សំណុំរឿងព្រះវិហារ៖ តុលាការក្រុងឡាអេនឹងបើកសវនាការនៅខែមេសា២០១៣
តុលាការយុត្តិធម៌អន្តរជាតិ (តុលាការក្រុងឡាអេ) បានចេញសេចក្តីប្រកាស កាលពីថ្ងៃព្រហស្បតិ៍ ម្សិលមិញ បញ្ជាក់អំពីកាលបរិច្ឆេទបើកសវនាការជំនុំជម្រះលើបណ្តឹងរបស់កម្ពុជា ដែលទាមទារឲ្យបកស្រាយសាលក្រម ឆ្នាំ១៩៦២ ស្តីពីសំណុំរឿងព្រះវិហារ។
ចុះផ្សាយនៅថ្ងៃ៖
នៅក្នុងសេចក្តីប្រកាសព័ត៌មាននេះ តុលាការក្រុងឡាអេបានបញ្ជាក់ថា នៅក្នុងសវនាការ ដែលនឹងបើកធ្វើ នៅទីស្នាក់ការរបស់តុលាការ (វិមានសន្តិភាព ក្រុងឡាអេ ប្រទេសហូឡង់) ពីថ្ងៃទី១៥ ដល់ថ្ងៃទី១៩ មេសា ឆ្នាំ២០១៣ខាងមុខនេះ ភាគីកម្ពុជា ដែលជាដើមបណ្តឹង និងភាគីថៃ ដែលជាចុងចម្លើយ នឹងត្រូវឡើងថ្លែងការពារខ្លួនម្នាក់ម្តង ហើយការឆ្លើយការពារខ្លួនដោយផ្ទាល់មាត់នេះ នឹងត្រូវធ្វើឡើងជាពីរជុំ។
ការឆ្លើយបំភ្លឺផ្ទាល់មាត់ជុំទីមួយ
- ថ្ងៃចន្ទ ១៥ មេសា៖ ភាគីកម្ពុជា (ពេញមួយថ្ងៃ)
- ថ្ងៃពុធ ១៧ មេសា៖ ភាគីថៃ (ពេញមួយថ្ងៃ)
ការឆ្លើយបំភ្លឺផ្ទាល់មាត់ជុំទីពីរ
- ថ្ងៃព្រហស្បតិ៍ ១៨ មេសា៖ ភាគីកម្ពុជា (ម៉ោង ៣ ដល់ម៉ោង ៥រសៀល)
- ថ្ងៃសុក្រ ១៩ មេសា៖ ភាគីថៃ (ម៉ោង ៣ ដល់ម៉ោង ៥រសៀល)
តុលាការក្រុងឡាអេក៏បានបញ្ជាក់ផងដែរថា ភាគីកម្ពុជា និងថៃ សុទ្ធតែបានបញ្ជូនសារណាជាលាយលក្ខណ៍អក្សរ ការពារជំហររៀងៗខ្លួន ទៅតាមកាលបរិច្ឆេទ ដែលបានកំណត់រួចរាល់អស់ហើយ។ នៅក្នុងសវនាការ ខែមេសា ខាងមុខនេះ គឺជាការឆ្លើយបំភ្លឺដោយផ្ទាល់មាត់សុទ្ធសាធ។ ទោះជាយ៉ាងណា នៅក្នុងសេចក្តីប្រកាសព័ត៌មាន កាលពីថ្ងៃព្រហស្បតិ៍ ម្សិលមិញនេះ តុលាការក្រុងឡាអេមិនបានបញ្ជាក់ថា នៅក្រោយពីការឆ្លើយបំភ្លឺដោយផ្ទាល់មាត់ ពីគូភាគី នៅខែមេសានេះ ចៅក្រមនឹងចេញសេចក្តីសម្រេចនៅពេលណានោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ