មេធាវី លោក កឹម សុខា៖ តួនាទីប្រធានស្តីទីCNRP របស់លោក សម រង្ស៊ី មិនអាចយកជាការបានទេ
ភ្លាមៗក្រោយពី លោក សម រង្ស៊ី ប្រកាសថា លោកត្រូវបានបញ្ជាក់ជាប្រធានស្តីទីគណបក្សសង្គ្រោះជាតិម្សិលមិញនោះ មេធាវីម្នាក់ដែលការពារក្តីឲ្យ លោក កឹម សុខា បានចេញមុខបដិេសធចោលនូវតួនាទីនេះ។ លោកមេធាវី ចាន់ ចេន បានអះអាងតាមហ្វេសប៊ុកនៅថ្ងៃពុធនេះថា ការជ្រើសតាំងឬតែងតាំង លោក សម រង្សី ជាប្រធានស្តីទីគណបក្សសង្គ្រោះជាតិនេះ នៅតែមិនអាចយកជាការបាន ដោយថា សហគមន៍ជាតិ និងអន្តរជាតិមិនទទួលស្គាល់ដដែល។
ចុះផ្សាយនៅថ្ងៃ៖
ស្តាប់ - ០២:០១
«មិនយកជាការបាននិងមិនទទួលស្គាល់ព្រោះ៖១ ខុសគោលការណ៍របស់ cnrp ដោយមិន មានឯកភាព និងមិនមានការចូលរួមពីភាគី ម្ខាងទៀត។ រៀបចំធ្វើនិងសម្រេចតែភាគីម្ខាង។២ បើយល់ថា cnrpមិនរលាយត្រូវតែធ្វើឬ សម្រេចជ្រើសរើសថ្នាក់ដឹកនាំបក្សឲ្យស្របតាមលក្ខន្តិកៈ។ ៣ បើយល់ថាcnrpរលាយឬជាប់គាំងហើយ ក៏មិនមានប្រធានស្តីទីcnrpដែរ។ ពួកគេអាចតែងតាំង លោក សម រង្សី ជាប្រធានក្រុមគេមួយក្រុមនោះបាន មិនអាចជាតំណាងឲ្យcnrpទាំងមូលបានឡើយ»។ ទាំងនេះគឺជាហេតុផលដែល លោក ចាន់ ចេន សហមេធាវីការពារក្តី លោក កឹម សុខា បានសរសេរលើហ្វេសប៊ុករបស់លោកព្រឹកថ្ងៃពុធនេះ។
ការចេញមុខបដិសេធនេះ ធ្វើឡើងបន្ទាប់ពី លោក សម រង្ស៊ី កាលពីអង្គារ បានប្រកាសថាលោកត្រូវបានបញ្ជាក់ជាប្រធានស្តីទីគណបក្សសង្គ្រោះជាតិជាផ្លូវការ។
ការបញ្ជាក់ជាថ្មីរបស់ លោក សម រង្ស៊ី ដើម្បីជៀសវាង មិនឲ្យក្បាលម៉ាស៊ីនគណបក្សសង្គ្រោះជាតិ មានការជាប់គាំង ក្រោយពី គណបក្សនេះត្រូវបានរំលាយ ដោយអាជ្ញាធរទីក្រុងភ្នំពេញ ហើយក្រោយពី លោក កឹម សុខា ត្រូវបានគេចាប់ឃុំឃាំង។ នេះបើតាម លោក សម រង្ស៊ី។
បើតាម លោក សម រង្ស៊ី ការដែលលោកទទួលយកតួនាទីជាប្រធានស្តីទីគណបក្សសង្រ្គោះជាតិ គឺធ្វើឡើងតាម មតិភាគច្រើន នៃមន្ត្រី និងសកម្មជនគណបក្ស ដែលអាចទាក់ទងបាន ហើយដែលហ៊ានបញ្ចេញយោបល់របស់ខ្លួនជាសាធារណៈ។
យ៉ាងណាក៏ដោយ សម្រាប់ លោក ចាន់ ចេន មេធាវីម្នាក់ការពារក្តីឲ្យ លោក កឹម សុខា បានលើកឡើងថា «ទោះបី លោក សម រង្ស៊ី និងក្រុមគាត់ ខិតខំឆ្លេឆ្លា បកស្រាយ ម្តងសន្និសីទ ម្តងវេទិកា ម្តងរត់ទៅរកគណកម្មការចំពោះកិច្ច ម្តងរត់ទៅរកគណកម្មាធិការអចិន្ត្រៃយ៍ ម្តងរត់រកអនុប្រធានពីរនាក់ជួយបញ្ជាក់ យ៉ាងណាក៏ដោយ ក៏តួនាទីជាប្រធានស្តីទី cnrpរបស់ លោក សម រង្សី នៅតែមិនអាចយកជាការបានឡើយ។
ប៉ុន្តែ លោក សម រង្ស៊ី បានអះអាងថា លោកនឹងបំពេញតួនាទី ជាប្រធានស្តីទីនេះ ក្នុងរយៈពេលបណ្តោះអាសន្ន រហូតដល់ថ្ងៃដែល លោក កឹម សុខា ទទួលបានសេរីភាពពេញលេញវិញ ហើយអាចសម្តែងមតិរបស់លោកជាសាធារណៈដោយខ្លួនឯង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ