ភេរវកម្មប្រឆាំងប៉ូលិសនៅតួកគី ខណៈតួកគីវាយប្រហារពួកគួដឌីស្ថាននៅស៊ីរី
ចុះផ្សាយនៅថ្ងៃ៖
មានប៉ូលិស១១នាក់ បានស្លាប់ក្នុងភេរវកម្មបំផ្ទុះរថយន្ត ថ្ងៃសុក្រ២៦សីហានេះ នៅភាគអាគ្នេយ៍ប្រទេសតួកគី។ ទីភ្នាក់ងារព័ត៌មានរដ្ឋាភិបាលអាណាដូលូ បានទំលាក់កំហុសលើក្រុមផ្តាច់ទឹកដីនិយមគួដឌីស្ថាន មកពីបក្សការងារ PKK។
ភេរវកម្មថ្ងៃសុក្រនេះ កើតឡើងនៅក្រុងCirzre ភាគអាគ្នេយ៍ ខណៈតួកគីកំពុងសម្រុកវាយក្រុមឧទ្ទាមគួដឌីស្ថាន នៅស៊ីរី ទប់ស្កាត់មិនអោយក្រុមគួដឌីស្ថានស៊ីរីពង្រីកដែនដី តាមបណ្តោយព្រំដែនតួកគី។ តួកគីបើកការប្រយុទ្ធនៅស៊ីរី៣ថ្ងៃហើយ។
បន្ទាប់ពីបានជួយក្រុមឧទ្ទាមស៊ីរី ដណ្តើមបានក្រុងចារ៉ាប្លូស ភាគខាងជើង មកវិញ ម្សិលមិញ តួកគីបានបញ្ជូនរថពាសដែកទៅស៊ីរី ហើយបានទំលាក់គ្រាប់បែកលើក្រុមគួដឌីស្ថាន នៅភាគខាងជើងស៊ីរី។ តួកគីចោទថា ក្រុមគួដឌីស្ថានស៊ីរី មិនគោរពពាក្យសន្យាដកថយ ដែលបានធ្វើជាមួយអាមេរិកទេ។
ក្រុមគួដឌីស្ថានPKK វាយប្រហារប៉ូលិសតួកគី ញឹកញាប់ តាំងពីបទឈប់បាញ់ជាមួយរដ្ឋាភិបាលតួកគីបិទបញ្ចប់ឆ្នាំ២០១៥
បក្សគួដឌីស្ថានPKK ធ្វើចលនាក្នុងទឹកដីតួកគីតាំងពីឆ្នាំ១៨៨៤មក។ ក្រុមនេះធ្វើសកម្មភាពផ្តាច់ទឹកដីពីតួកគី។ ចំពេលតួកគិបើកការវាយប្រហារក្រុមរដ្ឋអ៊ីស្លាម និងក្រុមគួដឌីស្ថាននៅស៊ីរី ភេរវកម្មថ្ងៃសុក្រ២៦សីហានេះ អាចជាស្នាដៃរបស់គួដឌីស្ថានផងក៏ថាបាន ដើម្បីសងសឹករដ្ឋាភិបាលលោកអ៊ែរដូហ្កានវិញ។
សម្រាប់តួកគី ក្រុមឧទ្ទាមគួដឌីស្ថានមកពីបក្សPKK ក្នុងស្រុកតួកគី មិនខុសពីក្រុមឧទ្ទាមគួដឌីស្ថាននៅស៊ីរីទេ គឺមួយដំប នឹងបួន សុទ្ធតែជាក្រុមបង្កហិង្សា ចង់ផ្តាច់ទឹកដី។ តួកគីចាត់ទុកក្រុមគួដឌីស្ថានក្នងស្រុក និងក្រុមគួដឌីស្ថាននៅស៊ីរី ថាជាក្រុមភេរវជនប្រភេទតែមួយ។ បើទោះជាអាមេរិកជួយកងកម្លាំងគួដឌីស្ថាននៅស៊ីរី វាយប្រហារក្រុមជីហាតរដ្ឋអ៊ីស្លាមក៏ដោយចុះ។
មើលក្នុងសមរភូមិស៊ីរីវិញ ក្រុមគួដឌីស្ថានស៊ីរី ហាក់កំពុងខំពង្រីកដែនដីរបស់ខ្លួន ដូចដែលតួកគីបារម្ភអញ្ចឹង។ សប្តាហ៍នេះ កងកម្លាំងគួដឌីស្ថានស៊ីរី បាននាំគ្នាឆ្លងទន្លេអឺហ្វ្រាត ដែលជាបន្ទាត់ក្រហម កំណត់ដោយតួកគី។ អាមេរិកបានសុំក្រុមគួដឌីស្ថានកុំអោយឆ្លងតាមទន្លេអឺហ្វ្រាតEuphrate ឆ្ពោះទៅភាគខាងលិច ព្រោះនៅភាគខាងលិចទន្លេ ម្ខាងនោះ ជាទឹកដីតួកគី។
អាមេរិកសុំអោយពួកគេដកថយទៅភាគខាងកើតទន្លេវិញ។ យោងតាមអង្គការសិទ្ធិមនុស្សស៊ីរី ក្រុមគួដឌីស្ថានតិចតួចដកថយទៅភាគខាងកើតទន្លេ។ កងកម្លាំងភាគច្រើន ស្ថិតនៅភាគខាងលិចទន្លេអឺហ្វ្រាតនៅឡើយ។ ឃើញថា កងកម្លាំងគួដឌីស្ថានមិនព្រមស្តាប់ ទើបបានជាកងទ័ពតួកគិវាយប្រហារលើកងកម្លាំងគួដឌីស្ថានល្ងាចថ្ងៃព្រហស្បតិ៍ម្សិលមិញតែម្តងទៅ។ ដរាបណា គួដឌីស្ថានមិនដកថយពីទន្លេអឺហ្វ្រាត តួកគីនៅតែវាយប្រហារកងកម្លាំងគួដឌីស្ថានជានិច្ច។
ក្រុមគួដឌីស្ថានPKKនៅអ៊ីរ៉ាក់ចោទថា តួកគីត្រូវរ៉ូវគ្នាជាមួយក្រុមរដ្ឋអ៊ីស្លាម ព្រួតដៃគ្នាវាយទៅលើក្រុមគួដឌីស្ថាន នៅស៊ីរី
តួកគីបានបើកការវាយប្រហារនៅស៊ីរី កំទេចក្រុមជីហាតរដ្ឋអ៊ីស្លាម ដើម្បីសងសឹកនឹងភេរវកម្មក្រុងហ្កាស្យានតេប សប្តាហ៍មុន ដែលបានសម្លាប់មនុស្ស៥៤នាក់។ តែក្រុមគួដឌីស្ថានPKKនៅអ៊ីរ៉ាក់ថា តួកគីខំវាយប្រហារតែទៅលើកងកម្លាំងគួដឌីស្ថានស៊ី ជាជាងវាយប្រហារក្រុមរដ្ឋអ៊ីស្លាម។ គ្រប់ពេល តួកគីតែងបដិសេធជានិច្ច រាល់ការចោទប្រកាន់ថា ខ្លួនឃុបខិត រឺក៏ចុះកិច្ចព្រមព្រៀងជាមួយក្រុមភេរវជនរដ្ឋអ៊ីស្លាម។
អាមេរិកព្យាយាមរក្សាទំនាក់ទំនងជាមួយតួកគី ដោយមិនចោលគួដឌីស្ថាន
ការជួយជ្រោមជ្រែងកងកម្លាំងគួដឌីស្ថាន នៅស៊ីរី កំទេចក្រុមជីហាត ធ្វើអោយទំនាក់ទំនងរវាងអាមេរិកនិងតួកគីកាន់តែតានតឹង។ ទំនាក៉ទំនងតួកគី-អាមេរិកតានតឹងរួចទៅហើយ ក្រោយមានរដ្ឋប្រហារមិនបានសម្រេចនៅតួកគី។ តួកគីទាមទារអោយអាមេរិកបញ្ជូនលោកហ្គូឡិន ដែលតួកគីចោទថា ជាមេក្លោងរដ្ឋប្រហារតែអាមេរិកត្រូវពិនិត្យឯកសារភស្តុតាងចោទលោកហ្គូឡិនសិន។
អាមេរិកបានព្យាយាមបន្ធូរភាពតានតឹងឡើងវិញ ដោយបានបញ្ជូនអនុប្រធានាធិបតី ចូ បៃដិន អោយទៅក្រុងអង់ការ៉ា និងបានព្រមព្រៀងតាមសំណូមពរតួកគី សុំអោយកងកម្លាំងគួដឌីស្ថាន ដកថយពីភាគខាងលិចទន្លេអឺហ្វ្រាត។ ទន្ទឹមនេះដែរ អាមេរិកខំសរសើរតួកគី ដែលបានបើកប្រតិបត្តិការកំទេចក្រុមរដ្ឋអ៊ីស្លាម នៅស៊ីរី។ តែអាមេរិកក៏មិនហ៊ានចោលក្រុមគួដឌីស្ថានទាំងស្រុងដែរ ព្រោះក្រុមគួដឌីស្ថានបានវាយកំចាត់ក្រុមជីហាតរដ្ឋអ៊ីស្លាម បានល្អ ក្នុងសមរភូមិ។
ក្រុមណា វាយប្រហារក្រុមណា នៅស៊ីរី ?
តាំងពីផ្ទុះសង្គ្រាម នៅស៊ីរី ជាង៥ឆ្នាំមកនេះ ស៊ីរីបានក្លាយជាសមរភូមិប្រយុទ្ធអន្តរជាតិ មានក្រុមជីហាត និងប្រទេសជាច្រើនលូកដៃក្នុងសង្គ្រាមនេះ។ បច្ចុប្បន្ន កងទ័ពស៊ីរី ប្រយុទ្ធសត្រូវចំនួន៣ ទី១ គឺប្រយុទ្ធនឹងក្រុមឧទ្ទាម។ ក្រុមឧទ្ទាមជាសត្រូវទី១នេះ ជាប់ពាក់ព័ន្ធនឹងក្រុមជីហាតស៊ីរី និងក្រុមជីហាតបរទេស។ សត្រូវទី២របស់កងទ័ពគឺក្រុមជីហាតរដ្ឋអ៊ីស្លាមដូចយើងបានដឹងស្រាប់ហើយ។
សត្រូវទី៣របស់កងទ័ព គឺក្រុមផ្តាច់ទឹកដីនិយមគួដឌីស្ថានស៊ីរី។ ស៊ីរីទើបបើកការវាយប្រហារលើក្រុមគួដឌីស្ថាន ក្នុងពាក់កណ្តាលខែសីហានេះ ពេលពួកគួដឌីស្ថានដណ្តើមកាន់កាប់ក្រុងហាសាកេ នៅខាងជើងប្រទេស។ ក្រុមអេស្បួឡាលីបង់ អ៊ីរ៉ង់ អ៊ីរ៉ាក់ និងរុស្ស៊ី ជាអ្នកជួយកងទ័ពលោកអាសាដប្រយុទ្ធនឹងសត្រូវទាំងនេះ។
ក្រុមគួដឌីស្ថានស៊ីរីវិញ ប្រយុទ្ធនឹងក្រុមជីហាតរដ្ឋអ៊ីស្លាម ក្រោមការជ្រោមជ្រែងពីអាមេរិក។ ក្រុមជីហាតរដ្ឋអ៊ីស្លាមវិញប្រយុទ្ធនឹងក្រុមឧទ្ទាម។ ទន្ទឹមនេះដែរ មានក្រុមជ្រុលនិយមផ្សេងៗ បានមកវាយបំបែកក្រុមឧទ្ទាម អោយខ្ចាត់ខ្ចាយអស់។ ក្រុមឧទ្ទាមបានខំប្រមូលកម្លាំង ហើយបានជួយតួកគីកំទេចក្រុមរដ្ឋអ៊ីស្លាម នៅក្រុងចារ៉ាប្លូស ភាគខាងជើងស៊ីរី កាលពីថ្ងៃពុធ។
គួរបញ្ជាក់ថា ក្រុមឧទ្ទាមមាន២ប្រភេទ គឺក្រុមឧទ្ទាមនិន្នាការកណ្តាល ដែលមានការគាំទ្រពីអាមេរិក បារាំង និងអង់គ្លេស។ ហើយក្រុមឧទ្ទាមមួយទៀត គឺក្រុម ឧទ្ទាមអ៊ីស្លាម ដែលគាំទ្រដោយតួកគី។ នៅមានក្រុមមួយទៀត គឺក្រុមជីហាតហ្វាតេ អាល់ ឆាំ ជាអតីតក្រុមអាល់ ណូស្រា ដែលផ្តាច់ខ្លួនពីអាល់កៃដា។ ក្រុមនេះ ជាគូប្រជែងនឹងក្រុមរដ្ឋអ៊ីស្លាម។
បច្ចុប្បន្ន កងទ័ពស៊ីរីនៅសល់ដែនដីកាន់កាប់តែជិត៣៥ភាគរយប៉ុណ្ណោះ។ ក្រុមរដ្ឋអ៊ីស្លាមកាន់កាប់ជិត៣៥ភាគរយដែរ គឺមិនតិចទេ។ ហើយក្រុមគួដឌីស្ថានកាន់កាប់ដែនដី១៨ភាគរយ ឯក្រុមជីហាតហ្វាតេ អាល់ ឆាំ កាន់កាប់ដែនដី១២ភាគរយ។ ភាគីជម្លោះ និមួយៗ មានដែនដីកាន់កាប់ បន្តិចៗម្នាក់ រៀងៗខ្លួន បើចង់ជួយស៊ីរីអោយងើបពីសង្គ្រាម ប្រហែលជាត្រូវចាំពេលយូរយារទៀតណាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ