ចិនបានប្រកាសត្រៀមខ្លួនធ្វើជាអាជ្ញាកណ្តាលនៅក្នុងជម្លោះរវាងតាលីបង់ និងរដ្ឋាភិបាលអាហ្វហ្កានីស្ថាន
នៅថ្ងៃព្រហស្បតិ៍ ទី១៥ កុម្ភៈ លោកប្រមុខការទូតចិនវ៉ាង យីបានប្រកាសឲ្យដឹងថា ចិនបានត្រៀមខ្លួនរួចជាស្រេចដើម្បីធ្វើជាអាជ្ញាកណ្តាលនៅក្នុងជម្លោះរវាងពួកឧទ្ទាមតាលីបង់ និងរដ្ឋាភិបាលអាហ្វហ្កានីស្ថាន។ លោកវ៉ាង យីបានថ្លែងយ៉ាងដូចនេះនាដំណើរទស្សនកិច្ចរបស់លោកនៅក្នុងទីក្រុងអ៊ីស្លាម៉ាបាត ប្រទេសប៉ាគីស្ថាន។ ទន្ទឹមគ្នានេះ លោកប្រមុខការទូតចិនក៏បានបញ្ជាក់ពីតួនាទីមិនអាចជំនួសបានដែលប៉ាគីស្ថានធ្លាប់អនុវត្តន៍នាពេលកន្លងមកចំពោះប្រទេសជិតខាងអាហ្វហ្កានីស្ថានរបស់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
គឺនៅក្នុងសន្និសីទកាសែតរួមគ្នាជាមួយទីប្រឹក្សាសន្តិសុខប៉ាគីស្ថានដែលលោកប្រមុខការទូតចិនវ៉ាង យីបានថ្លែងច្បាស់ៗថា ចិន និងប៉ាគីស្ថាននឹងជួយគំាទ្ររដ្ឋាភិបាលអាហ្វហ្កានីស្ថាននៅក្នុងបេសកកម្មស្វែងរកការផ្សះផ្សាមួយជាមួយនឹងគូបដិបក្ខនយោបាយផ្ទៃក្នុងទំាងអស់ ក្នុងនោះក៏មានចលនាឧទ្ទាមតាលីបង់ដែរ។ គួរជម្រាបជូនថា តំាងពីកម្លំាងអន្តរជាតិដឹកនំាដោយអាមេរិកបានផ្តួលរំលំរបបតាលីបង់នៅអាហ្វហ្កានីស្ថានក្នុងឆ្នំា ២០០១ មក របបមួយនេះនៅបន្តមានជីវិត និងកំពុងប្រយុទ្ធតស៊ូប្រឆំាងនឹងរបបក្រុងកាប៊ូលបច្ចុប្បន្នយ៉ាងខ្លំាងក្លាទៀតផង។ តែតំាងពីខែធ្នូ ឆ្នំា ២០១៤ មក កម្លំាងអន្តរជាតិក្រោមដំបូលរបស់អង្គការអូតង់បានដកកម្លំាងទ័ពចេញពីទឹកដីអាហ្វហ្កានីស្ថាន ដោយបន្តរក្សាទុកចំនួនតិចតួចដើម្បីជួយហ្វឹកហ្វឺនកម្លំាងអាហ្វហ្កានីស្ថាន ពោលមិនចូលរួមប្រយុទ្ធត តំាងផ្ទាល់ទល់នឹងពួកតាលីបង់ដូចមុនទៀតទេ។
អ៊ីចឹងហើយបានជាលោកប្រមុខការទូតចិនវ៉ាង យីបានចាត់ទុកស្ថានការណ៍នៅអាហ្វហ្កានីស្ថានសព្វថ្ងៃ ជាស្ថានការណ៍អន្តរកាលមួយយ៉ាងសំខាន់ដែលប្រទេសជិតខាងប៉ាគីស្ថានមួយនេះត្រូវព្យាយាមរស់ដោយខ្លួនឯង។ លោកវ៉ាង យីបានបញ្ជាក់ថា អស់រយៈពេលជាយូរមកហើយដែលប្រទេសអាហ្វហ្កានីស្ថានបានឆ្លងកាត់នូវព្យុះនយោបាយ និងថា វាល្មមដល់ពេលដែលគេត្រូវបិទបញ្ចប់វិបត្តិដ៏រុំារ៉ៃនោះហើយ ដោយលោកបានលើកឡើងពីឆន្ទៈរបស់ប្រជាជនអាហ្វហ្កានីស្ថាន ក៏ដូចជាសហគមន៍អន្តរជាតិទូទៅ។ ក្នុងន័យនេះ លោកវ៉ាង យីបានចេញមុខធានាដោយគ្មានអល់អែកថា ចិនបានត្រៀមខ្លួនរួចជាស្រេចដើម្បីដើរតួនាទីប្រកបដោយលក្ខណៈស្ថាបនា និងផ្តល់ជំនួយចំាបាច់ដល់គ្រប់គូបដិបក្ខនយោបាយទំាងអស់នៅអាហ្វហ្កានីស្ថាន។
ម្យ៉ាងទៀត លោកវ៉ាង យីក៏បានលើកឡើងពីតួនាទីមិនអាចជំនួសបានរបស់ប៉ាគីស្ថាននៅក្នុងបញ្ហាអាហ្វហ្កានីស្ថាន និងថា ប៉េកំាង និងអ៊ីស្លាម៉ាបាតនឹងបន្តធ្វើការរួមគ្នាដើម្បីសន្តិភាពនៅអាហ្វហ្កានីស្ថាន។ ការលើកឡើងរបស់ប្រមុខការទូតចិនស្តីពីប្រទេសអាហ្វហ្កានីស្ថានពេលនេះបានកើតមានឡើង ប៉ុន្មានសប្តាហ៍ក្រោយពីពួកឧទ្ទាមតាលីបង់បានបញ្ជាក់នៅក្នុងគេហទំព័រខ្លួនថា ពួកគេបញ្ជូនគណៈប្រតិភូមួយក្រុមទៅទស្សនកិច្ចនៅក្នុងប្រទេសចិន។ តែលោកវ៉ាង យីមិនបានបញ្ជាក់ពីព័ត៌មាននេះទេ។ តែលោកបានប្រាប់ឲ្យដឹងពីគម្រោងដំណើរទស្សនកិច្ចជាប្រវត្តិសាស្រ្តរបស់លោកប្រធានាធិបតីចិនស៊ី ជីនពីងនៅប៉ាគីស្ថាននាពេលឆាប់ៗខាងមុខក្នុងឆ្នំា ២០១៥ នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ