មហន្តរាយបាក់ដីនៅចិន ជាកំហុសមនុស្ស ?
មានយ៉ាងហោចណាស់មនុស្ស៩១នាក់ បាត់ខ្លួននៅក្នុងមហន្តរាយបាក់ដី នៅក្រុងឧស្សាហកម្ម Shenzhen ភាគខាងត្បូងប្រទេសចិន។ ក្រុងមួយចំហៀង សំណង់ផ្ទះសម្បែងជាងសាមសិបអាគារ ត្រូវជាប់គាំង កប់ភក់ ... បន្ទាប់មកការហូរបាក់ដីដ៏ធ្ងន់ធ្ងរនេះបានបង្កឱ្យមានការផ្ទុះបំពង់បង្ហូរហ្កាសដ៏សន្ធោសន្ធៅថែមមួយជាន់ទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
ក្រុមអ្នកសង្គ្រោះជាង១៥០០នាក់និងឡានពន្លត់អគ្គីភ័យ១០៤គ្រឿង បាននិងកំពុងប្រញឹកដៃជួយជនរងគ្រោះ។ បើតាមសាក្សី ដីក្រហមច្រាល ប៉ុនភ្នំ កម្ពស់រាប់រយម៉ែត្រ បានបាក់គ្របលើតំបន់ឧស្សាហកម្មសេនឆេន ដែលមានប្រជាជនរស់នៅជាង១០លាននាក់ អស់រាប់រយហិចតារ សំណង់អាគារផ្ទះសម្បែង៣៣ខ្លះត្រូវរលំមួយ ខ្លះត្រូវរុំជិតដោយភក់។
ការហូរបាក់ដីបានកើតឡើងនៅម៉ោង១១និង៤០នាទី ថ្ងៃអាទិត្យ រួចបន្តដោយបំផ្ទុះបំពង់ឧស្ម័នហ្កាសធម្មជាតិ ដ៏ខ្លាំង លាន់ឮដល់៤គីឡូម៉ែត្រ ជុំវិញកន្លែងមានគ្រោះមហន្តរាយ និងខ្ទាតបាចលាយបំណែកផ្ទុះរាយប៉ាយក្នុងរង្វង់អង្កត់ផ្ចិតជាង១០ហិចតារ។
តើហេតុអ្វីបានជាសុខៗដីបាក់យ៉ាងសាហាវដូច្នេះ ?! បើតាមសារព័ត៌មានផ្លូវការចិន មហន្តរាយនេះគឺជាស្នាដៃមនុស្ស។ ការដ្ឋានសំណង់ បានរុញច្រានឱ្យមានការជីកខួងដី រួចយកទៅចាក់គរដោយខុសច្បាប់ ឡើងខ្ពស់ដូចភ្នំកម្ពស់ជាងមួយរយម៉ែត្រ។ ក្រោយពេលមានភ្លៀងធ្លាក់ កាលពីប៉ុន្មានថ្ងៃមុន ភ្នំដីនោះក៏រលំបាក់ទាំងភ្នែនមក។
ភ្លាមមួយរំពេច នាយករដ្ឋមន្ត្រីចិន លោក លី ខឺឈាំង បានបញ្ជាឱ្យបើកអង្កេតផ្លូវការលើគ្រោះមហន្តរាយថ្មីនេះ ដែលមានគម្លាតពីមហន្តរាយផ្ទុះឆេះកំពង់ផែឧស្សាហកម្មជៀនជីនតែបួនខែប៉ុណ្ណោះ។
សូមបញ្ជាក់ថា គ្រោះមហន្តរាយឧស្សាហកម្មបានកើតជាញឹកញាប់នៅប្រទេសចិន ជាពិសេសនៅក្នុងឆ្នាំ២០១៥នេះ។ នៅថ្ងៃឆ្លងចូលឆ្នាំថ្មី មានការត់ជាន់គ្នាស្លាប់អស់៣៦នាក់ នៅសៀងហៃ។ នៅខែមិថុនា មានគ្រោះលិចកប៉ាល់នៅទន្លេយង់សេ ស្លាប់មនុស្ស ៤៣០នាក់ និង១៦៥នាក់នៅក្នុងការផ្ទុះឃ្លាំងស្តុកផលិតផលគីមីនៅកំពង់ផែជៀនជីង កាលពីខែសីហា។ គ្រោះមហន្តរាយឧស្សាហកម្មញយៗ បានបំផុសឱ្យមានសំណួរខ្លាំងជុំវិញបទដ្ឋានសុវត្ថិភាពនៅចិន ក្នុងសម័យអភិវឌ្ឍន៍សេដ្ឋកិច្ចដ៏លឿនរហ័សបីទសវត្សរ៍ចុងក្រោយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ