សមាគមថៅកែរោងចក្រប្តេជ្ញាគោរពសិទ្ធិនិងបទដ្ឋានការងារ ខណៈសហជីពកម្មករបន្តទាមទារបន្ថែម
ក្នុងការប្រារព្ធទិវាពលកម្មអន្តរជាតិប្រចាំឆ្នាំ ថ្ងៃទី០១ ខែឧសភា នៅថ្ងៃស្អែក សមាគមន៍រោងចក្រកាត់ដេរនៅកម្ពុជា (GMAC) បន្តប្តេជ្ញាគោរពសិទ្ធិ និងបទដ្ឋានការងារ បន្ទាប់ពីបញ្ហាបាតុកម្មកូដកម្មរបស់កម្មករត្រូវបានដោះស្រាយមួយអន្លើ។ ប៉ុន្តែ ក្នុងឱកាសនេះដែរ សហជីពកម្មករនានាក៏គ្រោងលើកសំណើជាច្រើនចំណុចបន្ថែមទៀត ដើម្បីឱ្យរដ្ឋាភិបាល និងថៅកែរោងចក្រដោះស្រាយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
សមាគមរោងចក្រកាត់ដេរនៅកម្ពុជា(GMAC)«រីករាយ»នឹងធ្វើការជាមួយរដ្ឋាភិបាល អង្គការអន្តរជាតិខាងការងារ (ILO) និងសហជីពកម្មករនានា «ដើម្បីបន្តធានាដល់ការគោរពសិទ្ធិរបស់កម្មករនិយោជិត»។ នេះបើយោងតាមសេចក្តីថ្លែងការណ៍របស់ស្ថាប័ននិយោជក កាលពីថ្ងៃអង្គារ ដើម្បីអបអរទិវាពលកម្មអន្តរជាតិ នៅថ្ងៃសុក្រ ទី០១ ខែឧសភា ឆ្នាំ២០១៥។
បើតាមលិខិតនោះ ថៅកែរោងចក្រវាយនភណ្ឌនិងកាត់ដេរស្បែកជើងនៅកម្ពុជា «មានមោទនភាព»ក្នុងការបន្ត«រក្សាឱ្យបាននូវកម្រិតខ្ពស់នៃការគោរពតាមបទដ្ឋានការងារ និងសង្គម» បន្ទាប់ពីកម្ពុជាបានក្លាយជាប្រទេស«គំរូ»សម្រាប់ផលិតករសម្លៀកបំពាក់នៅប្រទេសនានា ក្នុងការតភ្ជាប់ពាណិជ្ជកម្មទៅនឹងបទដ្ឋានការងារ។
សមាគមនិយោជកនេះអះអាង ក្នុងសេចក្តីថ្លែងការណ៍ដដែលនោះថា នៅកម្ពុជា ក្រៅពីកម្មករនិយោជិតក្នុងឧស្សាហកម្មកាត់ដេរដែលផ្តល់ប្រាក់ចំណូល១៥ភាគរយនៃផលិតផលក្នុងស្រុកសរុបនេះ ពុំមានអ្នកធ្វើការក្នុងវិស័យណាផ្សេងទៀតទេ ដែលមានប្រាក់ឈ្នួលអប្បរមា ប្រាក់ឧបត្ថម្ភធ្វើការងារទៀងទាត់ ប្រាក់សោហ៊ុយធ្វើដំណើរ និងប្រាក់ឈ្នួលផ្ទះឡើយ។
ទោះបីជាយ៉ាងនេះក្តី អង្គការតំណាងកម្មកររោងចក្រកាត់ដេរមួយចំនួនគ្រោងរៀបចំពិធីជួបជុំនៅថ្ងៃទី០១ ខែឧសភា ឆ្នាំ២០១៥ ដើម្បីទាមទាររកដំណោះស្រាយចំពោះបញ្ហាជាច្រើនទៀតពីរដ្ឋាភិបាលនិងថៅកែរោងចក្រកាត់ដេរសម្លៀកបំពាក់និងស្បែកជើង។
លោក ប៉ាវ ស៊ីណា ប្រធានសហព័ន្ធសហជីពចលនាកម្មករ ប្រាប់ថា ការជួបជុំកម្មករនិយោជិក«ចំនួន៤ពាន់នាក់» នៅលើទីលានប្រជាធិបតេយ្យនៅថ្ងៃសុក្រ គឺ«ដើម្បីសម្ដែងក្តីកង្វល់របស់កម្មករ កម្មការិនី»ទាក់ទងនឹងប្រាក់ឈ្នួល ច្បាប់សហជីព និងកិច្ចសន្យាខ្លីដែលប៉ះពាល់ដល់សិទ្ធិសេរីភាពកម្មករ។ ទន្ទឹមនឹងនេះដែរ បើតាមលោក ប៉ាវ ស៊ីណា ការទម្លាក់ចោលបទចោទប្រកាន់ចំពោះមេដឹកនាំសហជីព និងការបញ្ចូលឱ្យធ្វើការឡើងវិញនូវតំណាងសហជីពដែលនិយោជកបញ្ឈប់ដោយសារការទាមទារដំឡើងប្រាក់ឈ្នួលកន្លងមក ក៏ស្ថិតក្នុងញ្ញតិ្តទាមទាររបស់សហព័ន្ធសហជីពកម្មករទាំងឡាយដែលចូលរួមធ្វើពិធីលើទីលានប្រជាធិបតេយ្យដែរ។
ដោយឡែក លោក ជួន មុំថុល ប្រធានសហភាពសហព័ន្ធសហជីពជាតិកម្ពុជា ដែលត្រូវអបអរទិវាពលកម្មអន្តរជាតិជាមួយក្រសួងការងារ និងបណ្ដុះបណ្ដាលវិជ្ជាជីវៈ នៅថ្ងៃទី០១ ខែឧសភា ឆ្នាំ២០១៥ ក្នុងបរិវេណក្រសួងនេះ ថ្លែងថា«រំភើបរីករាយ»នឹងជំហររបស់សមាគមរោងចក្រកាត់ដែរកម្ពុជា។ ប៉ុន្តែ លោក ជួន មុំថុល ស្នើឱ្យGMAC ជម្រុញសមាជិករបស់ខ្លួននៅតាមមូលដ្ឋានឱ្យធ្វើតាមការប្តេជ្ញចិត្តគោរពសិទ្ធិនិងបទដ្ឋានការងារកម្មករឱ្យបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ