អគ្គស្នងការនគរបាលជាតិ ប្រាប់ក្រុមហ៊ុនទូរសព្ទឲ្យបិទសេវា និងបញ្ឈប់ការចែកចាយ ស៊ីមកាតដែលគ្មានអត្តសញ្ញាណប័ណ្ណ
អគ្គស្នងការនគរបាលជាតិ បានប្រកាសប្រាប់ក្រុមហ៊ុនប្រតិបត្តិករទូរគមនាគមន៍ សាខាលក់ និងចែកចាយលក់ស៊ីមកាតគ្រប់ប្រព័ន្ធ ត្រូវបញ្ឈប់ការចែកចាយលក់ស៊ីមកាត ដែលគ្មានអត្តសញ្ញាណប័ណ្ណ នៅក្នុងរយៈពេល២សប្ដាហ៍។ ការប្រកាសនេះ ធ្វើឡើងនៅក្នុងកិច្ចប្រជុំជាមួយតំណាងក្រុមហ៊ុនទូរសព្ទចល័ត និងអចល័ត ព្រមទាំងតំណាងប្រតិបត្តិករចែកចាយលក់ស៊ីមកាតទាំងអស់ នៅព្រឹកថ្ងៃទី២៦មិថុនាម្សិលមិញ។
ចុះផ្សាយនៅថ្ងៃ៖
ស្តាប់ - ០១:៥១
ក្រុមហ៊ុនប្រតិបត្តិករទូរគមនាគមន៍ សាខាលក់ និងចែកចាយលក់ស៊ីមកាតគ្រប់ប្រព័ន្ធទាំងអស់ មានពេលពីរសប្ដាហ៍ ដើម្បីបញ្ឈប់ការចែកចាយលក់ស៊ីមកាត ដែលគ្មានអត្តសញ្ញាណប័ណ្ណ។ នេះជាការប្រកាសរបស់លោកឧត្តមសេនីយ៍ឯក ឆៃ ស៊ីណារិទ្ធ អគ្គស្នងការរងនគរបាលជាតិ នៅក្នុងកិច្ចប្រជុំមួយ ជាមួយតំណាងក្រុមហ៊ុនទូរសព្ទចល័ត និងអចល័ត ព្រមទាំងតំណាងប្រតិបត្តិករចែកចាយស៊ីមកាត នៅព្រឹកថ្ងៃព្រហស្បតិ៍ ទី២៦មិថុនា។
លោកឆៃ ស៊ីណារិទ្ធ បានគូសបញ្ជាក់បន្ថែមទៀតថា ចំពោះស៊ីមកាតដែលលក់ ឬចែកទៅហើយ ដោយគ្មានអត្តសញ្ញាណប័ណ្ណត្រឹមត្រូវ ក្រុមហ៊ុនត្រូវជូនដំណឹងទៅអតិថិជន ឲ្យមកធ្វើការកំណត់អត្តសញ្ញាណរបស់ខ្លួននៅក្នុងលេខទូរសព្ទ ឲ្យបានត្រឹមត្រូវឡើងវិញ។ បើពុំដូច្នោះទេ ក្រុមហ៊ុនត្រូវតែបិទលេខទូរសព្ទនោះចោល។
ទាក់ទិននឹងបញ្ហានេះ វិទ្យុបារាំងអន្ដរជាតិបានព្យាយាមទាក់ទងទៅកាន់បណ្ដាក្រុមហ៊ុនប្រតិបត្តិករទូរសព្ទធំៗនៅកម្ពុជាដើម្បីសុំប្រតិកម្ម និងការបំភ្លឺ ប៉ុន្តែមិនមានការឆ្លើយតបឡើយ។
សូមជម្រាបជូនថា យុទ្ធនាការបិទសេវា និងបញ្ឈប់ការចែកចាយ ស៊ីមកាតដែលគ្មានអត្តសញ្ញាណប័ណ្ណនេះ ធ្វើឡើងតាមសេចក្ដីណែនាំរបស់អគ្គស្នងការនគរបាលជាតិ ដើម្បីបង្កលក្ខណៈងាយស្រួលដល់ការស្រាវជ្រាវ បង្ក្រាបបទល្មើសគ្រប់ប្រភេទ និងដើម្បីជម្រុញការអនុវត្តឲ្យមានប្រសិទ្ធភាព នូវខ្លឹមសារសារាចរអន្ដរក្រសួងមហាផ្ទៃ និងក្រសួងប្រៃសនីយ៍ និងទូរគមនាគមន៍ ស្ដីពីការគ្រប់គ្រងការធ្វើអាជីវកម្ម។
ដោយឡែក ទិន្នន័យពីអគ្គស្នងការនគរបាលជាតិ បង្ហាញថា ក្នុងរយៈពេល៦ខែ ដើមឆ្នាំ២០១៤នេះ នៅទូទាំងប្រទេសកម្ពុជា មានអ្នកប្រើប្រាស់លេខទូរស័ព្ទជិត២០លានលេខ និងអ្នកប្រើប្រាស់សេវាអ៊ីនធឺណែត មានប្រមាណ៣លាន៨សែននាក់។ ក្នុងចំណោមអ្នកប្រើប្រាស់លេខទាំងនោះ មានលេខទូរសព្ទប្រមាណ១ពាន់៤៧លេខ បានប្រើប្រាស់ដោយគ្មានអត្តសញ្ញាណត្រឹមត្រូវ និងមានលេខមួយចំនួន បានប្រើប្រាស់ដើម្បីប្រព្រឹត្តបទល្មើសនៅក្នុងសង្គម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ