បុគ្គលិកក្រុមហ៊ុនប្រេងសាំងកាល់តិចផ្ទុះកូដកម្មទាមទារប្រាក់ខែគោល១៦០ដុល្លារ
នៅព្រឹកថ្ងៃចន្ទនេះ បុគ្គលិកកម្មករដែលបំរើការងារនៅតាមបណ្តាស្ថានីយចាក់សាំងកាល់តិច ជាង១០ នៅក្នុងរាជធានីភ្នំពេញ បាននាំគ្នាធ្វើកូដកម្មទាមទារតម្លើងប្រាក់ខែដល់១៦០ដុល្លារក្នុងមួយខែ រួមនឹងល័ក្ខខ័ណ្ឌការងារមួយចំនួនទៀត។ ក្រុមអ្នកតវ៉ាបានអះអាងថា ប្រាក់ខែរបស់ពួកគេទាបជាងក្រុមហ៊ុនលក់ប្រេងសាំងឯទៀត ដែលមានការប្រកួតប្រជែងគ្នា និងអន់ជាងកម្មករកាត់ដេរទៅទៀត។ ពួកគេនឹងបន្តការតវ៉ាប្រសិនបើគ្មានដំណោះស្រាយពីក្រុមហ៊ុនChevron ដែលជាក្រុមហ៊ុនប្រេងសាំងដ៏ធំរបស់អាមេរិកមួយនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
បុគ្គលិកកម្មករដែលបំរើការងារនៅស្ថានីយចាក់សាំងកាល់តិចចំនួន១៧ សរុបមនុស្សជាង ២០០នាក់នៅរាជធានីភ្នំពេញ នៅព្រឹកថ្ងៃចន្ទទី១២ឧសភានេះ បានធ្វើកូដកម្មទាមទារតម្លើងប្រាក់ឈ្នួលដល់១៦០ដុល្លារ និងលក្ខខណ្ឌការងារមួយចំនួនទៀតសរុប៥ចំនុច។
ក្រុមបុគ្គលិកគ្រប់ផ្នែកមានអ្នកចាក់សាំង បុគ្គលិកស្តារម៉ាត បុគ្គលិកអនាម័យ ខ្លះនាំគ្នាលើកបដាដោយមានសរសេរអក្សរថា «ទាមទារឲ្យក្រុមហ៊ុនChevron ដំឡើងប្រាក់ឈ្នួលគោល ទាបបំផុតមួយខែ១៦០ដុល្លារ», «ទាមទារឲ្យក្រុមហ៊ុន Chevron ជូនប្រាក់ខែទី១៣ ដូចមុន»។
រីឯបុគ្គលិកមួយចំនួនទៀតនាំគ្នាអង្គុយជជែកគ្នាលេងមិនធ្វើការ លើកលែងតែស្ថានីយកាល់តិច មួយចំនួនដែលអ្នកគ្រប់គ្រងស្ថានីយ៍ចេញមកធ្វើការបំរើសេវាកម្មដោយខ្លួនឯងផ្ទាល់។ លោក ស ម៉ូរ៉ា ប្រធានសហព័ន្ធសហជីពកម្មករចំណីអាហារនិងសេវាកម្មកម្ពុជាបានថ្លែងថា ប្រៀបធៀបទៅនឹងកម្មករកាត់ដេរ ប្រាក់ខែរបស់បុគ្គលិកកម្មករដែលបំរើការងារនៅស្ថានីយចាក់សាំងកាល់តិច មានលក្ខណៈទាបជាង ដោយអ្នកបំរើការងារនៅកាល់តិចមិនមានប្រាក់អត្ថប្រយោជន៍ផ្សេងៗដូចជាកម្មករវិស័យកាត់ដេរឡើយ។
លោក ស ម៉ូរ៉ា ឲ្យដឹងថាលោកនឹងបន្តធ្វើកូដកម្មទាមទារបន្តទៀតប្រសិនបើគ្មានដំណោះស្រាយពីក្រុមហ៊ុន។ លើសពីនេះ ក្រុមអ្នកតវ៉ាងនឹងស្វែងរកអន្តរាគមន៍ពីស្ថានទូត សហរដ្ឋអាមេរិក និងសហជីពអាមេរិកកាំងផងដែរ។
នៅមិនទាន់មានការឆ្លើយតបអ្វីទាំងអស់ពីការទាមទាររបស់បុគ្គលិកកម្មករនៅថ្ងៃនេះពីសំណាក់ក្រុមហ៊ុនប្រេង Chevron ក៏ប៉ុន្តែ កន្លងមក តាមរយៈបុគ្គលិក ក្រុមហ៊ុនបានបង្ហាញពី
ឆន្ទៈក្នុងការតម្លើងប្រាក់ឈ្នួលដល់បុគ្គលិកផងដែរនៅប៉ុន្មានខែខាងមុខនេះ តែមិនមានភាពច្បាស់លាស់ថាគ្រោងតម្លើងប៉ុន្មាន។
សូមបញ្ជាក់ថា ប្រាក់ខែបច្ចុប្បន្នរបស់បុគ្គលិកកាល់តិច គឺទទួលបាន១៣០ដុល្លារផ្នែកបេឡា បុគ្គលិកចាក់សាំងបាន ១១០ដុល្លារ និងបុគ្គលិកអនាម័យទទួលបាន១០០ដុល្លារ ក្នុងមួយខែ។
បើប្រៀបធៀបទៅនឹងក្រុមហ៊ុនប្រេងដទៃទៀតដែលមានការប្រកួតប្រជែងគ្នា ក្រុមហ៊ុនកាល់តិច មានប្រាក់ឈ្នួលទាបជាងគេ ដោយចំណុចនេះហើយដែលបុគ្គលិកបំរើការងារទាំងនោះបានធ្វើការរិះគន់ខ្លាំងៗថា ក្រុមហ៊ុនកាល់តិចរបស់អាមេរិកអន្តរជាតិ ដែលតែងតែអួតពីក្រមសីលធម៌ លើកកំពស់សិទ្ធិមនុស្សនោះត្រូវបរាជ័យក្នុងការផ្តល់ប្រាក់ឈ្នួលដែលធានាការរស់នៅសមរម្យទៅដល់បុគ្គលិករបស់ខ្លួននៅក្នុងប្រទេសកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ