កម្មកររោងចក្រហ៊ុយចៀន ដាក់ញត្តិជាលើកទី៤ នៅរដ្ឋសភា
កម្មករោងចក្រហ៊ុយចៀន រាប់រយនាក់បានមកប្រមូលផ្តុំគ្នានៅខាងមុខរដ្ឋសភាម្តងទៀតនាព្រឹកថ្ងៃចន្ទ ទី១៧វិច្ឆិកា ដើម្បីអោយរដ្ឋសភាពន្លឿនដំណោះស្រាយវិវាទរបស់កម្មករដែលអូសបន្លាយជិត២ខែមកហើយ និង ស្នើ សុំថវិកាជាតិដើម្បីទូទាត់ប្រាក់អតីតភាពជូនកម្មករ។ មេដឹកនាំសម្ពន្ធ័ សហជីពជាតិ ថ្លែងថាការដាក់ញត្តិលើកនេះបានធ្វើឡើងបន្ទាប់ពីការស្នើអន្តរាគមន៍ចំនួនបីលើកមកហើយមិនទទួលបានលទ្ធផលអ្វីទាំងអស់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
បើទោះបីជាមានការយកចិត្តទុកដាក់ពីក្រសួងការងារ និង តំណាងរាស្ត្រនៃបក្សទាំងពីរក្តី បញ្ហាវិវាទរបស់កម្មករោងចក្រហ៊ុយចៀននៅតែគ្មានលទ្ធផលអ្វីសោះ ដែលបណ្តាលអោយកម្មកររាប់រយនាក់ត្រលប់មកដាក់ញត្តិជាថ្មីទៀតនៅរដ្ឋសភា។
លោក ហ្វា សាលី ប្រធានសម្ពន្ធ័ សហជីពជាតិ បានអោយដឹងថានាព្រឹកនេះលោកបានដឹកនាំកម្មករ ដើម្បីដាក់ញត្តិជូនគណកម្មការទី៨ នៃរដ្ឋសភា ហើយនេះគឺជាលើកទី៤ហើយដែលពួកលោកមកកាន់រដ្ឋសភាដើម្បីរកដំណោះស្រាយ។
លោក ហ្វា សាលី បានបញ្ជាក់ថា កន្លងមកថ្មីៗនេះតំណាងរាស្ត្រទាំងពីរគណបក្សបានចូលទៅដោះស្រាយដល់រោងចក្រ ប៉ុន្តែថៅកែរោងចក្រ ដែលលោកអះអាងថាគ្មានខ្លាចញញើតព្រោះតែអាងថាខ្លួនជាសមាជិក្រុមប្រឹក្សាភិបាលសមាគមកាត់ដេរនោះ បានប្រើល្បិចកលភូតភរកុហកទាំងកម្មករទាំងតំណាងរាស្ត្រ។ លោកបានបន្ថែមថាទៀតថា ក្រសួងការងារក៏បានប្រឹងប្រែងលូកដៃចូលដោះស្រាយវិវាទរបស់ក្រុមកម្មករដែរ តែយ៉ាងណាក៏ដោយ គ្មានឃើញលទ្ធផលនោះទេ។
លោក ហ្វា សាលី អះអាងថាប្រសិនបើនៅតែគ្មានលទ្ធផល រយៈពេល៥ថ្ងៃទៀត លោកនឹងទៅតវ៉ានៅខាងមុខខុទ្ទកាលយ័លោកនាយករដ្ឋមន្ត្រីហ៊ុន សែន ដើម្បីអោយលោកនាយករដ្ឋមន្ត្រីបានដឹងថា មន្ត្រីក្រោមឱវាទគ្មានសមត្ថភាពដោះស្រាយបញ្ហាជូនកម្មករ។
បញ្ហាវិវាទនៅរោងចក្រហ៊ុយចៀននេះ បានបណ្តាលអោយស្ត្រីកម្មករម្នាក់ស្លាប់កាលពីថ្ងៃ២៧ តុលារ ដោយសារតែគ្មានប្រាក់សម្រាលកូន។ នេះបើតាមការអះអាងរបស់ប្រធានសម្ពន្ធ័សហជីពជាតិរូបនេះ។ ក្រៅពីនេះលោកអោងដឹងទៀតថាកម្មករ១ពាន់២រយនាក់កំពុងតែដាច់បាយ ខ្វះប្រាក់ដើម្បីផ្គត់ផ្គង់ជីវភាព។
សូមបញ្ជាក់ថា កម្មករនៅរោងចក្រ ហ៊ុយ ចៀន ដែលមានទីតាំងនៅ ខណ្ឌមានជ័យ បានទាមទារអោយរោងចក្របើកប្រាក់អតីតភាពអោយពួកគេ បន្ទាប់ពីរោងចក្រហ៊ុយចៀននេះបានដូរឈ្មោះទៅជារោងចក្រ ចៀន ឡឹ។ក្នុងអំឡុងពេល២ខែមកនេះ ពួកគេបានទៅតវ៉ាបិទផ្លូវនៅមុខរោចក្រ និង បានទៅរកដំណោះស្រាយពីរដ្ឋសភា។ បន្ថែមលើនេះ លោកអ៊ិត សំហេង រដ្ឋមន្ត្រីក្រសួងការងារកាលពីដើមខែតុលាក៏បានសន្យារកដំណោះស្រាយអោយបានឆាប់ជូនដល់កម្មករដែរ តែរហូតមកដល់ពេលនេះនៅតែគ្មានលទ្ធផល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ