រញ្ជួយដីនៅនេប៉ាល់ ចំនួនមនុស្សស្លាប់កើនកាន់តែច្រើន ប្រជាជននេប៉ាល់ដង្ហើយរកជំនួយ
គ្រោះរញ្ជួយដី ដែលបានកើតឡើងក្នុងប្រទេសនេប៉ាល់ កាលពីថ្ងៃសៅរ៍ ទី ២៥មេសា ម្សិលមិញ នៅមិនទាន់អស់ឥទ្ធិពលទេ។ ចំនួនមនុស្សស្លាប់មានបន្ថែមកាន់តែច្រើន ពីមួយម៉ោងទៅ មួយម៉ោង។ បើគិតមកត្រឹមពេលនេះ តាមតួលេខបណ្តោះអាសន្ន មានមនុស្សស្លាប់ ជាង២២០០ នាក់ហើយ ហើយអ្នករបួសមានចំនួនជាង៦ពាន់នាក់។ ក្រុមសង្រ្គោះកំពុងជួបការលំបាក ដោយសារតែគ្មានសំភារៈគ្រប់គ្រាន់ ហើយភូមិស្រុកដាច់ស្រយាល មួយចំនួន មិនទាន់មាននរណាទៅដល់នៅឡើយ។ ប្រជាជននេប៉ាល់ កំពុងតែត្រូវការជំនួយសង្រ្គោះ ជាបន្ទាន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៤៩
បើតាមការរាយការណ៍ របស់អ្នកយកព័ត៌មានបារាំង ប្រចាំការនៅ នេប៉ាល់ បានឲ្យដឹងថា ស្ថានភាព ទូទៅ គឺនៅតែមានភាពចលាចលអញ្ចឹង ដោយសារតែមនុស្សម្នា នៅមិនទាន់បាត់តក់ស្លុតនៅឡើយ ជាពិសេសនៅក្នុងទីក្រុង កាតម៉ាន់ឌូ តែម្តង ដែលមានមនុស្សរស់នៅច្រើនកុះករ ហើយចំនួនអ្នកស្លាប់ ក៏មានច្រើនណាស់ដែរ ក្នុងទីក្រុងនេះ។
ប្រជាជនភ័យក្រែងមានការរញ្ជួយថ្មី បន្ថែមទៀត៖
គួររំលឹកផងដែរថា ចំណុចប្រេះធំ នៃគ្រោះរញ្ជួយដីនេះ គឺ មាននៅភាគខាងជើង ក្រុងកាតម៉ាន់ឌូ ចំងាយប្រហែលជា ៨០ គីឡូម៉ែត្រ។ តាមធម្មតា ចំណុចប្រេះធំនេះ វាបណ្តាលឲ្យស្រទាប់ដី ដាច់ចេញពីគ្នា ហើយរំកិលទៅបុកទង្គិច ជាមួយស្រទាប់ដីផ្សេងទៀត ដែលនេះហើយ ដែលធ្វើឲ្យមានការរញ្ជួយដី។ ការរញ្ជួយនេះ មិនមែនមានតែម្តងចប់ទេ គឺវាបានបណ្តាលឲ្យមានស្នាមប្រេះ ដេញតគ្នា នៅតាមតំបន់ផ្សេងៗទៀត។
ហេតុនេះហើយ បានជាប្រជាជននៅតែភ័យព្រោះថា ម្សិលមិញនេះ ស្រទាប់ដី នៅនេប៉ាល់ បានបន្តរញ្ជួយរហូត ច្រើនដងណាស់ ហើយនៅព្រឹកថ្ងៃអាទិត្យ ទី ២៦ មេសានេះ មានការរញ្ជួយមួយទៀត ដែលមានកំរិត ៦,៥ រីឆទ័រ។ ការរញ្ជួយទាំងនេះ វាជាលទ្ធផល នៃការប្រេះស្រទាប់ដី កាលពីថ្ងៃសៅរ៍ ទី២៥មេសា។ អ្នករាយការណ៍ព័ត៌មានថា កាលពីយប់មិញ ប្រជាជនបាននាំគ្នាដេកនៅតាមថ្នល់ និងតាមទីវាល ដោយសារខ្លាចមានការរញ្ជួយថ្មីបន្ថែមទៀត។
ក្រុមសង្គ្រោះ មានតិច ហើយជួបការលំបាកច្រើន៖
មកទល់ពេលនេះ ក្រុមសង្គ្រោះជួបការលំបាក ដោយសារ ទីមួយមកពីស្ថានភាពភូមិសាស្រ្តរបស់ប្រទេសនេប៉ាល់។ នេប៉ាល់ ជាប្រទេសតូច ស្ថិតនៅលើជួរភ្នំហិមាល័យ។ ស្ថានភាពដី ដែលសម្បូរភ្នំ វាមិនអំណោយផល ដល់ការធ្វើដំណើរទេ ហើយជាពិសេស ប្រព័ន្ធគមនាគមន៍ និងទូរគមនាគមន៍ ត្រូវបានបំផ្លាញមួយផ្នែកធំទៅហើយ។ ចំណុចលំបាកទី ពីរ គឺនេប៉ាល់ ជាប្រទេសក្រីក្រណាស់។ រដ្ឋគ្មានលទ្ធភាព គ្រប់គ្រាន់ ដើម្បីជួយសង្រ្គោះប្រជាជនឲ្យទាន់ពេលវេលានោះទេ។ ភូមិស្រុកដាច់ស្រយាល ដែលមានអ្នកស្លាប់ និងរបួស មិនទាន់មាននរណាទៅដល់ទេ។
ប្រជាជនដែលបានបាត់បង់ផ្ទះសំបែក រហូតមកដល់ពេលនេះ ដេកតាមផ្លូវ និងក្រោមដើមឈើ រកេតរកូត ព្រោះមិនមានដំបូលតង់ត៍ គ្រប់គ្រាន់។ មួយវិញទៀត ការជួយសង្រ្គោះមនុស្សដែលជាប់ ក្នុងគំនរបាក់បែក គឺបានធ្វើឡើង យ៉ាងយឺតយ៉ាវបំផុត ព្រោះគ្មានក្រុមសង្គ្រោះត្រឹមត្រូវទេ គឺមានតែអ្នកស្រុកអ្នកភូមិ ដែសខំជួយគ្នា ម្នាក់មួយដៃ មួយជើង ហើយអត់មានសំភារៈអីទេ គឺមានតែដៃទទេរប៉ុណ្ណោះ។ ភាពយឺតយ៉ាវ ក្នុងការជួយកកាយយកជនរងគ្រោះចេញនេះ ហើយ ដែលធ្វើឲ្យជនរងគ្រោះ អាចប្រឈមមុខនឹងការស្លាប់ កាន់តែច្រើន។
ជំនួយអន្តរជាតិ ទៅដល់ជាបន្តបន្ទាប់៖
បារាំង និងឥណ្ឌា ជាប្រទេសមុនគេ ដែលបានប្រកាសថា ត្រៀមខ្លួន ផ្តល់ជំនួយទៅជួយប្រជាជននេប៉ាល់។ អ្នកនាំពាក្យរដ្ឋាភិបាលបារាំង បានបញ្ជាក់ប្រាប់ នៅថ្ងៃអាទិត្យ ទី ២៦ មេសា ថា ក្រុមសង្រ្គោះបន្ទាន់ និងបរិក្ខាពេទ្យ របស់បារាំង និងទៅដល់នេប៉ាល់ ក្នុងពេលឆាប់ៗនេះ។ ដូចគ្នាដែរ ឥណ្ឌា ក៏បាន បញ្ជូនទាហាន ដើម្បីដឹកជញ្ជូនជំនួយ ជាថ្នាំ និងបរិក្ខាពេទ្យ ដើម្បីទៅជួយអ្នករបួស។ សហរដ្ឋអាមេរិក តាមរយៈក្រុមការងារ របស់អង្គការ USAid ថានឹងផ្តល់ប្រាក់ចំនួន ១លានដុល្លា ដើម្បីឆ្លើយតបទៅតាមតម្រូវការបន្ទាន់ របស់ក្រុមសង្គ្រោះរបស់អង្គការនេះ។ អូស្រ្តាលី ក៏បានសន្យាថាផ្តល់ប្រាក់ ចំនួន ៥លានដុល្លារ ផងដែរ។
ក្រៅពីប្រទេសទាំងនេះ អង្គការក្រៅរដ្ឋាភិបាលជាច្រើន មានដូចជា កាកបាទក្រហម អង្គការគ្រូពេទ្យ គ្មានព្រំដែន និងអង្គការ អុក្សហ្វាម Oxfam ជាដើម បានបញ្ជូនក្រុមសង្រ្គោះ ទៅតាមទីកន្លែងសង្រ្គោះ ជាបណ្តើរៗ ហើយដែរ។ អ្នករបួសមានច្រើនណាស់ ប្រហែលជាជិត ៦ពាន់នាក់ឯណោះ។ នៅតាមមន្ទីរពេទ្យវិញ រកកន្លែងដើរគ្មានផង ហើយក្រុមគ្រូពេទ្យ មិនដឹងជួយអ្នកណាទុកអ្នកណាទេ ព្រោះអ្នករបួសច្រើន ប៉ុន្តែគ្មានថ្នាំ និងបរិក្ខាគ្រប់គ្រាន់។
នេប៉ាល់ ស្ថិតលើតំបន់រញ្ជួយដី ប៉ុន្តែខ្វះលទ្ធភាពការពារខ្លួន៖
បើយើងរាប់ពីឆ្នាំ ១៩៣៤ មក នេប៉ាល់ ជួបគ្រោះរញ្ជួយដី ៦ដងហើយ ទាំងលើកនេះ។ លើកដែលធ្ងន់ជាងគេ នោះគឺនៅឆ្នាំ ១៩៣៤តែម្តង ដែលមានមនុស្សស្លាប់ សរុបប្រមាណជា ២ម៉ឺននាក់។ នេប៉ាល់ ស្ថិតនៅលើជួរភ្នំហិមាល័យ ដែលជួរភ្នំ នេះ វាជាគន្លង បុកទង្គិចគ្នា រវាងស្រទាប់ផែនដី ពីរ ដែលភាសាបច្ចេកទេស គេហៅថា Plaques Techtoniques ។ សំបកផែនដីយើង គឺផ្គុំឡើងដោយ Plaques Techtoniques នេះច្រើនណាស់ ហើយដោយសារតែចលនាម៉ាក់ម៉ា ដែលនៅខាងក្នុងស្នូលផែនដី ទើបវារុញ Plaques Techtoniques ទាំងអស់នេះ ឲ្យរំកិលចុះឡើង ហើយបុកទង្គិចគ្នា ទៅវិញទៅមក។ ជាទូទៅ ប្រទេសដែលស្ថិតនៅតាមចំណុចប្រសប់នៃ Plaques Techtoniques នេះ គឺឧស្សាហ៍ជួបគ្រោះរញ្ជួយដីណាស់។
ជាក់ស្តែងគឺប្រទេសជប៉ុនតែម្តង ដែលជួបគ្រោះរញ្ជួយដី សឹងតែរាល់ថ្ងៃ គ្រាន់តែថា ភាគច្រើន ក្នុងកម្រិតខ្សោយ។ ប៉ុន្តែហេតុអ្វី បានជាជប៉ុន មិនសូវជាជួបគ្រោះថា្នក់ មានមនុស្សស្លាប់ច្រើន គឺដោយសារតែប្រទេសគេជឿនលឿន បើប្រៀបធៀបជាមួយនេប៉ាល់ ដែលស្ថិតក្នុងចំណោមប្រទេសដប់ ដែលក្រីក្របំផុត។
នៅនេប៉ាល់ សំណង់អាគារ ត្រូវបានសាងសង់ឡើង ដោយគ្មានគោរពបទដ្ឋានវិស្វកម្ម និងសុវត្ថិភាពត្រឹមត្រូវទេ។ ជាពិសេស នោះគឺសំណង់ថ្មីៗ ដែលធ្វើពីឥដ្ឋ និងស៊ីម៉ងត៍តែម្តង។ ក្នុងចំណោមប្រជាជន ទាំង ៣០លាននាក់ នេប៉ាល់មានអ្នកក្រច្រើនណាស់ ហើយផ្ទះសម្បែងពួកគាត់ ធ្វើពីឈើ រឺស៊ីម៉ងត៍ ឲ្យតែបានៗប៉ុណ្ណោះ។ ដូច្នេះអ្នករងគ្រោះខ្លាំង មានស្លាប់ច្រើន គឺសុទ្ធតែអ្នកក្រ ឯអ្នកមាន ផ្ទះគេមានគ្រិះរឹងមាំ មិនសូវជាជួបគ្រោះថ្នាក់ទេ។
ចំណុចមួយទៀតនោះ គឺ នេប៉ាល់ មិនមានស្ថាប័នជំនាញ ដើម្បីធ្វើការស្ទាបស្ទង់ដឹងមុន អំពីគ្រោះថ្នាក់រញ្ជួយដីទេ។ នៅជប៉ុន រឺក៏ប្រទេសជឿនលឿនផ្សេងទៀត ក្រៅពីសំណង់គេរឹងមាំ មានប្រពន្ធ័ការពារមិនឲ្យរលំងាយៗហើយ គេថែមទាំងមានអ្នកជំនាញ ដើម្បីប្រកាសឲ្យប្រជាជនគេ ដឹងមុនទៀត នៅពេលណាជិតមានគ្រោះរញ្ជួយដី។ ប្រជាជននេប៉ាល់ គ្មានសំណាងនេះទេ។
ទោះជាយ៉ាងណា លើកនេះ យើងអាចចាត់ទុកថាសំណាង នេប៉ាល់ក៏បាន ព្រោះថារញ្ជួយដី បានកើតឡើង នៅថ្ងៃសៅរ៍ ដែលជាថ្ងៃឈប់សំរាក មនុស្សអត់ធ្វើការ ក្មេងៗអត់ទៅសាលារៀន។ ហើយសំណាង ចំពេលថ្ងៃត្រង់ទៀត ដែលមានមនុស្សម្នា ចេញដើរទៅខាងក្រៅច្រើន។ បើសិនជា កើតឡើងពេលយប់ មនុស្សកំពុងតែដេកវិញ ចំនួនអ្នកស្លាប់ ប្រកដជាលើសនេះ ទ្វេរមួយជាពីរមិនខានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ