គ្រោះរញ្ជួយដីកម្រិត ៧,៥រ៉ិចទ័រនៅអាហ្វហ្កានីស្ថានសម្លាប់មនុស្សយ៉ាងតិច១៨០នាក់
មនុស្សយ៉ាងតិច ១៨០នាក់ បានស្លាប់ ជាង ១០០០នាក់ផ្សេងទៀតត្រូវរងរបួស នៅក្នុងគ្រោះរញ្ជួយដីកម្រិត ៧,៥រ៉ិចទ័រ នៅក្នុងតំបន់ដាច់ស្រយាលមួយ ក្នុងប្រទេសអាហ្វហ្កានីស្ថាន នៅថ្ងៃចន្ទនេះ។ ការស្លាប់នេះបានកើតមានឡើង ទាំងនៅក្នុងប្រទេសអាហ្វហ្កានីស្ថាន និងទាំងនៅក្នុងប្រទេសប៉ាគីស្ថាន ដែលនៅជិតខាង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
យោងតាមទីភ្នាក់ងារភូគព្ភសាស្រ្តអាមេរិក (US Geological Survey) គ្រោះរញ្ជួយដ៏ខ្លាំងនេះបានកើតឡើង នៅក្នុងតំបន់ភ្នំដាច់ស្រយាល ប៉ែកខាងជើងប្រទេសអាហ្វហ្កានីស្ថាន ក្បែរព្រំដែនជាមួយនឹងប្រទេសប៉ាគីស្ថាន ហើយចំណុចរញ្ជួយស្ថិតនៅប្រមាណជាង២០០គីឡូម៉ែត្រក្រោមដី។ កម្លាំងរញ្ជួយបានធ្វើឲ្យកក្រើករហូតទៅដល់ប្រទេសប៉ាគីស្ថាន និងទីក្រុងញូវដេលីរបស់ឥណ្ឌា។
នៅអាហ្វហ្កានីស្ថាន កូនសិស្សស្រីៗ ចំនួន១២នាក់ អាយុក្នុងចន្លោះពី ១០ឆ្នាំ ទៅ ១៥ឆ្នាំ ត្រូវស្លាប់ នៅក្នុងហេតុការណ៍ភ័យរត់ជាន់គ្នានៅក្នុងអំឡុងពេលរញ្ជួយដី។ ក្រៅពីនៅអាហ្វហ្កានីស្ថាន ចំនួនអ្នកស្លាប់ដោយរញ្ជួយដីនេះក៏មានយ៉ាងច្រើនដែរ នៅក្នុងទឹកដីប៉ាគីស្ថាន។
នៅល្ងាចថ្ងៃចន្ទ នាយករដ្ឋមន្រ្តីអាហ្វហ្កានីស្ថានបានលើកឡើងថា គ្រោះរញ្ជួយដីនេះបានបង្កឲ្យមានការខូចខាតច្រើនណាស់ ទាំងខាងសម្ភារៈ និងអាយុជីវិតមនុស្ស ក៏ប៉ុន្តែ តុល្យការពិតប្រាកដ គេនៅមិនទានអាចដឹងបាននៅឡើយទេ ដោយសារតែប្រព័ន្ធទំនាក់ទំនងនៅជុំវិញតំបន់រញ្ជួយដីត្រូវកាត់ផ្តាច់។ សូម្បីតែនៅក្នុងរដ្ឋធានីកាប៊ុល ដែលស្ថិតនៅរហូតដល់ទៅជាង២រយគីឡូម៉ែត្រពីចំណុចរញ្ជួយក៏ត្រូវដាច់ចរន្តអគ្គិសនី ដោយសារកម្លាំងរញ្ជួយនេះដែរ។
គួររំឭកឡើងវិញថា កាលពីឆ្នាំ២០០៥ គ្រោះរញ្ជួយដីកម្រិត ៧,៦រ៉ិចទ័រធ្លាប់បានកើតមានឡើងម្តងរួចមកហើយ នៅក្នុងតំបន់កាស្មៀរ ប៉ាគីស្ថាន ពោលគឺ នៅមិនឆ្ងាយប៉ុន្មានពីកន្លែងរញ្ជួយដីនៅថ្ងៃចន្ទនេះ។ គ្រោះរញ្ជួយដីកាលពីឆ្នាំ២០០៥នោះ បានសម្លាប់មនុស្សរហូតដល់ទៅ ៧ម៉ឺន៥ពាន់នាក់ ហើយបានបំផ្លិចបំផ្លាញផ្ទះសម្បែងប្រជាជនរហូតដល់ទៅជាង ៣លាននាក់។
លោកណារិនដ្រា ម៉ូឌី នាយករដ្ឋមន្រ្តីឥណ្ឌា ដែលជាប្រទេសគូសត្រូវរបស់ប៉ាគីស្ថាន បានសរសេរនៅលើ Twitter របស់លោកថា ឥណ្ឌាត្រៀមខ្លួនជានិច្ច ដើម្បីផ្តល់ជំនួយទៅដល់ទីកន្លែងណាដែលត្រូវការ ដោយរាប់ទាំងនៅអាហ្វហ្កានីស្ថាន និងនៅប៉ាគីស្ថានផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ