ប្រជាជនជប៉ុនរាប់ម៉ឺននាក់ធ្វើបាតុកម្មប្រឆាំងនយោបាយការពារជាតិរបស់លោកស្ហ៊ីនហ្សូ អាបេ
ប្រជាជនជប៉ុនរាប់ម៉ឺននាក់បាននាំគ្នាធ្វើបាតុកម្ម នៅមុខវិមានរដ្ឋសភាជប៉ុន នៅថ្ងៃអាទិត្យនេះ ដើម្បីធ្វើការតវ៉ាប្រឆាំងនឹងនយោបាយការពារជាតិរបស់លោកស្ហ៊ីនហ្សូ អាបេ ជាពិសេស ជំទាស់នឹងគម្រោងធ្វើវិសោធនកម្មរដ្ឋធម្មនុញ្ញសន្តិភាពនិយម បង្កើនតួនាទីកងទ័ពជប៉ុននៅបរទេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
បើយោងតាមអ្នករៀបចំបាតុកម្ម បាតុករមានចំនួនប្រមាណជា ២ម៉ឺន ៥ពាន់នាក់ បានប្រមូលផ្តុំគ្នានៅតាមដងផ្លូវជុំវិញវិមានសភាជប៉ុន ក្នុងរដ្ឋធានីតូក្យូ ដោយនាំគ្នាលើកបដាដែលមានសរសេរពាក្យស្លោកប្រឆាំងនឹងសង្រ្គាម ឬសរសេរលេខ “៩” តំណាងមាត្រា ៩ នៃរដ្ឋធម្មនុញ្ញជប៉ុន ដែលហាមឃាត់ជប៉ុនមិនឲ្យធ្វើសង្រ្គាម។
គួរបញ្ជាក់ថា កាលពីខែមុននេះ រដ្ឋាភិបាលរបស់លោកស្ហ៊ីនហ្សូ អាបេ បានរៀបចំធ្វើសេចក្តីព្រាងច្បាប់មួយ ក្នុងគោលដៅពង្រីកតួនាទីកងទ័ពជប៉ុន ជាពិសេស អនុញ្ញាតឲ្យកងទ័ពជប៉ុនចូលច្បាំងជួយប្រទេសសម្ព័ន្ធមិត្ត បើទោះបីជាជប៉ុនមិនមែនជាអ្នកដែលត្រូវទទួលរងនូវការឈ្លានពានក៏ដោយ។
ក៏ប៉ុន្តែ កាលពីថ្ងៃទី៤មិថុនាកន្លងទៅនេះ អ្នកច្បាប់ជំនាញខាងនីតិរដ្ឋធម្មនុញ្ញដ៏ល្បីល្បាញ ៣រូប ដែលក្នុងនោះមានមួយរូបចាត់តាំងឡើងដោយគណបក្សអភិរក្សនិយមរបស់លោកស្ហ៊ីនហ្សូ អាបេ ខ្លួនឯងផ្ទាល់ បានធ្វើការវាយតម្លៃថា សេចក្តីព្រាងច្បាប់ពង្រីកតួនាទីកងទ័ពជប៉ុននេះផ្ទុយនឹងរដ្ឋធម្មនុញ្ញ ដែលជាច្បាប់កំពូលរបស់ជប៉ុន។ បើទោះបីជាយ៉ាងនេះក៏ដោយ លោកស្ហ៊ីនហ្សូ អាបេ នៅតែបន្តទទូចបញ្ជូនសេចក្តីព្រាងច្បាប់នេះទៅឲ្យសភាអនុម័ត ឲ្យបានមុនសភាចូលវិស្សមកាល នៅថ្ងៃទី២៤មិថុនាខាងមុខ។
ការផ្តួចផ្តើមគំនិតរបស់លោកស្ហ៊ីនហ្សូ អាបេ ក្នុងការបង្កើនតួនាទីកងទ័ពជប៉ុននេះ ត្រូវបានទទួលនូវការស្វាគមន៍យ៉ាងកក់ក្តៅ ពីសំណាក់សហរដ្ឋអាមេរិក ដែលជាសម្ព័ន្ធមិត្ត ក៏ប៉ុន្តែ នៅជប៉ុនវិញ ក្រុមអ្នកសន្តិភាពនិយមបាននាំគ្នាប្រឆាំងនឹងសេចក្តីព្រាងច្បាប់នេះ ដោយលើកឡើងថា វាមិនត្រឹមតែផ្ទុយនឹងរដ្ឋធម្មនុញ្ញប៉ុណ្ណោះទេ ក៏ប៉ុន្តែ វាអាចនឹងរុញជប៉ុនឲ្យធ្លាក់ទៅក្នុងសង្រ្គាមជាមួយអាមេរិក ជាពិសេស នៅក្នុងតំបន់មជ្ឈិមបូព៌ា។
នយោបាយការពារជាតិរបស់លោកស្ហ៊ីនហ្សូ អាបេ ក៏កំពុងទទួលរងនូវការរិះគន់យ៉ាងខ្លាំងក្លាផងដែរ ពីសំណាក់ប្រទេសចិន ដែលតែងតែបានលើកឡើងថា ខ្លួនបារម្ភខ្លាចជប៉ុនវិលត្រឡប់ទៅរកនយោបាយយោធានិយមដូចកាលពីមុនទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ