គណបក្សអំណាចខ្មែរប្រកាសមិនចូលរួមបោះឆ្នោតនៅខែកក្កដា
គណបក្សអំណាចខ្មែរ បានប្រកាសថា នឹងមិនចូលរួមបោះឆ្នោតថ្នាក់ជាតិនៅខែកក្កដាខាងមុខនេះទេ។ ការបដិសេធមិនចូលរួមបោះឆ្នោត ដោយគណបក្សអំណាចខ្មែរ អះអាងថា មកពី គ្មានអាជ្ញាកណ្តាលឯករាជ្យ និងការធ្វើវិសោធនកម្មច្បាប់ដកហូតអាសនៈរបស់បក្សជាប់ឆ្នោតដែលផ្ទុយនឹងឆន្ទៈប្រជាពលរដ្ឋ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៨
នៅក្នុងសេចក្តីថ្លែងការណ៍របស់ខ្លួន ថ្ងៃទី២៧ខែមេសានេះ គណបក្សអំណាចខ្មែរ បានអះអាងថា មនុស្សជំនាន់ថ្មីដែលដឹកនាំគណបក្សនេះ មិនចូលរួមការបោះឆ្នោតជាដាច់ខាត ដោយថាការបោះឆ្នោតមានតែអាជ្ញាកណ្តាលមិនឯករាជ្យ។ គណបក្សដឹកនាំដោយប្រធានថ្មី គឺលោក សួង សោភ័ណ្ឌ ដែលឡើងជំនួស លោក សួន សេរីរដ្ឋា ដែលកំពុងជាប់ពន្ធនាគារនោះ បានអះអាងទៀតថា គណបក្សអំណាចខ្មែរ មិនធ្វើនយោបាយតាមការបង្គាប់បញ្ជា ចូលរួមបំពេញភាពស្របច្បាប់ តាមបំណងគណបក្សណាមួយឡើយ។
លោក យិន ឈឿន អ្នកនាំពាក្យគណបក្សអំណាចខ្មែរ បានប្រាប់វិទ្យុបារាំងអន្តរជាតិ RFI ថា ការដែលលោក សួន សេរីរដ្ឋា ត្រូវជាប់ពន្ធនាគារហើយលាលែង ពីគណបក្សនេះ គឺមិនមែនជាមូលេហតុដែលនាំគណបក្សអំណាចខ្មែរ បដិសេធការចូលរួមបោះឆ្នោតជ្រើសរើសតំណាងរាស្ត្រនោះឡើយ។ ហើយថា បើចូលរួមបោះឆ្នោតក្នុងកាលៈទេសៈបែបនេះ គឺលទ្ធផលគ្រាន់តែកំដរឆាកឲ្យគណបក្សកាន់អំណាចតែប៉ុណ្ណោះ។ នេះជាបញ្ជាក់បន្ថែមរបស់ លោក យិន ឈឿន។
សូមជម្រាបជូនថា រហូតមកទល់ពេលនេះ គេនៅមិនទាន់ដឹងនៅឡើយ ថាតើមានគណបក្សនយោបាយសរុបចំនួនប៉ុន្មានចូលរួមការបោះឆ្នោតជាតិនាពេលខាងមុខ។ គណៈកម្មាធិការជាតិរៀបចំការបោះឆ្នោត នឹងចាប់ផ្ដើមចុះបញ្ជីគណបក្សនយោបាយនិងបញ្ជីបេក្ខជនឈរឈ្មោះសម្រាប់ចូលរួមការបោះឆ្នោតជ្រើសតាំងតំណាងរាស្រ្ត នីតិកាលទី៦ ឆ្នាំ២០១៨ ចាប់ពីថ្ងៃទី៣០ ខែមេសា ដល់ថ្ងៃទី១៤ ខែឧសភាខាងមុខ។ ប៉ុន្តែ គ.ជ.ប ឲ្យដឹងថា មានគណបក្សនយោបាយចំនួន៣៧ ត្រូវបានក្រសួងមហាផ្ទៃទទួលស្គាល់ថាស្របច្បាប់ ខណៈគណបក្សចំនួន៦៧ត្រូវបានលុបឈ្មោះចោល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ