អាមេរិកគ្រោងដកទ័ពចេញពីអាហ្វហ្កានីស្ថាន តែដកដោយសន្សឹមៗ
ថ្លែងក្នុងសន្និសិទកាសែតនៅក្រុង កាប៊ូល រដ្ឋធានីប្រទេសអាហ្វហ្កានីស្ថាន លោករដ្ឋមន្រី្តក្រសួងការពារជាតិអាមេរិក បានថ្លែងថា អាមេរិកកំពុងពិនិត្យឡើងវិញ អំពីរបៀបដកទ័ពចេញពីអាហ្វហ្គានីស្ថាន។ ការដកទ័ពដែល ដើមឡើយកំណត់ថាត្រូវបញ្ចប់ឲ្យអស់ នៅចុងឆ្នាំ២០១៦ អាចនឹងបន្តធ្វើដោយសន្សឺមៗ និងចំណាយពេលយូរជាងនេះទៀត ដើម្បីកុំឲ្យប្រទេសអាហ្វហ្គានីស្ថាន ធ្លាក់ទៅក្នុងភាពចលាចល ព្រោះថា កងទ័ពរដ្ឋាភិបាលប្រទេសនេះ នៅមិនទាន់រឹងដៃរឹងជើងនៅឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
នេះជាលើកទីមួយហើយ ដែលថ្នាក់ដឹកនាំកងទ័ពរបស់អាមេរិក បាននិយាយច្បាស់លាស់ អំពីរបៀបវារៈ នៃការដកកម្លាំងទ័ព ចេញពីប្រទេសអាហ្វហ្កានីស្ថាន ព្រោះថាកន្លងមក អ្វីៗហាក់នៅស្ទាក់ស្ទើរ ម្តងថាដកប៉ុណ្ណេះ ម្តងថាទុកប៉ុណ្ណោះ។
លោករដ្ឋមន្រ្តី ក្រសួងការពារជាតិអាមេរិក Aston Carter បានថ្លែងក្នុងសន្និសិទកាសែតមួយ នៅក្រុងកាប៊ូល កាលពីថ្ងៃ សៅរ៍ ទី ២១ កុម្ភៈថា រដ្ឋាភិបាលអាមេរិក កំពុងពិនិត្យមើលឡើងវិញ អំពីរបៀបដកទ័ព ចេញពីអាហ្វហ្កានីស្ថាន លៃយ៉ាងណា កុំឲ្យដកលឿនរហ័សពេក គឺត្រូវធ្វើដោយសន្សឹមៗ ព្រោះថាស្ថានភាពនៅអាហ្វហ្កានីស្ថាន នៅមិនទាន់ប្រសើរនៅឡើយ ហើយបើដកលឿនពេក វាអាចធ្វើឲ្យពួកតាលីបង់ យកប្រៀបលើកងទ័ពរដ្ឋាភិបាល។
សូមរំលឹកថា តាមការគ្រោងទុកពីដំបូង កងទ័ពអាមេរិកចំនួន ១ម៉ឺននាក់ ដែលឈរជើងនៅអាហ្វហ្កានីស្ថានបច្ចុប្បន្ននេះ នឹងត្រូវដកចេញ ៥ពាន់នាក់ នៅចុងឆ្នាំ ២០១៥ ហើយ ៥ពាន់នាក់ទៀតនឹងដកចេញឲ្យអស់ នៅចុងឆ្នាំ ២០១៦ ចំពេលដែលលោក បារ៉ាក់ អូបាម៉ា ត្រូវបញ្ចប់អាណត្តិប្រធានាធិបតីដែរ។
ប៉ុន្តែរដ្ឋាភិបាល អាហ្វហ្កានីស្ថានរបស់លោក Ashraf Ghani ក៏ដូចជា សមាជិកសភាអាមេរិក មួយចំនួន បានធ្វើការស្នើសុំថា កុំអាលដកលឿនពេក ព្រោះវាអាចបង្កគ្រោះថ្នាក់ ដល់សន្តិសុខជាតិអាហ្វហ្កានីស្ថានទាំងមូល ជាពិសេសដល់សន្តិសុខ របស់ក្រុមអ្នកស្ម័គ្រចិត្តអន្តរជាតិ ដែលកំពុងធ្វើការនៅអាហ្វហ្កានីស្ថាន។ ទាហានអាហ្វហ្កានីស្ថាន ដែលមិនសូវជាមានសមត្ថភាព និងលទ្ធភាពគ្រប់គ្រាន់នៅឡើយ អាចជួបនឹងបរាជ័យ បើសិនជាពួកតាលីបង់ ធ្វើការវាយលុកសារជាថ្មី។
រដ្ឋាភិបាលអាមេរិក ធ្លាប់បានផ្លាស់ប្តូរ តូលេខម្តងរួចមកហើយ ដោយបន្ថយ ដកតែ ៤ពាន់នាក់ទេ នៅចុងឆ្នាំនេះ ហើយសល់ប៉ុន្មាន ចាំដកសរុប នៅឆ្នាំ២០១៦។ ប៉ុន្តែទោះបីជាយ៉ាងណា សម្តីរបស់លោករដ្ឋមន្រ្តីការពារជាតិអាមេរិក នាពេលនេះ បានបញ្ជាក់ថា កាលបរិច្ឆេទដកទ័ពឲ្យអស់ពីអាហ្វហ្កានីស្ថាន អាចនឹងបន្ត នៅយូរជាងនេះទៀត ហើយចំនួនទាហានដែលត្រូវដកចេញ ក៏ត្រូវបន្ថយទៅតាមនោះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ