អាស៊ានសម្តែងក្តីបារម្ភរួមគ្នាចំពោះមហិច្ឆតារបស់ចិននៅសមុទ្រចិនខាងត្បូង
នៅក្នុងសេចក្តីថ្លែងការណ៍ចុងក្រោយនៃកិច្ចប្រជុំអាស៊ានស្តីពីសន្តិសុខក្នុងទីក្រុងគូឡំាឡា ប្រទេសម៉ាឡេស៊ីនាថ្ងៃព្រហស្បតិ៍ ទី៨ សីហា ប្រមុខការទូតទំាង ១០ប្រទេសរបស់អាស៊ានបានសម្តែងក្តីបារម្ភជាពន់ពេកចំពោះមហិច្ឆតារបស់ចិននៅក្នុងសមុទ្រចិនខាងត្បូង។ សមុទ្រចិនខាងត្បូងដែលរដ្ឋអំណាចក្រុងប៉េកំាងបានសាងសង់កោះសិប្បនិមិត្តជាច្រើននៅក្បែរទីប្រជុំកោះ Spratleys និង Paracels។ ចំណែកលោកប្រមុខការទូតអាមេរិកចន ឃ៊ែរីដែលមានវត្តមាននៅក្នុងកិច្ចប្រជុំបានលើកឡើងពីច្បាប់ផ្លូវសមុទ្រអន្តរជាតិដែលគ្មាននរណាអាចបំពាន និងយកធ្វើជាកម្មសិទ្ធិផ្តាច់មុខរបស់ខ្លួនបានឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
គឺជាសេចក្តីថ្លែងការណ៍រួមមួយដែលអាស៊ានបានសម្តែងដោយមិនលាក់លៀមចំពោះក្តីបារម្ភរបស់ខ្លួនទាក់ទងនឹងមហិច្ឆតារបស់ចិននៅក្នុងសមុទ្រចិនខាងត្បូង។ នៅក្នុងសេចក្តី ថ្លែងការណ៍ចុងក្រោយ អាស៊ានមិនបានលើកឡើងចំៗពីប្រទេសអាស៊ានណាមួយដែលកំពុងប្រឈមមុខទល់នឹងចិនទេ តែគ្រាន់បានបញ្ជាក់ថា សំណុំរឿងសមុទ្រចិនខាងត្បូងបានក្លាយជាប្រធានរឿងអាទិភាពដែលចិន និងអាស៊ានត្រូវលើកទៅជជែកឲ្យបានស៊ីជម្រៅបន្ថែមនាពេលខាងមុខ ព្រមទំាងដាក់ចេញនូវវិធានការជាក់ស្តែងមួយដើម្បីកាត់បន្ថយភាពប្រឈមមុខដាក់គ្នា។
គួររម្លឹកជូនថា ក្នុងចំណោមប្រទេសអាស៊ានទំាង ១០ មានតែប្រទេសវៀតណាម ម៉ាឡេស៊ី ហ្វីលីពីន និងព្រុយណេទេដែលកំពុងទាមទារដែនដីមួយផ្នែកនៅក្នុងសមុទ្រចិនខាងត្បូង តែចិនបានទាមទារក្តោបយកទំាងអស់។ អាមេរិកបានផ្តល់ព័ត៌មានឲ្យដឹងថា គ្រាន់តែក្នុងរយៈពេល ១៨ខែ ចិនបានសាងសង់កោះសិប្បនិមិត្តនៅលើទំហំផ្ទៃទឹកសមុទ្រចំនួន ៨០០ហិចតា រួចបានប្រែក្លាយកោះសិប្បនិមិត្តទំាងនោះទៅជាកំពង់ផែ ឬមួយក៏រចនាសម្ព័ន្ធផ្សេងៗក្នុងគោលដៅពង្រីកឥទ្ធិពលយោធារបស់ខ្លួននៅក្នុងតំបន់។
គួររម្លឹកជូនថា កិច្ចប្រជុំថ្នាក់រដ្ឋមន្រ្តីការបរទេសអាស៊ាននៅម៉ាឡេស៊ីក៏មានការចូលរួមពីលោកប្រមុខការទូតចិនវ៉ាង យី និងសមភាគីអាមេរិកចន ឃ៊ែរីដែរ។ លោកចន ឃ៊ែរីដែលមិនញញើតនឹងថ្លែងវាយប្រហារចិននៅថ្ងៃព្រហស្បតិ៍ ទី៦ សីហាថា អាមេរិកនឹងមិនអនុញ្ញាតឲ្យមានការរារំាង បិទសិទ្ធិសេរីភាពក្នុងការធ្វើចរាចរណ៍លើផ្ទៃសមុទ្រ ឬមួយក៏ពីលើផ្ទៃសមុទ្រដែលជាដែនទឹកអន្តរជាតិនោះទេ។ លោកឃ៊ែរីបានបញ្ជាក់ច្បាស់ៗថា កប៉ាល់តូច ឬធំ ឬមួយទូកតូច ឬធំ រាប់តំាងពីទូកនេសាទទៅមានសិទ្ធិធ្វើចរាចរណ៍ដោយសេរីដោយគ្មានការហាមឃាត់ទេ និងថា គេត្រូវតែគោរពសិទ្ធិរបស់ប្រទេសនីមួយៗ។
កាលពីថ្ងៃពុធ ទី៥ សីហា លោកចន ឃ៊ែរីបានបរិហារនៅចំពោះមុខសមភាគីចិនលោកវ៉ាង យី ពីមហិច្ឆតាយោធារបស់ចិននៅក្នុងសមុទ្រចិនខាងត្បូងដែលលោកឃ៊ែរីយល់ថា បានបង្កចេញជាជម្ងឺផ្តាសាយជាមួយនឹងប្រទេសជិតខាងក្នុងតំបន់អាស៊ីអាគ្នេយ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ