អ្វីទៅជាលទ្ធផល១៣ឆ្នាំនៃសង្គ្រាមរបស់អូតង់ នៅអាហ្វហ្កានីស្ថាន ?
ចុះផ្សាយនៅថ្ងៃ៖
ស្តាប់ - ០៥:៥៣
នៅថ្ងៃអាទិត្យទី ២៨ធ្នូ២០១៤នេះ កងកម្លាំងអន្តរជាតិរបស់អូតង់ ឬហៅកាត់ថាISAF បានរៀបចំកម្មវិធីបិទបញ្ចប់បេសកកម្មប្រយុទ្ធជាផ្លូវការ។ ISAF ត្រូវបានបង្កើតឡើងកាលពី១៣ឆ្នាំមុន ដើម្បីជួយអាមេរិក កម្ទេចពួកតាលីបង់ ក្រោយហេតុការណ៍មហាភេរវកម្មថ្ងៃទី ១១កញ្ញា ២០០១។ តែទីបំផុត ISAF បានផុងក្នុងសង្គ្រាមដ៏យូរអន្លាយ ដើម្បីគាំទ្រ និងស្ថាបនាអាហ្វហ្កានីស្ថានឡើងវិញ។ កងកម្លាំងប្រយុទ្ធនឹងដកចេញអស់ជាស្ថាពរនៅថ្ងៃទី៣១ធ្នូ ដោយបន្សល់ទុកតែទាហានប៉ុន្មានពាន់នាក់សម្រាប់ជួយបំពាក់បំប៉នកងកម្លាំងរក្សាសន្តិសុខអាហ្វហ្កានីស្ថាន។
អូតង់បានផ្តល់ ព័ត៌មានលម្អិតទាក់ទងនឹងរៀបចំពិធីនេះ នៅនាទីចុងក្រោយបំផុត ព្រោះតែខ្លាចមានការគំរាមកំហែងភេរវកម្ម និងការវាយប្រហារប្រដាប់អាវុធណាមួយ ពីសំណាក់ពួកតាលីបង់ ដែលរយៈពេលចុងក្រោយនេះ បានដៅការវាយប្រហារ កាន់តែច្រើនឡើងៗនៅកណ្តាលរដ្ឋធានីកាប៊ូល។ ថ្វីបើអូតង់ទម្លាក់ទង់ជាតិ នៅថ្ងៃនេះ នៅទីក្រុងកាប៊ូល ដើម្បីជាសញ្ញាបញ្ជាក់អំពីការបិទបញ្ចប់ការងារប្រយុទ្ធជាផ្លូវការមែន តែពួកតាលីបង់ មិនទម្លាក់អាវុធឯណា !
តាលីបង់ ចាត់ទុក បេសកកម្មអូតង់ថាបរាជ័យ
អ្នកនាំពាក្យតាលីបង់ បានថែមទាំងអះអាងប្រាប់ភ្នាក់ងារសារព័ត៌មានបារាំងយ៉ាងក្តែងៗថា បេសកកម្មប្រយុទ្ធ១៣ឆ្នាំរបស់កងកម្លាំងសម្ព័ន្ធមិត្តអូតង់ គឺជាបរាជ័យទាំងស្រុង និងយ៉ាងជូរចត់។ ការរៀបចំកម្មវិធីបិទបញ្ចប់បេសកកម្មនៅថ្ងៃអាទិត្យជាភស្តុតាង។
មិនតែប៉ុណ្ណោះ បើតាមអ្នកនាំពាក្យតាលីបង់ ក្រុមនេះថែមទាំងហ៊ានដាក់លក្ខខណ្ឌ ដោយបញ្ជាក់ជាថ្មីម្តងទៀត ថាការចរចាសន្តិភាពអាហ្វហ្កានីស្ថាន ត្រូវតែធ្វើឡើងដោយគ្មានវត្តិមានកងកម្លាំងអូតង់ នៅក្នុងទឹកដីអាហ្វហ្កានីស្ថាន។
ចាប់ពីថ្ងៃទី ១ មករា ២០១៥នេះ ត្រូវ បេសកកម្មប្រយុទ្ធរបស់កងកម្លាំងសម្ព័ន្ធមិត្ត ត្រូវបញ្ចប់ជាស្ថាពរ ដោយត្រូវប្រគល់ភារកិច្ចទៅឱ្យទាហានអាហ្វហ្កានីស្ថានប្រមុខនឹងពួកតាលីបង់តែម្នាក់ឯង និងដោយខ្លួនឯង ព្រោះកងទ័ពអូតង់ដែលបន្តឈរជើងក្នុងប្រទេសនេះ មានតួនាទីត្រឹមជាអ្នកបំពាក់បំប៉ន បង្វឹកបង្ហាត់ ឬជាជំនួយការដល់ទាហានអាហ្វហ្កានីស្ថានតែប៉ុណ្ណោះ។
១៣ឆ្នាំរបស់កងកម្លាំងអន្តរជាតិអូតង់
កងកម្លាំងអន្តរជាតិ ឬហៅកាត់ថា ISAF ត្រូវបានបង្កើតឡើងនៅឆ្នាំ២០០១ ដោយអង្គការសហប្រជាជាតិ ដើម្បីទៅរក្សាសន្តិសុខឱ្យក្រុងកាប៊ូល និងតំបន់ជុំវិញក្រុង ក្នុងពេលដែលកងទ័ពអាមេរិក និងសម្ព័ន្ធមិត្ត ត្រូវប្រយុទ្ធប្រឆាំងនឹងបណ្តាញ ភេរវនិយមអាល់កៃដា និងតាលីបង់ នៅក្នុងតំបន់ផ្សេងទៀតរបស់អាហ្វហ្កានីស្ថាន។ មកដល់ឆ្នាំ២០០៣ នៅ ពេលមេកើយ Mollah Omar បានរៀបចំរចនាសម្ព័ន្ធតាលីបង់ឡើងវិញ និងបានបើកយុទ្ធនាការវាយប្រហាររដ្ឋាភិបាលអាហ្វហ្កានីស្ថាន និងកងកម្លាំងអន្តរជាតិមក ISAF ក៏ត្រូវបានបញ្ចូលនិងក្រោមបញ្ជាការអង្គការអូតង់តែមួយរួមគ្នា និងមានបន្ទុក រយៈពេលបីឆ្នាំ ការពារសន្តិសុខពេញ ផ្ទៃនៃប្រទេសអាហ្វហ្កានីស្ថាន។ ដោយចង់យកឈ្នះពួកតាលីបង់ ដែលបង្កើនការវាយប្រហារឥតឈប់ និងជួយស្ថាបនាប្រទេសឡើងវិញ បំពេញចិត្តពលរដ្ឋអាហ្វហ្កានីស្ថាន កងកម្លាំងអន្តរជាតិអូតង់នេះ បានបន្តបេសកកម្មរហូត ដល់ឆ្នាំ២០១១ ដោយមានកម្លាំងទ័ព មិនធ្លាប់មានបានប្រមាណជិត ១៤០០០០នាក់ មកពីជាង៥០ប្រទេស ក្នុងនោះជាង ១០០០០០នាក់ជាអាមេរិក។ គឺនៅឆ្នាំដដែលនោះ ដែលអូសាម៉ា បិនឡាដិនត្រូវបានសម្លាប់ នៅ ប៉ាគីស្ថាន សហរដ្ឋអាមេរិក និងប្រទេសជាសម្ព័ន្ធមិត្តចាប់ដកជាបណ្តើរៗ។
អំពើពុករលួយ និងការបាត់បង់
ឥលូវ យុទ្ធនាការប្រយុទ្ធត្រូវបានផ្ទេរទៅឱ្យកម្លាំងទាហានអាហ្វហ្កានីស្ថាន ព្រោះISAF បានបំពាក់បំប៉នកម្លាំងបានប្រមាណ៣៥០០០០នាក់។ ប៉ុន្តែពួកតាលីបង់ នៅតែខ្លាំង កងកម្លាំងអាហ្វហ្កានីស្ថានបានរងការបាត់បង់យ៉ាងធ្ងន់ធ្ងរមិនធ្លាប់មាន នៅឆ្នាំ ២០១៤នេះ មានស្លាប់ដល់ទៅ៤៦០០នាក់។ គិតចាប់ពីចេញធ្វើសង្គ្រាមនៅអាហ្វហ្កានីស្ថាននេះមក អ៊ីសាហ្វបានបាត់បង់ជីវិតទាហានរបស់ខ្លួន ៣៤៨៥នាក់។ ហើយបើតាមអង្គការសហប្រជាជាតិ ជនស៊ីវិលជាអ្នករងគ្រោះខ្លាំងជាងគេនិងកើនឡើង១៩%នៅឆ្នាំ២០១៤។
តាំងពីឆ្នាំ២០០១មក លុយជំនួយ របស់សហគមន៍អន្តរជាតិ រាប់ពាន់លានដុល្លារ បានយកទៅចាក់ចាយនៅអាហ្វហ្កានីស្ថាន ប៉ុន្តែដោយហេតុតែអំពើពុករលួយស៊ីរ៉ូង ការស្ថាបនាប្រទេសគ្មានប្រសិទ្ធភាពអ្វីសោះ ! នៅឆ្នាំនេះ ការបោះឆ្នោតប្រធានាធិបតី ដែលជាគំរូបញ្ជាក់អំពីការផ្សះផ្សាជាតិ ឆ្លងកាត់អន្តរកាលទៅរកលទ្ធិប្រជាធិបតេយ្យ ក៏ត្រូវបានកត់សម្គាល់ដោយការលួចបន្លំ។ លោក បានជោគជ័យលើគូប្រជែងមែន តែរដ្ឋាភិបាលនៅតែពុំទាន់អាចបង្កើតឱ្យចេញជារូបរាងបានទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ