្នាំ ១៩៤៧ ប៉ាគីស្ថាន និងឥណ្ឌាបានចុះកិច្ចព្រមព្រៀងលើបទឈប់បាញ់នៅតាមព្រំដែន តាំងពី ឆ្នាំ ២០០៣។ ប៉ុន្តែ ជាញឹកញយ ភាគីទាំងពីរ តែងចោទទម្លាក់កំហុសដាក់គ្នា ទៅវិញ ទៅមក ថា បានរំលោភបទឈប់បាញ់ នៅតំបន់ជម្លោះកាស្មៀរ។ UNMOGIPវិញ មាននាទីត្រឹមអង្កេតការណ៍ នៅក្រោយពេលមានផ្ទុះអាវុធម្តងៗ ប៉ុន្តែ មិនអាចបើកការស៊ើបអង្កេតលើបទឧក្រិដ្ឋបានទេ។
ប៉ាគីស្ថាន ប្តឹងឥណ្ឌាទៅ UNMOGIPពីបទបាញ់ និងផ្លោងគ្រាប់ទៅលើតំបន់មានជម្លោះក្នុងរដ្ឋហិមាឡ័យា ដោយបានសម្លាប់ប្រជាជនស៊ីវិល៤នាក់ និងរបួស ៥នាក់ផ្សេងទៀត។ ចំណែកឥណ្ឌាវិញ ក៏បានប្តឹងប៉ាគីស្ថានរួចហើយដែរ ទៅក្រុមអង្កេតការណ៍អង្គការសហប្រជាជាតិ ក្នុងរឿងដែលទាហានប៉ាគីស្ថានបាញ់រះសម្លាប់ប្រជាជនស៊ីវិលឥណ្ឌា នៅតាមព្រំដែន កាលពីថ្ងៃពុធ។
ពាក្យប្តឹងផ្តល់គ្នាទៅវិញ ទៅមករវាងកងទ័ពឥណ្ឌា និងប៉ាគីស្ថានបានបង្ហាញថា ភាពតានតឹងនៅព្រំដែនរវាងប្រទេសមហាអំណាចនុយក្លេអ៊ែរ ទាំងពីរ មិនបានចុះធូរស្រាលទេ។ នោះបើទោះជាមេដឹកនាំរបស់ប្រទេសទាំងពីរ បង្ហាញឆន្ទៈចង់ដោះស្រាយបញ្ចប់ជម្លោះនៅព្រំដែនក្តី។ កាលពីថ្ងៃសុក្រកន្លងទៅ នាយករដ្ឋមន្រ្តីឥណ្ឌា មកពីក្រុមជាតិនិយម បានយល់ព្រម ទទួលការអញ្ជើញរបស់នាយករដ្ឋមន្រ្តីប៉ាគីស្ថាន ដើម្បីទៅចូលរួម ក្នុងជំនួបកំពូលអាស៊ីខាងត្បូង នៅទីក្រុងអ៊ីស្លាម៉ាបាត នៅឆ្នាំ២០១៦។ នេះជាលើកទី១ ដែលនាយករដ្ឋមន្រ្តីឥណ្ឌា ដាក់ជើង ជាន់ដីប៉ាគីស្ថាន ដែលតាមពិតជាបងប្អូនសត្រូវរបស់ឥណ្ឌា។ គេមិនដឹងថា តើព្រឹត្តិការណ៍ ក្តៅគគុកនៅព្រំដែនលើកនេះ នឹងធ្វើឲ្យនាយករដ្ឋមន្រ្តីដូរចិត្ត លែងទៅប៉ាគីស្ថានដែរឬទេ។
គួររំលឹកថា ឥណ្ឌាធ្លាប់លុបចោលដំណើរទស្សនកិច្ចរបស់រដ្ឋមន្រ្តីការបរទេសទៅប៉ាគីស្ថានម្តងហើយ នៅឆ្នាំមុន បន្ទាប់ពីរដ្ឋមន្រ្តីការពារជាតិប៉ាគីស្ថានបានធ្វើដំណើរទៅជួបមេឧទ្ទាមក្រុមអ៊ីស្លាម នៅកាស្មៀរឥណ្ឌា ដែលក្រុមប្រយុទ្ធ ចង់ដណ្តើមផ្តាច់ទឹកដីពីឥណ្ឌា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ