ស្លាប់យ៉ាងតិច១៨នាក់ក្នុងហេតុការណ៍រលំអគាររោងចក្រនៅប៉ាគីស្ថាន
មនុស្សយ៉ាងតិច ១៨នាក់ ត្រូវបាត់បង់ជីវិត នៅក្នុងហេតុការណ៍រលំអគាររោងចក្រមួយ នៅប៉ាគីស្ថាន កាលពីថ្ងៃពុធម្សិលមិញ។ រហូតមកទល់នឹងថ្ងៃព្រហស្បតិ៍នេះ ប្រតិបត្តិការសង្រ្គោះកំពុងតែបន្តធ្វើ ហើយអាជ្ញាធរបានអះអាងថា គេបានជួយសង្រ្គោះមនុស្សជាង១០០នាក់ ចេញពីគំនរបាក់បែក ក៏ប៉ុន្តែ គេនៅមិនទាន់អាចដឹងឲ្យប្រាកដនៅឡើយទេថា តើនៅមានសាកសព ឬអ្នករស់រានមានជីវិតប៉ុន្មាននាក់ទៀតដែលកំពុងជាប់នៅក្នុងគំនរអគារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
អាជ្ញាធរប៉ាគីស្ថានបានឲ្យដឹង នៅព្រឹកថ្ងៃព្រហស្បតិ៍នេះថា ក្រៅពីចំនួនអ្នកស្លាប់ ១៨នាក់ អ្នករស់រានមានជីវិតចំនួន ១០២នាក់ ត្រូវបានគេជួយសង្រ្គោះចេញពីគំនរអគារ ហើយមកទល់នឹងព្រឹកព្រលឹមថ្ងៃព្រហស្បតិ៍ ជនរងគ្រោះម្នាក់ ដែលកំពុងជាប់ក្នុងគំនរអគារបានទូរស័ព្ទស្វែងរកជំនួយ។ ក៏ប៉ុន្តែ គេនៅតែមិនទាន់អាចដឹងច្បាស់នៅឡើយទេថា តើនៅមានមនុស្សប៉ុន្មាននាក់ទៀត ដែលកំពុងជាប់នៅក្នុងគំនរអគារ ហើយប៉ុន្មាននាក់ដែលនៅរស់រានមានជីវិត ដោយសារតែគេមិនមានតួលេខច្បាស់លាស់បញ្ជាក់ពីចំនួនមនុស្ស ដែលស្ថិតនៅក្នុងអគារ នៅពេលកើតហេតុ។ អាជ្ញាធរប៉ាគីស្ថានបានត្រឹមតែធ្វើការប៉ាន់ស្មានថា ចំនួនមនុស្ស នៅក្នុងអគារ នៅពេលកើតហេតុ មានប្រមាណ ពី ១៥០ ទៅ ២០០នាក់ ហើយថា ចំនួនអ្នកស្លាប់អាចនឹងកើនឡើងលើសពី ១៨នាក់។
គួរបញ្ជាក់ថា អគាររោងចក្រដែលរលំកាលពីថ្ងៃពុធនេះ គឺជារោងចក្រប្លាស្ទិក ស្ថិតនៅទីក្រុង Lahore ប៉ែកខាងជើងប្រទេសប៉ាគីស្ថាន ដែលជាតំបន់ត្រូវទទួលរងការរញ្ជួយ ពីគ្រោះរញ្ជួយដី នៅអាហ្វហ្កានីស្ថាន កាលពីថ្ងៃទី២៦តុលាកន្លងទៅ ដែលបានសម្លាប់មនុស្សជាង ៣០០នាក់ នៅទូទាំងប្រទេសអាហ្វហ្កានីស្ថាន និងប៉ាគីស្ថាន។
យោងតាមមន្រ្តីអាជ្ញាធរមូលដ្ឋាននៅក្រុង Lahore អគាររោងចក្រដែលរលំនៅពេលនេះ ប្រហែលជាត្រូវរងការខូចខាតពីគ្រោះរញ្ជួយដី កាលពីថ្ងៃទី២៦តុលាកន្លងទៅ ហើយថា ម្ចាស់រោងចក្រដឹងច្បាស់ពីការខូចខាតនេះ តែមិនត្រឹមតែផ្អាកការងារកម្មករនោះទេ ប៉ុន្តែ ថែមទាំងបានបន្តសាងសង់ពង្រីកអគារររោងចក្រ១ជាន់បន្ថែមទៀត។
គួរបញ្ជាក់ថា ប៉ាគីស្ថានស្ថិតក្នុងចំណោមប្រទេស ដែលជាប់ឈ្មោះមិនល្អ នៅក្នុងវិស័យសុវត្ថិភាពសំណង់ និងជាពិសេស សុវត្ថិភាពកម្មកររោងចក្រ។ គេនៅចាំបានថា កាលពីឆ្នាំ២០១២កន្លងទៅ អគ្គិភ័យនៅរោងចក្រកាត់ដេរមួយកន្លែង បានសម្លាប់មនុស្សរហូតដល់ទៅជិត ៣០០នាក់ ហើយនៅក្នុងថ្ងៃជាមួយគ្នានោះ អគ្គិភ័យនៅរោងចក្រស្បែកជើងមួយកន្លែងផ្សេងទៀត បានសម្លាប់មនុស្ស ២៥នាក់។ កាលពីឆ្នាំ២០១៣កន្លងទៅនេះ ករណីរលំអគាររោងចក្រក៏ធ្លាប់បានកើតមានឡើងដែរ នៅក្នុងប្រទេសបង់ក្លាដែស ដែលកាលណោះបានបណ្តាលឲ្យមនុស្សរហូតដល់ទៅ ១១២៩នាក់ត្រូវបាត់បង់ជីវិត និងជាង ២ពាន់នាក់ផ្សេងទៀតត្រូវរងរបួស។៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ