ក្រោយចាប់ខ្លួនលោក ឈឹម ពិសិដ្ឋ ACU ប្រាប់មន្ដ្រីក្រុមប្រឹក្សាអភិវឌ្ឍកម្ពុជាឲ្យបំពេញភារកិច្ចឲ្យបានត្រឹមត្រូវ
លោក ឈឹម ពិសិដ្ឋ ដែលជាជំនួយការអគ្គលេខាធិការរងនៅក្រុមប្រឹក្សាអភិវឌ្ឍកម្ពុជា CDC បានបង្កការលំបាកដល់អ្នកវិនិយោគជាតិនិងអន្ដរជាតិ ក្នុងបំណងទាមទារប្រាក់បន្ថែមពីការផ្ដល់សេវានានា។ នេះគឺជាការបំភ្លឺរបស់អង្គភាពប្រឆាំងអំពើពុករលួយ បន្ទាប់ពីអង្គភាពនេះបានចាប់ខ្លួនលោក ឈឹម ពិសិដ្ឋ នៅថ្ងៃទី២០មេសា និងបញ្ជូនទៅកាន់តុលាការពីបទពុករលួយ។ នៅក្នុងសេចក្ដីប្រកាសព័ត៌មានរបស់ខ្លួននៅថ្ងៃសៅរ៍នេះ អង្គភាពប្រឆាំងអំពើពុករលួយ ACU បានអំពាវនាវឲ្យមន្ដ្រីក្រុមប្រឹក្សាអភិវឌ្ឍកម្ពុជា និងមន្ដ្រីរាជការសាធារណៈជាទូទៅ បំពេញភារកិច្ចឲ្យបានត្រឹមត្រូវ។
ចុះផ្សាយនៅថ្ងៃ៖
ការចាប់ខ្លួនលោក ឈឹម ពិសិដ្ឋ ធ្វើឡើងបន្ទាប់ពីអង្គភាពប្រឆាំងអំពើពុករលួយបានទទួលព័ត៌មានជាបន្តបន្ទាប់ថា មន្ដ្រីនៅក្រុមប្រឹក្សាអភិវឌ្ឍកម្ពុជា CDC បានបង្កការលំបាកដល់អ្នកវិនិយោគ ក្នុងបំណងទាមទារឬទទួលប្រាក់បន្ថែមពីការផ្ដល់សេវា។ បើតាម ACU លោក ឈឹម ពិសិដ្ឋ គឺជាមន្ដ្រីម្នាក់ក្នុងចំណោមនោះ ដែលទាល់តែទទួលបានប្រាក់ ទើបឯកសារត្រូវទទួលស្គាល់ថាត្រឹមត្រូវនិងបោះត្រាឲ្យភ្លាម។ បើពុំដូច្នោះទេ ឯកសារនានានឹងត្រូវលោក ឈឹម ពិសិដ្ឋ បដិសេធខុសនេះខុសនោះមិនចេះចប់។
លោក ឈឹម ពិសិដ្ឋ ដែលជាជំនួយការអគ្គលេខាធិការរងនៅ CDC ត្រូវបាន ACU ហៅទៅសាកសួរពាក់ព័ន្ធនឹងអំពើពុករលួយកាលពីថ្ងៃព្រហស្បតិ៍ ទី២០មេសា។ ក្រោយការសាកសួរអស់រយៈពេល៤៨ម៉ោង ACU សម្រេចឃាត់ខ្លួន និងបញ្ជូនទៅកាន់តុលាការតែម្ដង។
គួរជម្រាបជូនថា ការទាមទារប្រាក់ក្នុងនាមជាមន្ដ្រីសាធារណៈ ត្រូវបានហាមឃាត់ដោយច្បាប់។ សម្រាប់អង្គភាពប្រឆាំងអំពើពុករលួយ សកម្មភាពរបស់លោក ឈឹម ពិសិដ្ឋ ដូច្នេះ មិនត្រឹមតែបានធ្វើឲ្យប៉ះពាល់ដល់កិត្តិយសរបស់ស្ថាប័នជាតិ និងមន្ដ្រីសាធារណៈដទៃទៀតទេ វាក៏បានធ្វើឲ្យប៉ះពាល់ធ្ងន់ធ្ងរដល់ជំនឿទុកចិត្តរបស់ប្រជាជន និងអ្នកវិនិយោគ ទៅលើការដឹកនាំរបស់រាជរដ្ឋាភិបាលទៀតផង។
នៅក្នុងសេចក្ដីប្រកាសព័ត៌មានរបស់ខ្លួននៅថ្ងៃសៅរ៍នេះ អង្គភាពប្រឆាំងអំពើពុករលួយ ACU បានអំពាវនាវឲ្យមន្ដ្រីរាជការសាធារណៈ ពិសេសមន្ដ្រីក្រុមប្រឹក្សាអភិវឌ្ឍកម្ពុជា CDC បំពេញភារកិច្ចឲ្យបានត្រឹមត្រូវ ពិសេសត្រូវស្ដាប់តាមការអប់រំណែនាំរបស់ប្រធានស្ថាប័ន CDC។ ប្រធានស្ថាប័ន CDC លោក សុខ ចិន្តាសោភា ដែល ACU អះអាងថា តែងតែអប់រំណែនាំ និងព្រមានដល់មន្ដ្រីថ្នាក់ក្រោម កុំឲ្យប្រព្រឹត្តិអំពើផ្ទុយនឹងច្បាប់ ឬបង្កការលំបាកដល់អ្នកវិនិយោគ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ