ថៃប្រឹងប្រយុទ្ធប្រឆាំងនឹងការជួញដូរមនុស្ស ដើម្បីស្តារកេរ្ត៍ឈ្មោះក្នុងរបាយការណ៍អាមេរិក
នៅថ្ងៃសុក្រនេះ អាជ្ញាធរថៃបានប្រកាសចោទប្រកាន់មនុស្ស៧២នាក់ ក្នុងនោះមានម្នាក់ជាឧត្តមសេនីយ៍ផង ពីបទជួញដូរមនុស្ស។ ជាការចោទប្រកាន់ដែលធ្វើឡើង តែប៉ុន្មានថ្ងៃមុនការផ្សព្វផ្សាយរបាយការណ៍ Trafficking in Person ផ្តល់ចំណាត់ថ្នាក់ដល់ប្រទេសនីមួយៗលើលោក ក្នុងសកម្មភាពប្រយុទ្ធប្រឆាំងនឹងការជួញដូរមនុស្ស។
ចុះផ្សាយនៅថ្ងៃ៖
ស្តាប់ - ០១:៥៦
អ្នកនាំពាក្យការិយាល័យរដ្ឋអាជ្ញា បានអះអាងថា មិនទុកឱ្យនរណាម្នាក់យកអំណាចមកអង្គុយលើច្បាប់ទេ !
នៅក្នុងចំណោមជនជាប់ចោទទាំង ៧២នាក់ មានជាង១០នាក់ ជាមន្ត្រីរដ្ឋការ និងតែម្នាក់គត់ជាមន្ត្រីជាន់ខ្ពស់យោធា ដែលតុលាការខេត្តសុងខ្លា ចាត់ទុកថាមេខ្លោងធំខាងជួញដូរមនុស្ស។ ឧត្តមសេនីយ៍ ម៉ាណា ធ្លាប់កាន់តំណែងច្រើនជាមេដឹកនាំនៅភាគខាងត្បូងប្រទេស អស់រយៈពេលជាច្រើនឆ្នាំ ហើយប៉ុន្មានឆ្នាំចុងក្រោយគឺជានាយទាហានធំ ប្រចាំតំបន់សុងខ្លាតែម្តង ! ខេត្តជាប់ព្រំដែននឹងម៉ាឡេស៊ី និងជាទីតាំងជូញដូរមនុស្សដ៏សំខាន់ មុននឹងផ្ទេរទៅទៅកាន់តួនាទីថ្មីមួយទៀតនៅទីក្រុងបាងកក ដោយគ្មានបញ្ជាក់ពីមូលហេតុ។
ថ្វីបើពេលនេះ មាននាយទាហានតែម្នាក់ដែលជាប់ចោទមែន ប៉ុន្តែ ទីផ្សារនៃការជួញដូរមនុស្សមានទំហំធំណាស់នៅប្រទេសថៃ។ អង្គការក្រៅរដ្ឋាភិបាលបានបរិហារជាញឹកញយអំពីសកម្មភាពនេះ និងបរិហារការផ្សំគំនិត ឬធ្មេញភ្នែកពីសំណាក់ប៉ូលិសនិងទាហានថៃ តាំងពីជាច្រើនឆ្នាំមកហើយ តែទើបផ្ទុះផ្អើលដល់សហគមន៍អន្តរជាតិ កាលពីខែឧសភាកន្លងទៅ បន្ទាប់ពីរកឃើញមានផ្នូរកប់ខ្មោចរួមជនអន្តោប្រវេសន៍ នៅកណ្តាលព្រៃ។ យុទ្ធនាការតាមចាប់បណ្តាញជួញដូរមនុស្ស របស់អាជ្ញាធរថៃ បានរុញច្រានឱ្យក្រុមមេខ្យល់បោះបង់ជនអន្តោប្រវេសន៍ភូមា បង់ក្លាដែស រាប់ពាន់នាក់កណ្តាលសមុទ្ទ។ វិបត្តិរត់ពន្ធមនុស្ស កាន់តែរីកធំធាត់ ក្លាយជាវិបត្តិតំបន់ ដោយមានថៃជាស្នូល។
ដើម្បីស្តារកេរ្ត៍ឈ្មោះ ថៃកំពុងសម្អិតសម្អាងខ្លួន បើកយុទ្ធនាការប្រឆាំងនឹងរបបជួញដូរមនុស្ស ដោយរំពឹងលើរបាយការណ៍របស់សហរដ្ឋអាមេរិក ដែលនឹងត្រូវចេញផ្សាយនៅថ្ងៃចន្ទខាងមុខ។ កាលពីឆ្នាំ២០១៤ របាយការណ៍បានបញ្ចុះចំណាត់ថ្នាក់ថៃ និងម៉ាឡេស៊ី ថាមិនបានធ្វើការគ្រប់គ្រាន់ក្នុងការប្រយុទ្ធប្រឆាំងនឹងការជួញដូរមនុស្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ