ទឹកជំនន់ស្រកនៅតាមព្រំដែនកម្ពុជា តែលិចខ្លាំងនៅតាមផ្លូវជាតិលេខ៥
អំពីគ្រោះទឹកជនន់ ត្រូវបានមន្ត្រីជំនាញលើកឡើងថា ទឹកជំនន់ ដែលបង្កដោយទឹកភ្លៀង នៅតាមបណ្តោយព្រំដែនថៃ ដែលរួមមាន ខេត្តបន្ទាយមានជ័យ ខេត្តប៉ៃលិន និងខេត្តបាត់ដំបង គិតត្រឹមរសៀលថ្ងៃទី៨តុលាម្សិលមិញ បានស្រកចុះហើយ។ ប៉ុន្តែទឹកជំនន់នោះ បានហូរចុះទៅទន្លេសាប បណ្តាលឲ្យភូមិស្រុក នៅតាមផ្លូវជាតិលេខ៥ ក្នុងខេត្តបន្ទាយមានជ័យ បាត់ដំបង និងខេត្តពោធិ៍សាត់ ត្រូវលិចលង់ខ្លាំង គិតរហូតដល់ថ្ងៃទី៩តុលានេះ។
ចុះផ្សាយនៅថ្ងៃ៖ កែប្រែថ្ងៃទី៖
លោក ញឹម វណ្ណដា ទេសរដ្ឋមន្ត្រី និងជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ បានចុះពិនិត្យស្ថានភាពជំនន់ទឹកភ្លៀង នៅតាមបណ្តាខេត្តជាប់ព្រំដែនថៃ នៅខេត្តបន្ទាយមានជ័យ ខេត្តប៉ៃលិន និងខេត្តបាត់ដំបង កាលពីថ្ងៃទី៨តុលា។ លោកបានឲ្យដឹងថា ទឹកជំនន់តាមព្រំដែនថៃ ក្នុងខេត្តទាំងបីនោះ បានស្រកចុះ ដល់កម្រិតដែលលែងក្លាយជាទឹកជំនន់ទៀតហើយ។
លោក ញឹម វណ្ណដា បន្តថា នៅព្រឹកថ្ងៃទី៩ ខែតុលានេះ អាជ្ញាធរគ្រប់ជាន់ថ្នាក់ ដែលដឹកនាំដោយរូបលោក នឹងជួបប្រជុំ នៅខេត្តបាត់ដំបង ដើម្បីបូកសរុប វាយតម្លៃពីផលប៉ះពាល់ និងការខូចខាត ជាជំហានដំបូងដោយគ្រោះទឹកជំនន់ នៅទូទាំងប្រទេស ពិសេសនៅខេត្តជាប់ព្រំដែនថៃ ដែលបង្កឡើងដោយជំនន់ទឹកភ្លៀង។
កិច្ចប្រជុំនោះ មានការចូលរួមពីអាជ្ញាធរខេត្ត ស្រុកក្រុង ឃុំសង្កាត់ ដើម្បីធ្វើការវាយតម្លៃពីផលប៉ះពាល់ដោយទឹកជំនន់។ អំពីផលប៉ះពាល់ និងការខូចខាត ដោយគ្រោះទឹកជំនន់ គិតមកដល់ថ្ងៃទី៨តុលា ត្រូវបានលោក ញឹម វណ្ណដា លើកឡើងថា បានកើនឡើងជាងរបាយការណ៍ កាលពីថ្ងៃទី៧តុលា ទាំងមនុស្ស សត្វ ហេដ្ឋារចនាសម្ព័ន្ធ ក៏ដូចជាការខូចខាតទ្រព្យសម្បត្តិ។
គ្រោះទឹកជំនន់ ក៏កំពុងតែកើតឡើង នៅក្នុងរាជធានីភ្នំពេញ។ តំបន់ជាច្រើន ត្រូវលិចលង់ ដោយសារតែភ្លៀងមួយមេ កាលពីរសៀលថ្ងៃទី៨តុលា បន្តរហូតដល់យប់។ ផ្លូវ និងផ្ទះជាច្រើន ត្រូវលិចទឹក ដោយសារតែគ្មានកន្លែងស្តុកទឹក ដែលត្រូវហូរ។ ក្រៅពីទឹកលិច ចរាចរណ៍តាមដងផ្លូវស្ទើរតែទាំងអស់ នៅភ្នំពេញ ត្រូវកកស្ទះរាប់ម៉ោង កាលពីព្រលប់ថ្ងៃអង្គារ ទី៨តុលាម្សិលមិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ