កំណើនគ្រោះថ្នាក់ចរាចរណ៍ក្នុងឱកាសបុណ្យភ្ជុំបិណ្ឌ ជំរុញអោយអង្គការសង្គមស៊ីវិលមួយផ្លាស់ប្តូរយុទ្ធសាស្ត្ររបស់ខ្លួន
ការកើនឡើងខ្ពស់នៃចំនួនអ្នកស្លាប់ដោយសារគ្រោះថ្នាក់ចរាចរណ៍ ក្នុងឱកាសនៃពិធីបុណ្យភ្ជុំបិណ្ឌថ្មីៗនេះ បានជំរុញអោយអង្គការសង្គមស៊ីវិលមួយ ដែលកំពុងធ្វើយុទ្ធនាការផ្សព្វផ្សាយអប់រំច្បាប់ចរាចរណ៍នេះ ងាកមកជជែកគ្នាឡើងវិញ ដើម្បីផ្លាស់ប្តូរយុទ្ធសាស្ត្រ ត្រៀមទប់ស្កាត់គ្រោះថ្នាក់ចរាចរណ៍ពិសេសនៅពេលបុណ្យជាតិធំ។ គ្រោះថ្នាក់ចរាចរណ៍ក្នុងពេល និងក្រោយពេលបុណ្យភ្ជុំបិណ្ឌកន្លងទៅ បានបណ្តាលអោយស្លាប់៤៩នាក់ កើនលើសឆ្នាំមុន ២១នាក់។
ចុះផ្សាយនៅថ្ងៃ៖
ស្តាប់ - ០២:១៤
ក្រោយពេលការចេញផ្សាយរបាយការណ៍បូកសរុបគ្រោះថ្នាក់ចរាចរណ៍ផ្លូវគោករយៈពេល៥ថ្ងៃនៃពិធីបុណ្យភ្ជុំបិណ្ឌ បង្ហាញពីការកើនឡើងដ៍ខ្ពស់ និងគួរអោយបារម្ភនោះ អង្គការដៃគូរសុវត្ថិភាពចរាចរណ៍សកល ដែលកំពុងបើកយុទ្ធនាការផ្សព្វផ្សាយនិងរឹតបន្តឹងច្បាប់ចរាចរណ៍ផ្លូវគោកដល់ប្រជាពលរដ្ឋនៅទូទាំង១៥ខេត្តក្រុង បានប្រកាសពីការត្រៀមជួបប្រជុំគ្នាជាថ្មី ដើម្បីរុះរើនូវយុទ្ធសាស្ត្ររបស់ខ្លួនឡើងវិញ។ ជាយុទ្ធសាស្ត្រដែលនឹងផ្តោតទៅលើក្រុមគោលដៅ ដែលងាយនឹងបង្ករអោយមានគ្រោះថ្នាក់ចរាចរណ៍ នឹងកាន់តែស៊ីជំរៅថែមទៀត នោះគឺក្រុមបុរសៗដែលជិះម៉ូតូ អ្នកប្រើប្រាស់គ្រឿងស្រវឹង នឹងអ្នកបើកបរដោយមិនមានពាក់មួកសុវត្ថិភាពជាដើម។ នេះបើតាមការបញ្ជាក់របស់លោក គង់ សុវណ្ណ ប្រធានអង្គការដៃគូរសុវត្ថិភាពចរាចរណ៍សកល។
អង្គការដៃគូរសុវត្ថិភាពចរាចរណ៍សកល ដែលកំពុងសហការជាមួយក្រសួងមហាផ្ទៃ និងអ្នកស្ម័គ្រចិត្តកាកបាទក្រហមកម្ពុជារាប់រយនាក់ បើកយុទ្ធនាការផ្សព្វផ្សាយនិងរឹតបន្តឹងច្បាប់ចរាចរណ៍ផ្លូវគោកដល់ប្រជាពលរដ្ឋនៅទូទាំង១៥ខេត្ត/ក្រុង។
យុទ្ធនាការ ដែលបានផ្តើមធ្វើតាំងពីថ្ងៃទី១៩កញ្ញា ហើយគ្រោងនឹងបញ្ចប់នៅខែធ្នូខាងមុខ។ ប៉ុន្តែលោក គង់ សុវណ្ណ បានប្រកាសថា យុទ្ធនាការនឹងត្រូវផ្លាស់ប្តូរយុទ្ធសាស្ត្រ នៅក្រោយកិច្ចប្រជុំក្រុមការងារបច្ចេកទេស ដែលដឹកនាំដោយគណៈកម្មការជាតិសុវត្ថិភាពចរាចរណ៍, ក្រសួងមហាផ្ទៃ, ក្រសួងសាធារណៈការ, អង្គការសង្គមស៊ីវិលដែលធ្វើការខាងផ្នែកចរាចរណ៍ និងដៃគូរពាក់ព័ន្ធដ៍ទៃទៀតនាអំឡុងខែតុលាខាងមុខនេះ។
បើតាមរបាយការណ៍គ្រោះថ្នាក់ចរាចរណ៍ក្នុងរយៈពេល៥ថ្ងៃនៃពិធីបុណ្យភ្ជុំបិណ្ឌ ចាប់ពីថ្ងៃទី២០ដល់ថ្ងៃទី២៤កញ្ញា ដែលចេញផ្សាយដោយនាយកដ្ឋានសណ្តាប់ធ្លាប់ចរាចរណ៍ផ្លូវគោកនៃអគ្គស្នងការដ្ឋាននគរបាលជាតិ គ្រោះថ្នាក់ចរាចរណ៍នៅទូទាំងប្រទេសបានកើតឡើង ១៣៧ លើក ដែលបណ្តាលអោយស្លាប់មនុស្ស៤៩នាក់ របួស៣០៥នាក់។ ចំនួននេះ បានកើនឡើងលើសឆ្នាំ២០១៣ ដែលក្នុងរយៈពេលដូចគ្នា គ្រោះថ្នាក់ចរាចរណ៍កើន៥៣លើកស្មើ ៦៣ភាគរយ ស្លាប់កើនឡើង២១នាក់ ស្មើ៧៥ភាគរយ របួសកើន៧៨នាក់ ស្មើ៣៥ភាគរយ។ មូលហេតុសំខាន់ៗនៃគ្រោះថ្នាក់នេះ គឺភាគច្រើនបណ្តាលមកពីបើកបរលើសល្បឿនកំណត់៤៣ភាគរយ បើកបរក្រោមឥទ្ធិពលស្រវឹង១២ភាគរយ បើកបរប្រជែងគ្នា១១ភាគរយ និងមិនគោរពសិទ្ធអាទិភាព១០ភាគរយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ