គួរបញ្ឈប់កុំឲ្យឈាមហូរ ក្នុងកាលៈទេសៈដែលមិនគួរហូរ
ចុះផ្សាយនៅថ្ងៃ៖
ស្តាប់ - ០៤:៥៧
ថាសម័យសង្គ្រាមទៅចុះ ការបង្ហូរឈាមជារឿងដែលមិនអាចចៀសវាងបាន ប៉ុន្តែ ទោះជាឈានដល់សម័យសន្តិភាពនិងអភិវឌ្ឍន៍ទៅហើយក៏ដោយ ក៏ឈាមខ្មែរនៅតែបន្តហូរឥតឈប់ឈរ គឺហូរតាមរយៈអំពើឃាតកម្ម កាប់សម្លាប់គ្នា ជាពិសេសគឺគ្រោះថ្នាក់ចរាចរណ៍ដែលបន្តសម្លាប់មនុស្សមិនតិចជាង៥នាក់ក្នុងមួយថ្ងៃ។ ចំនួនអ្នកស្លាប់កើនឡើងយ៉ាងគំហុកពេលបុណ្យធំៗដូចជាពិធីបុណ្យភ្ជុំបិណ្ឌកន្លងទៅថ្មីៗនេះជាដើម។ ដូច្នេះ ដល់ពេលហើយដែលត្រូវបញ្ឈប់កុំឲ្យឈាមខ្មែរហូរក្នុងកាលៈទេសៈដែលមិនត្រូវហូរ។
ទោះបីជាប្រទេសជាតិបានទទួលសន្តិភាពពេញលេញនិងគ្មានសង្គ្រាមទៀតក៏ដោយ ក៏ឈាមពលរដ្ឋខ្មែរជាច្រើននៅតែបន្តហូរជារៀងរាល់ថ្ងៃគឺជាឈាមដែលហូរក្នុងកាលៈទេសៈដែលមិនគួរនឹងហូរ។ របាយការណ៍គ្រោះថ្នាក់ចរាចរណ៍នៅតែបង្ហាញថា មនុស្សមិនតិចជាង៥នាក់ស្លាប់ជារៀងរាល់ថ្ងៃនៅលើដងផ្លូវសាធារណៈ។ នេះនៅមិនទាន់រាប់អ្នករងរបួសឈាមស្រោចខ្លួនជាង ៥០០០ នាក់ផ្សេងទៀតក្នុងមួយឆ្នាំៗនោះផងទេ។
គ្រាន់តែក្នុងអំឡុងបុណ្យភ្ជុំបិណ្ឌកន្លងទៅនេះចំនួនមនុស្សស្លាប់បានកើនឡើងយ៉ាងខ្លាំងគឺកើនលើសពីឆ្នាំមុនទៅទៀត។ ប្រសិនបើគេក្រឡេកមើលទំព័រកាសែតនិងគេហទំព័រឬទូរទស្សន៍ជារៀងរាល់ព្រឹក គេក៏បានឃើញសោកនាដកម្មគ្រប់ប្រភេទជាច្រើនទៀត ដូចជាឃាតកម្ម ជម្លោះបង្ករបួសស្នាម និងអំពើហិង្សាជាច្រើនទម្រង់ទៀត។ នេះជាសោកនាដកម្មយ៉ាងធំធេងដែលបង្កឲ្យឈាមខ្មែរហូរស្រោចផែនដីជារៀងរាល់ថ្ងៃ។
ជាការពិតណាស់ ការបាត់បង់សីលធម៌សង្គមនៅតែជាហេតុផលចម្បងជាងគេដដែល។ មើលចុះ! អាកប្បកិរិយារបស់អ្នកបើកបរតាមដងផ្លូវសាធារណៈ ម្នាក់ៗហាក់ដូចជាចាត់ទុកថាមានតែខ្លួនឯងម្នាក់គត់ដែលជាម្ចាស់កម្មសិទ្ធិផ្តាច់មុខលើផ្លូវដែលខ្លួនធ្វើដំណើរ។ ពួកគេបើកបរមិនខ្ចីរវល់ពីអ្នកដទៃ មិនខ្ចីរវស់ពីច្បាប់ចរាចរណ៍ និងមិនខ្ចីទាំងគិតគូរពីជីវិតខ្លួនឯងផង។ ខ្សែក្រវាត់ កញ្ចក់មើលក្រោយឬមួកសុវត្ថិភាពត្រូវបានពាក់ឬបំពាក់ដើម្បីកុំឲ្យប៉ូលិសផាកតែប៉ុណ្ណោះ តែមិនមែនដើម្បីការពារសុវត្ថិភាពខ្លួនឯងទេ។
ងាកទៅមើលបញ្ហាផ្សេងទៀត មនុស្សមួយចំនួនហ៊ានលើកដៃកាប់ ចាក់ ឬបាញ់ប្រហារទៅលើគូបដិបក្ខគ្រាន់តែរឿងជម្លោះបន្តិចបន្តួច។ អ្នកខ្លះទៀតហ៊ានប្រព្រឹត្តហិង្សាឬឃាតកម្មទៅលើសាច់ឈាមឯង( ប្រពន្ធ កូន ប្តី) ព្រោះតែជម្លោះមិនចុះសម្រុងគ្នាក្នុងគ្រួសារឬរឿងប្រច័ណ្ឌជាដើម។ គ្រឿងស្រវឹងដែលកំពុងពេញនិយមកាន់តែខ្លាំងឡើងនោះក៏ជាចំណែកដ៏សំខាន់មួយទៀតក្នុងការបង្កើតឲ្យមានគ្រោះថ្នាក់ចរាចរណ៍និងជម្លោះហិង្សាផ្សេងៗរាប់ទាំងហិង្សាក្នុងគ្រួសារផង។
ឬសគល់សំខាន់ជាងគេមួយដែលបង្កើតឲ្យមានបញ្ហាទាំងអស់នេះ គឺមរតកដែលបន្សល់ទុកដោយរបបខ្មែរក្រហម។ ក្រោយចេញពីរបបឃោរឃៅនោះ មនុស្សខ្មែរជាច្រើនមានវិបត្តិផ្លូវចិត្តជាប់នឹងខ្លួន។ នេះជាបញ្ហាដែលពិបាកនឹងមើលឃើញ ប៉ុន្តែ សម្រាប់អ្នកជំនាញចិត្តសាស្ត្រវិញ គេបានមើលឃើញបញ្ហាធំធេងណាស់។ ពួកខ្មែរក្រហមបានបំផ្លាញមិនត្រឹមតែហេដ្ឋារចនាសម្ព័ន្ធសង្គមប៉ុណ្ណោះទេ ប៉ុន្តែ របបនេះក៏បានបំផ្លាញស្មារតីខ្មែរយ៉ាងខ្ទេចខ្ទាំថែមទៀត។
របបដឹកនាំសង្គមក្រោយខ្មែរក្រហមបានជួយរំដោះជីវិតខ្មែរពីសេចក្តីស្លាប់និងបានរំដោះទុក្ខបានមួយផ្នែក ប៉ុន្តែ បញ្ហាសង្គមជាច្រើននៅបន្តកើតឡើងនិងបានរួមចំណែកក្នុងការបង្កើតសម្ពាធផ្លូវចិត្តថ្មីដល់ខ្មែរមួយចំនួនក្នុងសម័យកាលអភិវឌ្ឍនេះដែរ។ អយុត្តិធម៌សង្គម និទណ្ឌភាព គម្លាតអ្នកមាននិងអ្នកក្រ អំពើពុករលួយ ។ល។ និង។ល។ បានធ្វើឲ្យមនុស្សជាច្រើនបាត់បង់សីលធម៌ហើយស្រវារកតែប្រយោជន៍ផ្ទាល់ខ្លួនដោយមិនខ្វល់ពីច្បាប់ឬពីទុក្ខសោកអ្នកទៃឡើយ។
បច្ចុប្បន្នក្នុងកាលៈទេសៈដែលខ្មែរត្រូវរួមគ្នាដើម្បីកម្ចាត់មេរោគសង្គមទាំងនោះ បែរជាពលរដ្ឋខ្មែរក៏ដូចជាអ្នកនយោបាយដែរមិនចុះសម្រុងគ្នាយ៉ាងខ្លាំងទៅវិញ។ ជាញឹកញយ ភាពវឹកវរខាងនយោបាយបានក្លាយជាចំណោទសំខាន់មួយទៀតដែលបន្ថែមបញ្ហាទៅលើបញ្ហា។ អ្នកគាំទ្រនយោបាយដែលមាននិន្នាការខុសគ្នាក៏បង្ហាញការបែកបាក់គួរឲ្យព្រួយបារម្ភ។ ក្រៅពីអំពើហិង្សាទៅលើរាងកាយដោយផ្ទាល់ អំពើហិង្សាពាក្យសម្តីក៏ជាបញ្ហាធ្ងន់ធ្ងរគួរឲ្យកត់សម្គាល់ដែរ។ បើស្ថានភាពនេះនៅតែបន្ត ឈាមខ្មែរច្បាស់ជានឹងបន្តហូរគ្មានទីបំផុតឡើយ។
ដូច្នេះ ដល់ពេលហើយដែលត្រូវបញ្ឈប់កុំឲ្យខ្មែរហូរឈាមតទៅទៀត។ អ្នកដែលត្រូវផ្តើមមុនគេគឺអ្នកនយោបាយពីព្រោះរាល់សោកនាដកម្មដែលកើតឡើងទាំងអម្បាលម៉ានដែលប្រវត្តិសាស្ត្របានកត់ត្រាទុកគឺសុទ្ធសឹងជាកំហុសរបស់អ្នកនយោបាយធំជាងគេ។ បន្ទាប់មកគឺពលរដ្ឋខ្មែរខ្លួនឯងដែលជាអ្នករួមចំណែក។ ពេលដែលខ្មែរមានឯកភាពជាតិ ខ្មែរស្គាល់តម្លៃសីលធម៌សង្គមឡើងវិញ ហើយប្រទេសជាតិមានសុខសន្តិភាពពិតប្រាកដ ពេលនោះឈាមខ្មែរប្រាកដជានឹងឈប់ហូរជាមិនខាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ