ការលែងលះរបស់អនាគតស្តេចថៃឆ្លុះបញ្ចាំងពីវិបត្តិស្នងរាជ្យបល្ល័ង្ក
ចុះផ្សាយនៅថ្ងៃ៖
ស្តាប់ - ០៦:៤៣
ព្រះជាយារបស់ព្រះរាជបុត្រ ត្រូវស្នងរាជ្យថៃ ជៀសមិនផុតពី បាត់បង់ងារ ជាសែរាជវង្ស បន្ទាប់ពីគ្រួសារសាច់ញាតិរបស់ព្រះនាង ត្រូវបានរដ្ឋាភិបាល ដកងារ ដោយសារមានជាប់ពាក់ព័ន្ធនឹងរឿងអាស្រូវពុករលួយ កាលពីខែវិច្ឆិកា។ តាមរយៈសេចក្តីជូនដំណឹង ចេញផ្សាយ កាលពីយប់ថ្ងៃសុក្រ ព្រះរាជវាំងថៃ បានបញ្ជាក់ព័ត៌មានដែលថា ព្រះអង្គម្ចាស់ក្សត្រី ស៊្រី រស្មី ព្រះជាយារបស់ព្រះរាជបុត្រ មហាវិជ្ជរ៉ា ឡុងកន បានសុំបោះបង់ចោលងាររាជវង្ស។ ការលាលែងចេញពីងាររាជវង្សរបស់ព្រះនាងស្រ៊ី រស្មី ជាយារបស់ព្រះរាជបុត្រដែលត្រូវស្នងរាជ្យ អាចឆ្លុះបញ្ចាំងពីវិបត្តិស៊ីរូង ផ្ទៃក្នុងរាជវង្សថៃ។
នៅប្រទេសថៃ ច្បាប់ជេរប្រមាថព្រះមហាក្សត្របានបិទផ្លូវ មិនឲ្យមានសេចក្តីរាយការណ៍ព័ត៌មានទាំងឡាយណា ដែលជាប់ទាក់ទងនឹងគ្រួសាររាជវង្សថៃ។ ដូច្នេះ គេគ្មានបានទទួលព័ត៌មានផ្លូវការណាមួយ ដែលបញ្ជាក់ពីហេតុផលពិតប្រាកដ ដែលធ្វើឲ្យព្រះជាយា ស្រ៊ី រស្មី សុំលាលែងពីងាររាជវង្សថៃ ហើយក៏គ្មានប្រភពផ្លូវការណាមួយ ដែលចេញមុខអះអាងថា ព្រះនាង ស្រ៊ី រស្មី បោះបង់ចោលងាររាជវង្ស ដោយសារតែ រឿងអាស្រូវពុករលួយ ដែលគ្រួសារសាច់ញាតិរបស់ព្រះនាងមានជាប់ពាក់ព័ន្ធនោះដែរ។
គេអាចស្មានដឹងថា ការសុំលាចេញពីងាររាជវង្ស របស់ព្រះនាងស្រ៊ី រស្មី គឺអាចមានជាប់ទាក់ទង យ៉ាងប្រាកដ នឹងរឿងអាស្រូវពុករលួយ ដែលនៅក្នុងនោះ គ្រួសារសាច់ញាតិ របស់ព្រះនាង៧នាក់ ត្រូវបានប៉ូលិសចាប់ខ្លួន និងត្រូវរដ្ឋាភិបាលដកចេញពីងាររាជង្ស កាលពីខែវិច្ឆិកា។
ចាប់តាំងពីមានផ្ទុះរឿងអាស្រូវដែលមានជាប់ពាក់ព័ន្ធនឹងសាច់ញាតិរបស់ព្រះជាយា របស់ព្រះរាជបុត្រ វិជ្ជរ៉ា ឡុងកន មានដំណឹងផ្លូវការតែមួយគត់ ដែលចេញពីរាជវាំងថៃ។ កាលពីយប់ថ្ងៃសុក្រ រាជវាំងបានចេញសេចក្តីប្រកាសព័ត៌មានមួយដែលលើកឡើងថា ព្រះមហាក្សត្រថៃ ព្រះចៅ ភូមិបុល បានទទួលយល់ព្រមការសុំលាលែង ពីងាររាជវង្សរបស់ព្រះអង្គម្ចាស់ក្សត្រី ស្រ៊ី រស្មី កាលពីថ្ងៃព្រហស្បតិ៍កន្លងទៅ។
តាមភាសារាជវាំង គេអាចកំណត់ថា ការសុំលាចេញពីងាររាជវង្សរបស់ព្រះនាង ស្រ៊ី រស្មី មានន័យស្មើនឹងការលះលែងគ្នា របស់ព្រះរាជបុត្រ ជាមួយនឹងព្រះជាយាទីបី ដែលព្រះអង្គបានរៀបការ ដោយសម្ងាត់ កាលពីឆ្នាំ ២០០១។ តាមច្បាប់រាជវង្ស ព្រះនាងស៊្រី រស្មីអាចនឹងក្លាយជាព្រះមហាក្សត្រិយានីថៃ នៅពេលដែលព្រះរាជបុត្រ វិជ្ជរ៉ាឡុងកន ឡើងស្នងរាជ្យ បន្ទាប់ពីព្រះបិតា គឺព្រះចៅភូមិបុល ដែលកំពុងប្រឈួន សម្រាកនៅមន្ទីរពេទ្យ។
តាមកាសែតក្នុងស្រុកថៃ បើទោះបីជាព្រះនាងស្រ៊ី រស្មី បាត់បង់តំណែងជាព្រះជាយាទីបីរបស់ ប៉ុន្តែ បុត្រារបស់ព្រះនាង នៅតែនៅតែមានងារាជវង្ស បន្តរស់នៅក្នុងវាំងជាមួយឪពុក និងអាចស្នងរាជ្យ ទៅថ្ងៃអនាគត។ ព្រះរាជបុត្រ មហាវិជ្ជរ៉ា ឡុងកន ធ្លាប់បានដកងារាជវង្សពីជាយាពីររូប និងកូនៗ ដែលពេលនេះ កំពុងភៀសខ្លួន រស់នៅក្នុងប្រទេសអង់គ្លេស។ ដូច្នេះ ព្រះរាជបុត្ររបស់ព្រះជាយាមុនៗរបស់មហាវិជ្ជរ៉ា ឡុងកន និងមិនអាចមានសិទ្ធិឡើងស្នងរាជ្យនៅប្រទេសថៃ ទៅថ្ងៃអនាគតបានទេ។
នៅក្នុងពេលដែលព្រះមហាក្សត្រថៃ កាន់តែជរា និងប្រឈួន មិនឈប់ រាជវង្សថៃកំពុងជួបវិបត្តិស្នងរាជ្យយ៉ាងធ្ងន់ធ្ងរ។ ព្រះចៅភូមិបុល ត្រូវបានប្រជាជនថៃគោរពលើកទូល ជាស្តេច ពាក់កណ្តាលអាទិទេព។ សម្រាប់ប្រជាជនថៃ ព្រះចៅភូមិបុលជាព្រះមហាក្សត្រ ល្អឥតខ្ចោះ ដែលបានដើរតួជាអ្នកសម្របសម្រួល នាំសុខឲ្យប្រទេស ថៃរហូតមក។ ប៉ុន្តែ ងាកមកមើលព្រះរាជបុត្រ មហាវិជ្ជរ៉ា ឡុងកន ដែលត្រូវស្នងរាជ្យបន្តពីព្រះចៅភូមិបុលវិញ គឺប្រជាជនថៃមិនសូវចូលចិត្តគាំទ្រប៉ុន្មានទេ។ ព្រះរាជបុត្រវិជ្ជរ៉ាឡុងកនត្រូវគេចាត់ទុក ជាព្រះរាជបុត្រ Playboy ដែលមានជាប់ពាក់ព័ន្ធនឹងរឿងអាស្រូវ ជាញឹកញយ តាំងពីបញ្ហាលុយកាក់ និងស្រីញី។
ព្រះរាជបុត្រស្នងរាជ្យមិនត្រឹមមានអប្រជាប្រិយភាព ប៉ុន្តែ ព្រះអង្គក៏មិនបានទទួលការគាំទ្រពីទាហានថៃប៉ុន្មានដែរ។ ក្រុមយោធា និងក្រុមអភិរក្សនិយម នៅក្នុងព្រះរាជវាំង មិនសូវពេញចិត្តចង់ព្រះរាជបុត្រ ឡើងស្នងរាជ្យទៅថ្ងៃអនាគតដែរ ដោយសារតែព្រះរាជបុត្រវិជ្ជរ៉ា ឡុងកន ធ្លាប់មានទំនាក់ទំនងល្អជាមួយគ្រួសាររបស់លោកថាក់ស៊ីន។ គេវាយតម្លៃថា ក្រុមទីប្រឹក្សាពិសេសរបស់ព្រះមហាក្សត្រ អាច នឹងផ្លុំត្រចៀក រហូតធ្វើព្រះរាជបុត្រ បាត់បង់ការចូលចិត្ត គាំទ្រពីព្រះបិតារបស់ព្រះអង្គ។ ត្រូវដឹងថា ក្រុមទីប្រឹក្សាពិសេសរបស់ព្រះចៅភូមិបុល ភាគច្រើន មិនចូលចិត្តចរិក ចង់សប្បាយ របស់របស់ព្រះរាជបុត្រ ហើយនិងការសេពគប់របស់ព្រះអង្គ ជាមួយថាក់ស៊ីន ដែលគេចាត់ទុកជាសត្រូវគ្រោះថ្នាក់សម្រាប់រាជវង្សនោះទេ។
ព្រះរាជបុត្របានសម្រេចដោះដៃពីព្រះជាយា ដើម្បីដកខ្លួនចេញពីរឿងអាស្រូវ ក៏ដូចជាដកគ្រួសាររាជវង្សចេញឲ្យឆ្ងាយពីរឿងអាស្រូវ។ ធ្វើដូច្នេះ ដើម្បីអាចតស៊ូ នៅក្នុងសង្រ្គាមស្នងរាជ្យផង និងដើម្បីស្រោចស្រង់ ស្តារមុខមាត់របស់ព្រះអង្គ កុំឲ្យបាក់មុខ នៅចំពោះប្រជារាស្រ្តថៃផង។
ដោយសារវិបត្តិស្នងរាជ្យ ព្រះជាយា ស៊្រី រស្មីត្រូវទទួលរងថ្មបាក់
នៅក្នុងពេលដែលព្រះរាជវាំងកំពុងជួបវិបត្តិស្នងរាជ្យ យោធា ដែលយកស្លាកព្រះមហាក្សត្រ មកពាំងមុខ បានចូលអន្តរាគមន៍ ក្តោបអំណាចគ្រប់គ្រងប្រទេសថៃ ដោយបានធ្វើរដ្ឋប្រហារ កាលពីខែឧសភា។ យោធាអន្តរាគមលូកដៃ ដើម្បី រក្សាស្ថិរភាព នយោបាយនៅថៃ បើសិនជាវិបត្តិស្នងរាជ្យ មិនអាចត្រូវដោះស្រាយចេញរួច បន្ទាប់ពីការសោយទីវង្គតរបស់ព្រះចៅភូមិបុល។
ទោះបីជាថៃ ជួបរដ្ឋប្រហារ ១២លើក ចាប់តាំងពីឆ្នាំ ១៩៣២ យោធានៅតែគោរព ចង់ឲ្យមានថៃដឹកនាំដោយព្រះមហាក្សត្រ ដែលនឹងដើរតួនាទី រក្សាលំនឹង និងនាំសុខឲ្យប្រទេសថៃ។ យោធាធ្លាប់បានបញ្ជាក់ហើយថា ប្រទេសថៃ អាចរីកចម្រើនទៅបាន ដរាបណាព្រះមហាក្សត្ររឹងមាំ និងមានអំណាច ឥទ្ធិពល។ ប៉ុន្តែ បញ្ហាដែលយោធា និងព្រះរាជវាំង កំពុង ប្រឈមនៅបច្ចុប្បន្ននេះ គឺថា តើនឹងរកព្រះមហាក្សត្រមកពីណា ដែលរឹងមាំ និងទទួលការគោរព ពីប្រជាជន ឲ្យដូចព្រះចៅភូមិបុលនោះ?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ