សន្តិសុខ៖ប្រេស៊ីលមិនចង់លេងសើច ក្នុងពេលប្រកួតបាល់ទាត់ពិភពលោក
ចុះផ្សាយនៅថ្ងៃ៖
ស្តាប់ - ០៤:៤៤
នៅបួនខែមុនការប្រកួតបាល់ទាត់ពិភពលោក រដ្ឋាភិបាលប្រេស៊ីលប្រកាសបង្កើនចំនួនប៉ូលិស ទាហានដែលត្រូវរក្សាសន្តិសុខ សណ្តាប់ធ្នាប់ ក្នុងពេលប្រកួតបាល់ទាត់ ដែលត្រូវប្រព្រឹត្ត ទៅពីថ្ងៃទី ១២ មិថុនាដល់ថ្ងៃទី ១៣ កក្កដា។ ជាសរុប រដ្ឋាភិបាលរបស់លោកស្រីប្រធានាធិបតី DilmaRousseff នឹងពង្រាយកម្លាំងប៉ូលិស និងទាហានប្រមាណ ១សែន ៧ម៉ឺននាក់ នៅតាមទីក្រុងចំនួន ១២ ដែលត្រូវរៀបចំទទួលការប្រកួតបាល់ទាត់ពិភពលោក។ ហេតុអ្វីបានជាប្រេស៊ីលត្រូវចំណាយកម្លាំងដ៏ច្រើនសន្ធឹកសន្ធាប់ ដើម្បីរក្សាសន្តិសុខ?
ក្នុងនាមជាប្រទេសម្ចាស់ផ្ទះ ប្រេស៊ីលចង់បង្ហាញដល់ភ្ញៀវ គណប្រតិភូបរទេស ថា ប្រេស៊ីលមិនបានព្រងើយកន្តើយ ក្នុងរឿងធានាសន្តិសុខ សម្រាប់ពួកគេឡើយ។ ក្នុងរវាងតែមួយខែ ប្រេស៊ីលប្រកាសបង្កើនចំនួនប៉ូលិស និងកងទ័ព ៧ម៉ឺននាក់ បន្ថែមពីលើចំនួនមួយសែននាក់ ដែលត្រូវចូលខ្លួនទៅរក្សាសន្តិសុខសណ្តាប់ធ្នាប់ ជូនទស្សនិកជនបរទេស ដែលធ្វើដំណើរទៅមើលការប្រកួតបាល់ទាត់ ពិភពលោក។
កាលពីសប្តាហ៍មុន នៅក្នុងបទសម្ភាសន៍ មួយ នៅក្នុងវិទ្យុជាតិប្រេស៊ីលលោកស្រីប្រធានាធិបតីប្រេស៊ីល DilmaRousseff បានប្រកាសថា ប៉ូលិសសហព័ន្ធ ប៉ូលិសឆ្នើមៗ របស់ជាតិ និងប៉ូលិសផ្លូវគោកបានត្រៀមខ្លួនរួចហើយ ដើម្បីអន្តរាគម ទៅតាមជំនាញរបស់ពួកគេ នៅក្នុងពេលការប្រកួតបាល់ទាត់ ចាប់ផ្តើមឡើង នៅប្រេស៊ីល។ ប៉ូលិសទាំងនោះត្រូវបានចាត់ចែងរួចហើយឲ្យទៅប្រចាំការ នៅតាមទីក្រុងទាំង ១២ ជាទី ដែលមានស្តាតប្រកួតបាល់ទាត់ពិភពលោក។ តាមលោកស្រីប្រធានាធិបតី បើសិនជាចាំបាច់ ទាហានកងកុម្មង់ដូរពិសេស ដែលត្រូវការពារទឹកដីប្រេស៊ីល នឹងអាចត្រូវបញ្ជូន ជាពិសេសឲ្យចូលទៅរក្សាសន្តិសុខ នៅពេលប្រេស៊ីលបើកការប្រកួតកីឡាបាល់ទាត់ពិភពលោក។
បញ្ហាអសន្តិសុខ នៅប្រេស៊ីល ត្រូវបានគេចោទសួរ ឡើង តាំងពីពេលដែលប្រេស៊ីលបានទទួលសិទ្ធិធ្វើជាម្ចាស់ផ្ទះរៀបចំព្រឹត្តិការណ៍ពិភពលោក ដូចជាការប្រកួតបាល់ទាត់ពិភពលោក នៅរដូវក្តៅខាងមុខ និងកីឡាអូឡាំពិកពីរឆ្នាំក្រោយ។ ប្រទេស នៅអាមេរិកឡាទីនមួយនេះល្បីខាងសំបូរក្រុមម៉ាហ្វីយ៉ា ក្រុមជួញដូរថ្នាំញៀន ដែលមានទំនាស់ និងប្រយុទ្ធបង្ហូរឈាម រវាងគ្នា ដោយសារតែរឿងផលប្រយោជន៍។ ដូច្នេះ ដើម្បីកែប្រែទស្សនៈខ្មៅមកលើប្រេស៊ីល និងដើម្បីធានាបញ្ចុះបញ្ចូលអន្តរជាតិ ប្រធានាធិបតីមុនគឺលោកលូឡាបានធ្វើនយោបាយបង្រ្កាបក្រុមទុច្ចរិតផង និងធ្វើនយោបាយសន្តិភាពជាមួយក្រុមម៉ាហ្វីយ៉ាសំខាន់ៗ នៅប្រេស៊ីលផង។ តាមក្រសួងយុត្តិធម៌ ប្រេស៊ីលការប្រយុទ្ធគ្នារវាងក្រុមទុច្ចរិត នៅប្រេស៊ីលមិនស្ថិតនៅក្នុងបញ្ជីព្រួយបារម្ភរបស់អាជ្ញាធរទេ។ ផ្ទុយទៅវិញ គឺបាតុកម្មមិនឈប់ឈររបស់ប្រជាជនប្រេស៊ីលទេ ដែលកំពុងធ្វើឲ្យអាជ្ញាធរព្រួយបារម្ភ និងឈឺក្បាល។
តាំងពីខែមិថុនាឆ្នាំមុន ប្រេស៊ីលឧស្សាហ៍ជួបមហាបាតុកម្ម របស់ប្រជាជនដែលចុះថ្នល់ ដោយសារ តែមិនពេញចិត្តនឹងនយោបាយរបស់រដ្ឋាភិបាលបច្ចុប្បន្ន។ ដំបូងឡើយ ពួកគេធ្វើបាតុកម្ម ដើម្បីបរិហារពីការឡើងថ្លៃសំបុត្ររថយន្តក្រុង។ ប៉ុន្តែ ចលនាធ្វើបាតុកម្មបានរីករាលដាលស្ទើរពេញផ្ទៃប្រទេស ដើម្បីរិះគន់ពីអំពើពុករលួយរបស់មន្រ្តីរដ្ឋាភិបាល។ បាតុករដែលភាគច្រើន ជាយុវជនបានចោទប្រកាន់ ផងដែរពីការចាយលុយមិនត្រឹមត្រូវរបស់រដ្ឋាភិបាលដែលចំណាយលុយ ច្រើនពាន់លានដើម្បីរៀបចំការប្រកួតបាល់ទាត់ ក្នុងពេលដែលវិស័យសុខាភិបាល និងសេវាសាធារណៈ ប្រេស៊ីលកំពុងជួបការខ្វះខាត។
ពីមួយលើក ទៅមួយលើក បាតុកម្មមានលក្ខណៈកាន់តែហិង្សា។ បាតុករបានចូលបំផ្លាញអគាររដ្ឋ អគារហាងទំនិញ និងដុតសំបកកង់ឡាន នៅក្នុងពេល ដែលប៉ូលិសត្រូវគេសង្កេតឃើញថា មិនទាន់ មានសមត្ថភាព ឬលទ្ធភាពគ្រប់គ្រាន់ ដើម្បីគ្រប់គ្រងក្រុមបាតុករ ឬអំពើហិង្សាដែលកើតមាន នៅក្នុងពេលប្រកួតបាល់ទាត់។ ការវាយតប់គ្នារវាងក្រុមអ្នកគាំទ្រក្លឹបបាល់ទាត់ សហព័ន្ធប្រេស៊ីលដែលបង្កឲ្យមានមនុស្សរបួស ជាច្រើននាក់ កាលពីខែមិថុនាឆ្នាំមុន ជាឧទាហរណ៍ស្រាប់។ កាលពីដើមខែនេះ ការបាត់បង់ជីវិតរបស់អ្នកថតរូបទូរស្សន៍ម្នាក់ ដោយសារតែកាំជ្រួចរបស់ក្រុមបាតុករបានបង្ហាញកាន់តែច្បាស់ ពីចរិតហិង្សាកាន់តែខ្លាំងរបស់បាតុករ និងការថ្លោះធ្លោយរបស់ប៉ូលិសប្រេស៊ីល។
នៅក្រោយហេតុការណ៍នេះ រដ្ឋាភិបាលប្រេស៊ីលបានបញ្ជាក់ថា គេកំពុងរៀបចំគម្រោងច្បាប់មួយដើម្បីដាក់ពិន័យលើអ្នកដែលបំផ្លាញទ្រព្យសម្បត្តិសាធារណៈ និងលើអ្នកដែលប្រព្រឹត្តហិង្សា នៅក្នុងពេលធ្វើបាតុកម្ម។ ជាមួយគ្នានោះ សភាប្រេស៊ីលកំពុងពិភាក្សាលើគម្រោងច្បាប់ប្រឆាំងអំពើភេរវកម្មដែលមានគោលដៅដាក់ទណ្ឌកម្មកាន់តែខ្លាំងលើអ្នកដែលធ្វើសកម្មភាពវាយបំផ្លាញធ្វើឲ្យខូចខាតបេតិកភណ្ឌសាធារណៈ។
តាមរយៈការប្រកាសបង្កើនចំនួនប៉ូលិសរក្សាសន្តិសុខ និងធ្វើច្បាប់ដើម្បីថ្កោលទោស អ្នកធ្វើអំពើហិង្សា នៅក្នុងបាតុកម្មរដ្ឋាភិបាលមានទិសដៅព្រមានដល់ ក្រុមបាតុករហិង្សាផង និងដើម្បីធានាអះអាងសន្តិសុខ ១០០ ភាគរយដល់ ភ្ញៀវ ក្រុមកីឡាបាល់ទាត់ និងប្រមុខរដ្ឋដែលត្រូវធ្វើដំណើរ ទៅទស្សនាការប្រកួតបាល់ទាត់។ ប៉ុន្តែ តាមការស្ទង់មតិ ដែលគេបង្ហាញ កាលពីថ្ងៃអង្គារ សប្តាហ៍មុន ប្រជាជនប្រេស៊ីលជាង ៨០ភាគរយ គិតថា មហាបាតុកម្មនឹងកើតមាន នៅក្នុងពេលការប្រកួតបាល់ទាត់ ចាប់ផ្តើម នៅប្រេស៊ីល។ ប្រជាជនប្រេស៊ីលដែលមានកំហឹង នៅតែរិះគន់ការចាយលុយខ្ជះខ្ជាយរបស់រដ្ឋាភិបាលប្រេស៊ីលដើម្បីទទួលការប្រកួតបាល់ទាត់។ ក្នុងរឿងទទួលរៀបចំការប្រកួតបាល់ទាត់ ពិភពលោក រដ្ឋាភិបាលប្រេស៊ីលបានចំណាយលុយរាប់ លានដុល្លារ ប៉ុន្តែ រដ្ឋាភិបាលនេះនៅតែទទួលការដាក់សម្ពាធ ទាំងពីខាងក្រៅ និងពីខាងក្នុង។ អង្គការFifa បានបន្ទោសភាគីប្រេស៊ីល ពីរឿងយឺតយ៉ាវក្នុងការសាងសង់ស្តាត និងហេដ្ឋារចនាសម្ព័ន្ធ។ នៅក្នុងប្រទេសវិញរដ្ឋាភិបាលកំពុងប្រឈមនឹងកំហឹងចលនាមហាជនដែលចង់ឲ្យរដ្ឋាភិបាលបង្វែរលុយពីការរៀបចំកីឡាបាល់ទាត់ពិភពលោក យកទៅចំណាយលើសេវាសាធារណៈវិញ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ