ប្រមុខរដ្ឋ និងប្រមុខរដ្ឋាភិបាលអាហ្វហ្កានីស្ថានទៅអាមេរិកដើម្បីនិយាយពីការផ្សះផ្សាជាមួយពួកតាលីបង់
នៅថ្ងៃសៅរ៍ ទី២១ មីនានេះ លោកប្រធានាធិបតី និងលោកនាយករដ្ឋមន្រ្តីអាហ្វហ្កានីស្ថានចេញទៅបំពេញទស្សនកិច្ចរួមគ្នានៅសហរដ្ឋអាមេរិក។ នៅក្នុងទីក្រុងវ៉ាស៊ីនតោន ថ្នាក់ដឹកនំាជាន់ខ្ពស់អាហ្វហ្កានីស្ថានទំាងពីររូបត្រូវលើកយកទៅនិយាយជាមួយថ្នាក់ដឹកនំាអាមេរិកពីលទ្ធភាពក្នុងការចរចាស្វែងរកសន្តិភាពជាមួយពួកតាលីបង់។ អ្វីជាការកត់សម្គាល់ ដំណើរទៅកាន់អាមេរិករបស់ថ្នាក់ដឹកនំាជាន់ខ្ពស់អាហ្វហ្កានីស្ថានបានធ្វើឡើង ចំពេលដែលមានខេត្តអាហ្វហ្កានីស្ថានមួយចំនួនកំពុងការពារខ្លួនទប់នឹងពួកតាលីបង់ ដោយគ្មានជំនួយពីកម្លំាងអូតង់។
ចុះផ្សាយនៅថ្ងៃ៖
ស្តាប់ - ០២:០៣
តំាងពីក្រោយការដកកម្លំាងអូតង់ចេញពីទឹកដីអាហ្វហ្កានីស្ថានមក រដ្ឋាភិបាលទីក្រុងកាប៊ូលបានព្យាយាមការពារខ្លួនដោយប្រើលទ្ធភាព និងសមត្ថភាពខ្លួនទីពឹងខ្លួន។ ទន្ទឹមគ្នានេះ ការប្រឹងប្រែងតាមផ្លូវទូតដើម្បីស្វែងរកកិច្ចចរចាសន្តិភាពជាមួយពួកតាលីបង់ក៏បានធ្វើជាហូរហែដែរ។ គឺដំណើរស្វែងរកការផ្សះផ្សាជាមួយពួកតាលីបង់នេះហើយដែលលោកប្រមុខរដ្ឋ និងប្រមុខរដ្ឋាភិបាលអាហ្វហ្កានីស្ថានត្រូវលើកយកទៅជជែកជាមួយថ្នាក់ដឹកនំាអាមេរិកនាដំណើរទស្សនកិច្ចផ្លូវការរយៈពេល ៥ថ្ងៃក្នុងទីក្រុងវ៉ាស៊ីតោនពេលនេះ។ គោលដៅរបស់ថ្នាក់ដឹកនំាជាន់ខ្ពស់អាហ្វហ្កានីស្ថាននៅអាមេរិក គឺចង់បានការគំាទ្រថ្មីពីរដ្ឋបាលអាមេរិកំាងនៅក្នុងដំណើរការចរចាសន្តិភាពជាមួយពួកតាលីបង់។
នៅប៉ុន្មានថ្ងៃមុននេះ លោកប្រធានាធិបតីអាហ្វហ្កានីស្ថានហ្គានីបានទៅបំពេញទស្សនកិច្ចក្នុងប្រទេសអារ៉ាប៊ីសាអូឌីត ចំណែកនាយករដ្ឋមន្រ្តីរបស់គាត់ គឺលោកអាប់ឌូឡាបានទៅទស្សនកិច្ចក្នុងប្រទេសឥណ្ឌា។ កម្មវត្ថុរបស់លោកហ្គានី និងលោកអាប់ឌូឡានៅអារ៉ាប៊ីសាអូឌីត និងឥណ្ឌា គឺព្យាយាមប្រមែប្រមូលនូវកុងសង់ស៊ុសតំបន់មួយស្តីពីការផ្សះផ្សាប្រជាជនអាហ្វហ្កានីស្ថាន។ ដោយឡែក និងក្រៅពីប្រធានបទផ្សះផ្សាជាតិ ទស្សនកិច្ចរបស់លោកហ្គានី និងអាប់ឌុលឡានៅអាមេរិកពេលនេះក៏ផ្តោតលើវិស័យសេដ្ឋកិច្ចដែរ។ មន្រ្តីជាន់ខ្ពស់អាហ្វហ្កានីស្ថានម្នាក់បានបញ្ជាក់ថា ជំនួយហិរញ្ញវត្ថុអាមេរិកឲ្យអាហ្វហ្កានីស្ថានបានគ្រោងរហូតដល់ឆ្នំា ២០១៧ តែរដ្ឋាភិបាលទីក្រុងកាប៊ូលចង់ឲ្យមានបន្តរយៈពេល ៥ឆ្នំាបន្ថែមទៀត ព្រោះវាជាដង្ហើមមិនអាចខ្វះបានសម្រាប់អនាគតសេដ្ឋកិច្ចអាហ្វហ្កានីស្ថាន។
យ៉ាងណាក៏ដោយ ទស្សនកិច្ចរបស់ថ្នាក់ដឹកនំាជាន់ខ្ពស់អាហ្វហ្កានីស្ថាននៅអាមេរិកពេលនេះត្រូវបានគេចាត់ទុកជារឿងសំខាន់ដើម្បីស្តាទំនាក់ទំនងអាមេរិក អាហ្វហ្កានីស្ថានដែលបានធ្លាក់ចុះខ្លំាងនៅក្នុងជំនាន់លោកប្រធានាធិបតីអាហ្វហ្កានីស្ថានហាមីដ ការហ្ស៉ាយ។ ដោយឡែក ក្រៅពីព្យាយាមស្តាទំនាក់ទំនងជាមួយអាមេរិកឡើងវិញ លោកហ្គានីក៏បានព្យាយាមស្តាទំនាក់ទំនងជាមួយប្រទេសប៉ាគីស្ថានជិតខាងដែលជាដៃគូមិនអាចខ្វះបានសម្រាប់ដំណើរស្វែងរកសន្តិភាពនៅអាហ្វហ្កានីស្ថាន។ ក្នុងរយៈពេលប៉ុន្មានឆ្នំាចុងក្រោយនេះ ប៉ាគីស្ថានបានជាប់ចោទពីបានជួយគំាទ្រ និងផ្តល់ជម្រកឲ្យពួកតាលីបង់អាហ្វហ្កានីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ