ស្ថានទូតបារាំងនៅទ្រីប៉ូលីត្រូវរងការវាយប្រហារដោយភេរវកម្មបំផ្ទុះគ្រាប់បែកក្នុងរថយន្ត
ស្ថានទូតបារាំងប្រចាំទីក្រុងទ្រីប៉ូលីប្រទេសលីប៊ី នៅថ្ងៃអង្គារព្រឹកមិញ ត្រូវទទួលរងការវាយប្រហារដោយភេរវកម្មបំផ្ទុះគ្រាប់បែកក្នុងរថយន្តដែលបានបណ្តាលឲ្យកងរក្សាសន្តិសុខស្ថានទូតបារាំងពីរនាក់ជាជនជាតិបារាំងត្រូវរងរបួស ក្នុងនោះម្នាក់ត្រូវរបួសយ៉ាងធ្ងន់ធ្ងរ-នេះបើយោងតាមប្រភពព័ត៌មានស្ថានទូតបារំាងប្រចាំទីក្រុងទ្រីប៉ូលី។
ចុះផ្សាយនៅថ្ងៃ៖ កែប្រែថ្ងៃទី៖
អ្នកកាសែតម្នាក់នៃទីភ្នាក់ងារព័ត៌មានបារាំង AFP ដែលស្ថិតនៅលើ ទីកន្លែងកើតហតុ បានអះអាងថា - អគារដែលមានខាងផ្នែករដ្ឋបាល នៃស្ថានទូត ត្រូវ រងការខូចខាតជាទម្ងន់ ហើយ ជញ្ជាំងនៃអគារមួយផ្នែក ក៏ត្រូវរងអន្តរាយដែរ។ចំណែករថយន្តពីរគ្រឿងដែលចតនៅពីមុខស្ថានទូត ក៏ត្រូវឆេះខ្លោចទៅជាផេះ។
បន្ទាប់ពីអំពើភេរវកម្មនេះនៅទ្រីប៉ូលីនេះភ្លាម- រដ្ឋមន្ត្រីក្រសួងការបរទេសបារាំង លោក Laurent Fabius នៅក្នុងសេចក្តីជូនដំណឹងមួយ បានថ្លែងថា “ប្រទេសបារាំង ថ្កោលទោសយ៉ាងម៉ឺងម៉ាត់ ចំពោះអំពើភេរវកម្ម ប្រឆាំងស្ថានទូតបារាំងនៅព្រឹកមិញ ដែលបានបណ្តាលឲ្យបុគ្គលិកស្ថានទូតបារាំងពីររូបត្រូវរងរបួស។ “នៅក្នុងទំនាក់ទំនង ស្អិត ជាមួយអាជ្ញាធរលីប៊ី រដ្ឋអំណាចបារាំង នឹងចាត់វិធានការគ្រប់បែបយ៉ាងដើម្បីស្រាវជ្រាវរកការពិត នៅលើ អំពើភេរវកម្មដ៏ព្រៃផ្សៃនេះ ក៏ព្រមទាំង វែកមុខពួក ភេរវជនឲ្យបានយ៉ាងឆាប់រហ័សដែរ-នេះជាការថ្លែងបន្ថែមរបស់លោករដ្ឋមន្ត្រីការបរទេសបារាំង។
ដោយឡែក-រដ្ឋមន្ត្រីការបរទេសលីប៊ីវិញ លោក Mohmmed Abdel Aziz បានប្រកាសថ្កោលទោសយ៉ាងខ្លាំងក្លា ចំពោះ អំពើភេរវកម្មប្រឆាំងស្ថានទូតបារាំង ដោយលោក បានចាត់ទុកថា “ជាសកម្មភាពភេរវនិយម ប្រឆាំង ប្រទេសមួយដែលជាមិត្តរបស់លីប៊ី និងដែលបានជួយនាអំឡុងបដិវត្តន៍លីប៊ីក្នុងឆ្នាំ២០១១ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ