មនុស្ស ៣នាក់ស្លាប់ ដោយសារព្យុះភ្លៀង ក្នុងខេត្តកំពង់ឆ្នាំង
ព្យុះភ្លៀង កាលពីយប់ម្សិលមិញ បានធ្វើឲ្យមនុស្ស ៣នាក់ស្លាប់ និងខូចខាតទ្រព្យសម្បត្តិ អស់មួយចំនួន នៅក្នុងខេត្តកំពង់ឆ្នាំង។ មន្ត្រីប៉ូលីស និយាយថា ខ្យល់ព្យុះបានបោកបក់ ក្នុងកម្រិតខ្លាំងក្លាមួយ ថែមទាំងធ្លាក់ភ្លៀងខ្លាំង ដែលធ្វើឲ្យប្រជាពលរដ្ឋ ស្ទើតែរកកន្លែងសុវត្ថិភាពមិនទាន់។
ចុះផ្សាយនៅថ្ងៃ៖
ស្តាប់ - ០១:៥៦
យ៉ាងហោចមានមនុស្ស៣នាក់ត្រូវបានគេដឹងថាស្លាប់ដោយសារខ្យល់ព្យុះ ដែលនាំមកនូវទឹកភ្លៀងកាលពីយប់ថ្ងៃពុធ ម្សិលមិញ នៅខេត្តកំពង់ឆ្នាំង។
លោក ម៉ៅ សម្បត្តិ មេប៉ូលីសប៉ុស្តិ៍ស្វាយជ្រុំខេត្តកំពង់ឆ្នាំង បានថ្លែងប្រាប់វិទ្យុបារាំង RFI មុននេះបន្តិចថាភ្លៀងខ្យល់មានកំរិតខ្ពស់បានបោកបក់ចំចំនុច ឃុំស្វាយជ្រុំ និងឃុំមួយចំនួនទៀត បណ្តាលឲ្យមនុស្ស២នាក់នៅក្នុងស្រុកស្វាយជ្រុំបានស្លាប់ ក្នុងនោះបុរសវ័យចំណាស់ម្នាក់ស្លាប់ដោយសារ តែមានអារម្មណ៍ភ័យខ្លាចខ្លាំង និងស្ត្រីម្នាក់ទៀតត្រូវពស់ចឹក ខណៈដែលគាត់កំពុងតែលាក់ខ្លួនពីគ្រោះថ្នាក់ធម្មជាតិខ្យល់ព្យុះ។ដោយឡែកមនុស្សម្នាក់ទៀតបានស្លាប់ដោយខ្យល់ព្យុះនៅកន្លែងដទៃនៃខេត្តជាមួយគ្នានេះដែរ។
ក្រៅពីឆក់យកជីវិតមនុស្ស ព្យុះភ្លៀងកំណាច ក៏បានបំផ្លាញផ្ទះសម្បែងប្រជាពលរដ្ឋជាង ១០ខ្នង បែកបាក់ ខូចខាត និងរសាត់ទូក កាណូត អស់ជាច្រើនទៀតផង។ មន្ត្រីគ្រោះមហាន្តរាយថ្នាក់ជាតិនៃប្រទេសកម្ពុជា កំពុងតែស្រង់ទិន្នន័យជាក់លាក់នៃការខូចខាតដោយសារភ្លៀងព្យុះ ដែលកំពុងបន្តមកដល់ថ្ងៃនេះ។
សូមរំលឹកថាកាលពីថ្ងៃទី១ខែវិច្ឆិការកន្លងទៅនេះ ក្រសួងធនធានទឹកនិងឧត្តុនិយមនៃប្រទេសកម្ពុជាបានចេញសេចក្តីជូនដំណឹងពីស្ថានភាពដែលអាចកើតមានអាកាសធាតុមិនល្អនៅតាមបណ្តាខេត្តមួយចំនួន ចាប់ពីថ្ងៃទី០៥ ដល់ថ្ងៃទី០៩ ខែវិច្ឆិការ ដោយសារកម្ពុជាទទួលរងនូវឥទ្ធិពលសម្ពាធទាបជាបន្តបន្ទាប់។ ជាមួយគ្នានេះ ក្រសួងធនធានទឹកក៏បានអំពាវនាវដល់ប្រជាពលរដ្ឋ ឲ្យមានការប្រុងប្រយ័ត្ន ជាពិសេសអ្នកដែលរស់នៅតាមបណ្តាខេត្តមួយចំនួន នៅតាមមាត់សមុទ្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ