បក្សនយោបាយ៤ក្នុងចំណោម១១នឹងចូលរួមបោះឆ្នោតព្រឹទ្ធសភានៅដើមឆ្នាំក្រោយ
គណៈកម្មាធិការជាតិរៀបចំការបោះឆ្នោត(គ.ជ.ប)បានប្រកាសទទួលស្គាល់ជាផ្លូវការ នូវបញ្ជីបេក្ខជនឈរឈ្មោះបោះឆ្នោតរបស់គណបក្សនយោបាយចំនួន៤សម្រាប់ការបោះឆ្នោតជ្រើសតាំងសមាជិកព្រឹទ្ធសភានីតិកាលទី៤ឆ្នាំ២០១៨។ ការទទួលស្គាល់នេះធ្វើឡើងបន្ទាប់ពីគ.ជ.ប បានបញ្ចប់ដំណើរការចុះបញ្ជីគណបក្សនយោបាយឈរឈ្មោះបោះឆ្នោត និងបេក្ខជនឈរឈ្មោះបោះឆ្នោតព្រឹទ្ធសភា កាលពីថ្ងៃទី១២ ខែធ្នូ ។
ចុះផ្សាយនៅថ្ងៃ៖
គណបក្សនយោបាយទាំង៤ដែល គ.ជ.ប បានប្រកាសទទួលស្គាល់នេះរួមមាន គណបក្សប្រជាជន គណបក្សហ៊្វុនស៊ិនប៉ិច គណបក្សខ្មែររួបរួមជាតិ និងគណបក្សយុវជនកម្ពុជា។ បើតាមគ.ជ.ប គណបក្សប្រជាជន និងគណបក្សហ្វ៊ុនស៊ិនប៉ិចសុទ្ធតែបានចុះបញ្ជីបេក្ខជនឈរឈ្មោះបានគ្រប់មណ្ឌលភូមិភាគចំនួន៨ ដោយមានបេក្ខជនចំនួន១១៦រូបដូចគ្នា។ រីឯគណបក្សយុវជនកម្ពុជា បានចុះបញ្ជីបេក្ខជនឈរឈ្មោះចំនួន៤ភូមិភាគ មានបេក្ខជនឈរឈ្មោះចំនួន៣៨រូប។ ចំណែកគណបក្សខ្មែររួបរួមជាតិវិញ បានចុះបញ្ជីបេក្ខជនឈរឈ្មោះចំនួន៧ភូមិភាគ ដោយភូមិ៥ អត់ឈរឈ្មោះទេ តែមានបេក្ខជនឈរឈ្មោះចំនួន១០២រូប។
គណៈកម្មាធិការជាតិរៀបចំការបោះឆ្នោត(គ.ជ.ប) បានបញ្ជាក់ឲ្យដឹងដែរថា ក្រោយពីផ្ដល់សុពលភាពរួចហើយ គ.ជ.ប នឹងចាប់ផ្ដើមបិទផ្សាយបញ្ជីគណបក្សនយោបាយឈរឈ្មោះបោះឆ្នោត និងបេក្ខជនឈរឈ្មោះ នៅថ្ងៃទី២៣ ខែមករា ឆ្នាំ២០១៨ ឬថ្ងៃចុងក្រោយ ដើម្បីឲ្យអង្គបោះឆ្នោត ដែលជាសមាជិកក្រុមប្រឹក្សាឃុំសង្កាត់ក្នុងអាណត្តិ និងតំណាងរាស្រ្ត ក្នុងអាណត្តិ ពិនិត្យផ្ទៀងផ្ទាត់។
សូមបញ្ជាក់ថា គណបក្សនយោបាយដែលអាចដាក់បេក្ខជនឈរឈ្មោះសម្រាប់បោះឆ្នោតព្រឹទ្ធសភាខាងមុខនេះ មានចំនួន១១បក្ស ខណៈគណបក្សសង្រ្គោះជាតិត្រូវតុលាការកំពូលរំលាយចោល។ ប៉ុន្តែមានគណបក្សតែ៤ប៉ុណ្ណោះដែលត្រូវបានគ.ជ.បប្រកាសទទួលស្គាល់។ បើតាមលោកសោម សូរីដា ដែលជាអគ្គលេខាធិការរង គ.ជ.ប នេះគឺដោយសារតែគណបក្សនយោបាយចំនួន៧ទៀត មិនបានដាក់បញ្ជីឈ្មោះបេក្ខជនមកដាក់គ.ជ.ប។ សម្រាប់លោកសោម សូរីដា នេះ គឺជាសិទ្ធិរបស់គណបក្សទាំងនោះចំពោះការឈរឈ្មោះ ឬមិនឈរឈ្មោះ។
គួរជម្រាបជូនថា ការបោះឆ្នោតជ្រើសរើសសមាជិកព្រឹទ្ធសភា នីតិកាលទី៤ នឹងធ្វើឡើងនៅថ្ងៃអាទិត្យ ទី២៥ ខែកុម្ភៈ ឆ្នាំ២០១៨ខាងមុខ។ ការបោះឆ្នោតនេះ គឺធ្វើឡើងដោយអសកល មានន័យថា មានតែតំណាងរាស្រ្ត និងសមាជិកក្រុមប្រឹក្សាឃុំសង្កាត់ ក្នុងតំណែងប៉ុណ្ណោះ មានសិទ្ធិទៅបោះឆ្នោត។ សម្រាប់ការបោះឆ្នោតព្រឹទ្ធសភា អាណត្តិទី៤នេះ គណៈកម្មការធិការជាតិរៀបចំការបោះឆ្នោត(គ.ជ.ប) គ្រោងប្រើប្រាស់ថវិកា ២លានដុល្លារអាមេរិក ដើម្បីរៀបចំដំណើរការបោះឆ្នោត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ