ខឹងចិនដែលបង្កើតតំបន់ការពារដែនអាកាស ជប៉ុនរួមជាមួយអាស៊ានដើម្បីសេរីភាពក្នុងការហោះហើរ
ចុះផ្សាយនៅថ្ងៃ៖
ស្តាប់ - ០៦:០៥
ជំនួបកំពូលអាស៊ាន និងជប៉ុន បានបើកធ្វើ នៅថ្ងៃសៅរ៍ទី ១៤ ធ្នូ នៅទីក្រុងតូក្យូ។ ជប៉ុនដែលជាម្ចាស់ផ្ទះបានសន្យាមុនគេ ផ្តល់ជំនួយ និងកម្ចីក្នុងទឹកប្រាក់២០ពាន់លានដុល្លារ ដល់អាស៊ាន។ ជប៉ុននៅបានរួមគ្នាជាមួយអាស៊ានចេញសេចក្តីប្រកាសរួមមួយ ដែលនៅក្នុងអាស៊ាននិងជប៉ុនបានព្រមព្រៀងធ្វើការជាមួយគ្នាដើម្បីធានាសេរីភាព និងសន្តិសុខនៅក្នុងការហោះហើររបស់អាកាសចរណ៍ស៊ីវិល។ សេចក្តីប្រកាសមិនបាននិយាយចំៗពីតំបន់ការពារដែនអាកាសដែលចិនទើបបង្កើត និងដែលជប៉ុនកំពុងចោទថា បានរំលោភលើដែនអាកាសរបស់ខ្លួន។ តាមគម្រោង ជំនួបកំពូលអាស៊ាននៅជប៉ុន ជាជំនួបអាស៊ានបូកបី (ចិន កូរ៉េខាងត្បូង) ប៉ុន្តែ ចិន និងកូរ៉េខាងត្បូង មិនត្រូវបានគេអញ្ជើញ។
នៅពេលចូលកាន់តំណែងជា នាយករដ្ឋមន្រ្តីជប៉ុន លោកស៊ីនហ្សូ អាបេធ្លាប់ប្រកាសយកអាស៊ាន ជានយោបាយការទូតអាទិភាព នៅក្នុងអាណត្តិរបស់លោក។ ក្នុងរយៈពេលតែមួយឆ្នាំ នាយករដ្ឋមន្រ្តី ជប៉ុន បានធ្វើដំណើរទៅធ្វើទស្សនកិច្ចនៅក្នុងប្រទេសសមាជិកអាស៊ានទាំង១០។ ពង្រឹងចំណងមិត្តភាពជាមួយអាស៊ានដែលកំពុងមានសក្តានុពលសេដ្ឋកិច្ច និងសំខាន់សម្រាប់ទីផ្សារផលិតផលរបស់ជប៉ុនជារឿងមួយ ប៉ុន្តែ ដែលជប៉ុនយកចិត្តទុកដាក់ខ្លាំងគឺយុទ្ធសាស្រ្តភូមិសាស្រ្តនយោបាយ។
សមាជិកមួយចំនួនរបស់អាស៊ាន ដូចជាហ្វីលីពីន វៀតណាម ជាដើម ក៏កំពុងមានជម្លោះដណ្តើមទឹកដីនៅក្នុងសមុទ្រចិនខាងត្បូងជាមួយចិនដែរ។ ហ្វីលីពីនតែម្តងបានហ៊ានទាំងចេញមុខតទល់តាមការទូតប្រឆាំងនឹងចិន បន្ទាប់ពីចិនបានបញ្ជូនកប៉ាល់ល្បាតឲ្យទៅប្រចាំនៅប្រជុំកោះ Scabourougដែលហ្វីលីពីនបានទាមទារថា ជាដីកោះរបស់ខ្លួន។ ហ្វីលីពីនបានប្រឈមមុខតទល់ខ្លាំងជាមួយចិន នៅក្នុងរយៈពេលពីរឆ្នាំចុងក្រោយនេះ។ ដូច្នេះ គេមិនចាំបាច់ប្លែកចិត្តទេ ហេតុអ្វីបានជប៉ុនខំប្រឹងដុតដៃ ដុតជើងជួយហ្វីលីពីនខ្លាំងម្ល៉េះ នៅក្នុងពេលហ្វីលីពីនជួបរងគ្រោះ ដោយខ្យល់ព្យុះហៃយ៉ាន់កន្លងទៅនោះជប៉ុនខំប្រឹងដុតដៃ ដុតជើងជួយហ្វីលីពីន។ ជប៉ុនបានបញ្ជូនទាហានរាប់រយនាក់ដើម្បីទៅជួយជនរងគ្រោះ ហើយនៅក្នុងជំនួបកំពូលនៅថ្ងៃនេះទៀត ជប៉ុនក៏បានសន្យាផ្តល់ជំនួយប្រមាណ ៩៧លានដុល្លារ ដើម្បីជួយហ្វីលីពីន នៅក្រោយគ្រោះមហន្តរាយ។
នៅលើក្រដាស គឺជាជំនួយគ្មានចំណង។ ប៉ុន្តែ ការជួយជ្រោមជ្រែងរបស់ជប៉ុនមិនមែនធ្វើឡើងដោយគ្មានទិសដៅនោះទេ។ យ៉ាងហោច ជប៉ុនបានអូសទាញហ្វីលីពីន មកជាគ្នីគ្នារបស់ខ្លួន។ ជប៉ុនបានធ្វើនយោបាយបែបនេះជាមួយប្រទេសសមាជិកអាស៊ានដទៃទៀត។ មានន័យថា ប្រទេសជប៉ុន និងអាស៊ាន មិនត្រឹមមានចិន ជាសត្រូវរួមគ្នាតែប៉ុណ្ណោះទេ ប៉ុន្តែ ពួកគេនៅមានចំណងសេដ្ឋកិច្ចដែលមិនអាចមើលរំលងបាន។
កម្ពុជា ឡាវជាមិត្តរបស់មហាចិន
មហិច្ឆតារបស់ជប៉ុន គឺចង់ពង្រឹងមិត្តភាព និងរហូតដល់ចង់ចងសម្ព័ន្ធភាពជាមួយអាស៊ាន ដើម្បីរួមគ្នាតទល់ជាមួយចិន។ ប៉ុន្តែ នៅក្នុងអាស៊ាន មានតែប្រទេសបួនប៉ុណ្ណោះ ដែលមានកំពុងមានជម្លោះដណ្តើមដីកោះ ជាមួយចិន នៅសមុទ្រចិនខាងត្បូង។ ប្រទេសទាំងបួន នោះមានហ្វីលីពីន វៀតណាម ម៉ាឡេស៊ី និងព្រុយណេ។ ប៉ុន្តែ នៅមានប្រទេស៦ទៀត ដែលខ្លះតាំងខ្លួននៅកណ្តាល និងខ្លះទៀត ដូចជាភូមា កម្ពុជា និងឡាវជាដើម ត្រូវគេមើលឃើញថា កំពុងមានទំនាក់ទំនងជិតស្និទជាមួយប្រទេសចិន។ ជំហរនយោបាយមិនដូចគ្នា របស់សមាជិកអាស៊ានចំពោះមហាអំណាចចិន កំពុងបង្កជាឧបសគ្គក្នុងនយោបាយការទូតរបស់ជប៉ុន។
ប៉ុន្តែ យ៉ាងណាក៏ដោយ នៅថ្ងៃនេះ នាយករដ្ឋមន្រ្តី ជប៉ុនបានសម្រេចបញ្ចុះបញ្ចូលសមាជិកអាស៊ាន ឲ្យទទួលស្គាល់ និងគាំទ្រនយោបាយសន្តិសុខរបស់លោក។ នៅក្នុងសេចក្តីប្រកាសរួមមួយ ដែលប្រទេសសមាជិកអាស៊ានទាំង១០បានចុះហត្ថលេខាជាមួយ ជប៉ុន មានឃ្លាមួយដែលសរសេរថា នាយករដ្ឋមន្រ្តីជប៉ុនបានបង្កើតនយោបាយសន្តិសុខមួយ ដែលមានទិសដៅចូលរួមចំណែកក្នុងការរក្សាស្ថិរភាព និងសន្តិភាព នៅក្នុងតំបន់។ គេមិនបានដឹងថា តើនយោបាយសន្តិសុខដែលនាយករដ្ឋមន្រ្តីជប៉ុនបានបង្កើតឡើងសំដៅទៅលើអ្វីឲ្យបា្រកដទេ ប៉ុន្តែ កន្លងមក ចិនតែងតែរិះគន់លោកនាយករដ្ឋមន្រ្តីជប៉ុនថា ជាមនុស្សជាតិនិយម និងមានមហិច្ឆតា ចង់ត្រលប់ទៅបំពាក់អាវុធឲ្យកងទ័ពជប៉ុនចូលធ្វើសង្រ្គាមឡើងវិញ។ នៅក្រោយសង្រ្គាមលោកលើកទីពីរ អាមេរិកបានសរសេររដ្ឋធម្មនុញ្ញមួយឲ្យជប៉ុនដែលបានកំណត់ថា កងទ័ពជប៉ុនមានត្រឹមសិទ្ធិស្វ័យការពារខ្លួន ប៉ុន្តែ មិនអាចបើកការវាយប្រហារទៅលើប្រទេសណាទេ។
ក្រៅតែពីការទទួលស្គាល់នយោបាយសន្តិសុខរបស់ជប៉ុនពី សំណាក់អាស៊ានហើយ ជប៉ុននៅបានរួមគ្នាជាមួយអាស៊ានចេញសេចក្តីប្រកាសរួមមួយ ដែលនៅក្នុងអាស៊ាននិងជប៉ុនបានព្រមព្រៀងធ្វើការជាមួយគ្នាដើម្បីធានាសេរីភាព និងសន្តិសុខនៅក្នុងការហោះហើររបស់អាកាសចរណ៍ស៊ីវិល។ បើទោះបីជាសេចក្តីប្រកាសមិនបាននិយាយចំៗពីតំបន់ការពារដែនអាកាសដែលចិនទើបបង្កើត និងដែលជប៉ុនកំពុងប្រឆាំងតវ៉ា ប៉ុន្តែ វាច្បាស់ណាស់ថា ជប៉ុន និងអាស៊ានកំពុងអំពាវនាវឲ្យប្រទេសចិនគិតគូរមើលច្បាប់របស់ខ្លួនឡើងវិញ។ ចិនផ្ទាល់ធ្លាប់អះអាងចង់បង្កើតតំបន់ការពារដែនអាកាសស្រដៀងគ្នានេះ នៅលើសមុទ្រចិនខាងត្បូង ដែលចិនកំពុងមានជម្លោះជាមួយសមាជិកអាស៊ានខ្លះ។ ជប៉ុនបានជំរុញឲ្យអាស៊ានចេញក្រមប្រតិបត្តិដើម្បីដោះស្រាយជម្លោះជាមួយចិន នៅសមុទ្រចិនខាងត្បូង។
នៅក្នុងសេចក្តីប្រកាសរួមរវាងជប៉ុន និងអាស៊ានក៏មានបញ្ចូលចំណុចឯកភាពគ្នារវាងអាស៊ាន និងជប៉ុនដែលនឹងរួមគ្នាធ្វើការដើម្បីធានាដល់ការគោរពគោលការណ៍ជាសកល និងសន្ធិសញ្ញារបស់អង្គការសហប្រជាជាតិស្តីពីដែនសមុទ្រ ដែលធ្វើឡើង នៅឆ្នាំ ១៩៨២។ យ៉ាងណាក៏ដោយ នៅក្នុងជំនួបកំពូលអាស៊ានជប៉ុន គ្មានថ្នាក់ដឹកនាំរបស់ប្រទេសសមាជិកអាស៊ានណាមួយបានបង្ហើបឈ្មោះ និងទម្លាក់កំហុសទៅលើចិន ដែលបានបង្កើតតំបន់ការពារដែនអាកាសដែលរំលោភទៅលើជប៉ុនដែរ។ បើទោះបីជាឈ្លោះជាមួយចិន ប៉ុន្តែ សមាជិកអាស៊ានទាំងអស់នៅតែមានទំនាក់ទំនងសេដ្ឋកិច្ចជាមួយចិន និងត្រូវការចិនដែលជាមហាអំណាចសេដ្ឋកិច្ចពិភពលោកទីពីរ នាំមុខជប៉ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ