កម្ពុជាតវ៉ាទៅតុលាការឡាអេរឿងសកម្មភាពយោធាថៃនៅព្រះវិហារ
នៅថ្ងៃពុធនេះ រដ្ឋាភិបាលកម្ពុជាបានធ្វើកំណត់ទូតផ្ញើទៅរដ្ឋាភិបាលថៃប្រឆាំងនឹងសកម្មភាពយោធាថៃនៅក្នុងតំបន់ប្រាសាទព្រះវិហារ។ ក្នុងពេលជាមួយគ្នានេះ កម្ពុជាក៏បានជូនដំណឹងទៅតុលាការយុត្តិធម៌អន្តរជាតិផងដែរ អំពីសកម្មភាពយោធាថៃ ដែលដាក់រាយបន្លាលួសនៅក្បែរប្រាសាទព្រះវិហារ ពោលគឺ នៅក្នុងតំបន់ដែលត្រូវគ្មានកងទ័ពបណ្តោះអាសន្នដែលកំណត់ដោយដីកាបង្គាប់របស់តុលាការឡាអេ ថ្ងៃទី១៨កក្កដា២០១១។
ចុះផ្សាយនៅថ្ងៃ៖
ស្តាប់ - ០១:៤៥
នៅថ្ងៃពុធទី៤កក្កដានេះ ប្រមុខការទូតកម្ពុជា លោកឧបនាយករដ្ឋមន្ត្រីហោ ណាំហុង បានផ្ញើលិខិតមួយទៅក្រឡាបញ្ជីនៃតុលាការយុត្តិធម៌អន្តរជាតិទីក្រុងឡាអេ ដោយមានរៀបរាប់អំពីសកម្មភាពរបស់យោធាថៃនៅក្បែរព្រំដែនប្រាសាទព្រះវិហារ។ សម្រាប់កម្ពុជា សកម្មភាពយោធាថៃដែលបានដាក់រាយបន្លាលួសជាច្រើនលើកនៅក្នុងតំបន់មួយចំនួននៅភាគខាងជើងជណ្តើរដែក ច្រកចូលប្រាសាទព្រះវិហារនោះ គឺជាសកម្មភាពរំលោភលើដីកាបង្គាប់របស់តុលាការឡាអេ ថ្ងៃទី១៨កក្កដាឆ្នាំ២០១១។
រដ្ឋមន្ត្រីក្រសួងការបរទេសកម្ពុជា លោកហោ ណាំហុង បានស្នើអោយលោកក្រឡាបញ្ជីរូបនេះ នាំយករបាយការណ៍ស្តីពីសកម្មភាពរបស់យោធាថៃទៅប្រាប់ក្រុមប្រឹក្សាចៅក្រមនៃតុលាការយុត្តិធម៌អន្តរជាតិ។
តាមពិត នៅថ្ងៃនេះដូចគ្នា រដ្ឋមន្ត្រីការបរទេសកម្ពុជាក៏បានធ្វើកំណត់ទូតផ្ញើទៅរដ្ឋាភិបាលទីក្រុងបាងកកផងដែរ ដើម្បីប្រឆាំងនឹងសកម្មភាពរបស់ទាហានឈុតខ្មៅថៃនៅព្រំដែនប្រាសាទព្រះវិហារនេះ។
នៅក្នុងកំណត់ទូតនោះ កម្ពុជាបានបង្ហាញរបាយការណ៍លម្អិតទៅរដ្ឋាភិបាលថៃ អំពីពេលវេលា ទីកន្លែង និងសកម្មភាពរបស់យោធាឈុតខ្មៅថៃ។ ហើយបើយោងតាមរបាយការណ៍នោះ យ៉ាងហោចណាស់ យោធាថៃបានធ្វើសកម្មភាពដាក់រាយបន្លាលួស៥ដងដែរ ដោយគិតចាប់ពីថ្ងៃទី២៣មិថុនាមក។
ដោយអត្ថាធិប្បាយប្រាប់រដ្ឋាភិបាលថៃផង និងប្រាប់ទៅតុលាការទីក្រុងឡាអេផង កម្ពុជាបានចាត់ទុកសកម្មភាពរបស់យោធាថៃថា ជាការរំលោភលើដីការបស់តុលាការឡាអេ ហើយថា វាក៏ជាសកម្មភាពដែលអាចបង្កអោយមានភាពតានតឹងនៅក្នុងតំបន់ដែលត្រូវគ្មានកងទ័ពបណ្តោះអាសន្ន។ កម្ពុជាបានស្នើអោយរដ្ឋាភិបាលថៃចាត់វិធានការបញ្ឈប់សកម្មភាពរបស់យោធាថៃ ដើម្បីចៀសវាងបង្កបរិយាកាសអវិជ្ជមានសម្រាប់អនុវត្តដីកាបង្គាប់របស់តុលាការឡាអេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ