ចិន៖ក្រោយមហន្តរាយបាក់ដីនៅ Shenzhen ថ្នាក់ដឹកនាំម្នាក់ធ្វើអត្តឃាត
នៅក្នុងប្រទេសចិន មួយសប្តាហ៍ក្រោយគ្រោះមហន្តរាយបាក់ដីយ៉ាងសម្បើមនៅតំបន់ឧស្សាហកម្មក្នុងទីក្រុង Shenzhen មានថ្នាក់ដឹកនាំក្នុងស្រុកម្នាក់បានលោតសម្លាប់ខ្លួនពីអាគារមួយកាលពីយប់ថ្ងៃអាទិត្យ ទី២៧ ធ្នូ។ ដំណឹងនេះត្រូវបានប្រកាសនៅក្នុងមីក្រូប្លុកផ្លូវការរបស់ប៉ូលិសក្នុងស្រុកនាថ្ងៃចន្ទ ទី២៨ ធ្នូ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៩
ថ្នាក់ដឹកនាំក្នុងស្រុកម្នាក់ដែលបានសម្លាប់ខ្លួនឯងដោយលោតពីលើអាគារកាលពីយប់ថ្ងៃអាទិត្យ ទី២៧ ធ្នូមានឈ្មោះ Xu Yuan’an។ លោក Xu គឺជានាយកការិយាល័យគ្រប់គ្រងជនបទក្នុងស្រុក Guangming នៃទីក្រុង Shenzhen។ ក្រោយការស៊ើបអង្កេត ប៉ូលិសក្នុងស្រុកបានប្រាប់ឲ្យដឹងថា លោក Xu ពិតជាបានធ្វើអត្តឃាតមែន ពោលមិនមែនជាឃាតកម្មទេ។ មរណៈភាពរបស់លោក Xu បានកើតមានឡើង មួយសប្តាហ៍ក្រោយពីមានគ្រោះមហន្តរាយបាក់ដីយ៉ាងខ្លាំងក្លានៅក្នុងតំបន់ឧស្សាហកម្ម Shenzhen ដែលបណ្តាលឲ្យមានមនុស្សស្លាប់ជាង ៨០នាក់ ព្រមទាំងបង្កឲ្យមានការខូចខាតទ្រព្យសម្បត្តិយ៉ាងច្រើនសម្បើម។
កាសែតផ្លូវការនៃក្រសួងដែនដី និងធនធានបានពន្យល់បកស្រាយពីមូលហេតុនៃគ្រោះមហន្តរាយដែលកើតចេញពីសំណង់ខុសច្បាប់ដុះដូចផ្សិត។ ក្រុមហ៊ុនសាងសង់បានជីកដីយកទៅគរចោលដូចភ្នំ និងដែលគំនរដីនោះត្រូវបានទឹកភ្លៀងទម្លាយបំបែកហូរគ្របដណ្តប់លំនៅដ្ឋានរបស់ប្រជាជន។ លោក Xu ក៏ជាថ្នាក់ដឹកនាំម្នាក់ដែលបានអនុញ្ញាត និងបិទភ្នែកទុកបណ្តោយឲ្យក្រុមហ៊ុនសាងសង់បន្តយកដីទៅចាក់គរដូចភ្នំ។
ជាទូទៅ មន្រ្តីទទួលបន្ទុកគ្រប់គ្រងជនបទមានតួនាទីជាអ្នកអនុវត្តន៍ច្បាប់ក្នុងស្រុក តែភាគច្រើនបានរំលោភអំណាច និងស៊ីសំណូកសូកប៉ាន់។ គេមិនអាចដឹងពីបទស៊ីសំណូកសូកប៉ាន់របស់លោក Xu នៅក្នុងរឿងបាក់ដីនៅតំបន់ឧស្សាហកម្ម Shenzhen កាលពីថ្ងៃទី២០ ធ្នូកន្លងទៅបានទេ ព្រោះការស៊ើបអង្កេតត្រូវបានបិទបញ្ចប់នៅពេលសមីខ្លួនបាត់បង់ជីវិត។ នៅក្នុងន័យនេះ សារមួយចំនួនរបស់អ្នកប្រើអ៊ីនធឺណែតបានសរសេរបែបចំអកថា មរណៈភាពលោក Xu បានបន្សល់ទុកទ្រព្យសម្បត្តិឲ្យគ្រួសារ ចូរកុំរំខានប្រពន្ធ និងកូនរបស់គាត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ