មហាសន្និបាត ក្លឹបឆ្នេរសមុទ្រ ដែលស្អាតបំផុត លើសកលលោក កិច្ចប្រជុំរដ្ឋមន្ត្រីទេសចរណ៍ CLMV និងកិច្ចប្រជុំក្រុមការងារទេសចរណ៍ មហាអនុតំបន់មេគង្គ GMS បើកធ្វើនៅភ្នំបូកគោ ខេត្តកំពត
មហាសន្និបាត លើកទី៩ ក្លឹបឆ្នេរសមុទ្រ ដែលស្អាតបំផុតលើសកលលោក កិច្ចប្រជុំរដ្ឋមន្ត្រីទេសចរណ៍ កម្ពុជា ឡាវ ភូមា និងវៀតណាម CLMV និងកិច្ចប្រជុំក្រុមការងារទេសចរណ៍ មហាអនុតំបន់មេគង្គ GMS បានបើកធ្វើរួមគ្នា ក្រោមអធិបតីភាពរបស់លោកនាយករដ្ឋមន្ត្រី ហ៊ុន សែន ប្រធានក្លឹបឆ្នេរសមុទ្រ ដែលស្អាតបំផុតលើសកលលោក រដ្ឋមន្ត្រីទេសចរណ៍ CLMV និងគណៈប្រតិភូជាតិ-អន្តរជាតិ ជាច្រើនទៀត។
ចុះផ្សាយនៅថ្ងៃ៖
ស្តាប់ - ០២:៣៨
កិច្ចប្រជុំទាំងបី នៅលើភ្នំបូក ខេត្តកំពត នាថ្ងៃទី៦ធ្នូនេះ ត្រូវបានលោកនាយករដ្ឋមន្ត្រី ហ៊ុនសែន ចាត់ទុកថា នឹងរួមចំណែកបន្តពង្រឹងបន្ថែមទៀត ដល់សាមគ្គីភាព និងការប្តេជ្ញាចិត្តបំពេញការងាររួមគ្នា ក្នុងចំណោមប្រទេសនានា ដើម្បីសម្រេចឲ្យបាននូវគោលដៅរួម នៃការអភិវឌ្ឍន៍វិស័យទេសចរណ៍។
ឆ្នេរសមុទ្ររបស់កម្ពុជា ប្រវែង ៤៤០ គីឡូម៉ែត្រ គ្របដណ្តប់លើខេត្តតំបន់ឆ្នេរ ទាំង៤ នៅខេត្តកោះកុង ព្រះសីហនុ កំពត និងខេត្តកែប ត្រូវបានបញ្ចូលជាសមាជិកពេញសិទ្ធិក្លឹបឆ្នេរសមុទ្រ ដែលស្អាតបំផុតលើសកលលោក កាលពីថ្ងៃទី២៦ ខែឧសភា ឆ្នាំ២០១១ នៅប្រទេស សេណេហ្គាល់។ តាំងពីពេលនោះមក ឆ្នេរសមុទ្រកម្ពុជា ត្រូវបានប្រសិទ្ធនាមថា ជាតារារះនាទិសនិរតី។
ដើម្បីអបអរសាទរនៃការចូលជាសមាជិកក្លឹបឆ្នេរសមុទ្រ ដែលស្អាតបំផុតលើពិភពលោកនេះ កម្ពុជាបានសំរេចឲ្យមានការរៀបចំពិធីបុណ្យសមុទ្រ លើកដំបូង កាលពីចុងឆ្នាំ២០១។ នៅឆ្នាំ២០១៣ ពិធីបុណ្យសមុទ្រ ត្រូវប្រារព្ធធ្វើឡើង នៅខេត្តកែប នៅថ្ងៃទី៧ និងថ្ងៃទី៨ធ្នូនេះ។
នៅឆ្នាំ២០១២ អ្នកទេសចរអន្តរជាតិ បានចូលមកទស្សនាតំបន់ឆ្នេរកម្ពុជា មានជាង ២៨ម៉ឺននាក់ និងទេសចរក្នុងស្រុក មានជាង ១លាន ៨សែននាក់។ សំរាប់រយៈពេល ១០ខែ ចាប់ពីខែមករា ក្នុងឆ្នាំ២០១៣នេះ ចំនួនអ្នកទេសចរអន្តរជាតិ មកទស្សនាតំបន់ឆ្នេរកម្ពុជា មានចំនួនជិត ៤២ ម៉ឺននាក់។
ការចូលជាសមាជិកក្លឹបឆ្នេរសមុទ្រ ដែលស្អាតបំផុតលើសកលលោក ត្រូវបានប្រមុខរដ្ឋាភិបាល លើកឡើងថា ជារបត់ថ្មី នៃការប្រែប្រួលមុខមាត់ ជាបន្តបន្ទាប់របស់តំបន់សមុទ្រកម្ពុជា ទាំងទិដ្ឋភាពសង្គម-សេដ្ឋកិច្ច ទេសចរណ៍ នគរូបនីយកម្ម និងបរិស្ថាន ដែលជាកត្តាកំណត់លើការទទួលស្គាល់ជាអន្តរជាតិ នូវឆ្នេរសមុទ្រកម្ពុជា។
តំបន់ឆ្នេរសមុទ្រកម្ពុជា ក៏ត្រូវបានប្រមុខរដ្ឋាភិបាល ប្រកាសជាថ្មីថា បាន និងកំពុងដើរតួនាទីយ៉ាងសំខាន់ និងជាប៉ូលសេដ្ឋកិច្ច ទី២ ក្នុងការទាក់ទាញវិនិយោគ សម្រាប់ជំរុញកំណើនសេដ្ឋកិច្ចជាតិ បន្ទាប់ពីរាជធានីភ្នំពេញ។
រហូតមកដល់ពេលនេះ ក្លឹបឆ្នេរសមុទ្រ ដែលស្អាតបំផុតលើសកលលោក មានឆ្នេរជាសមាជិកចំនួន ៣៧ ឆ្នេរ នៅក្នុង ២៦ ប្រទេស នៅគ្រប់ទ្វីបលើពិភពលោក។ សំរាប់កិច្ចប្រជុំមហាសន្និបាតលើកទី៩ ពេលនេះ មានការចូលរួមពីគណៈប្រតិភូឆ្នេរ ចំនួន ២៩ មកពី ១៨ ប្រទេស។ មហាសន្និបាត នៅលើភ្នំបូកគោ ពេលនេះ ក៏នឹងត្រូវប្រកាសបញ្ចូលឆ្នេរសមាជិកថ្មី គឺឆ្នេរ Sakarun របស់ប្រទេសក្រូអាស៊ី និងការពិនិត្យលើបេក្ខភាពឆ្នេរថ្មីចំនួន ៣ទៀត ក្នុងនោះ មានឆ្នេរ Matsushima និងឆ្នេរ Toyama របស់ប្រទេសជប៉ុន ឆ្នេរសមុទ្រ Nekour Al Hoceima របស់ប្រទេស Morrocco ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ