អ្នកវិភាគ និងអ្នកនយោបាយថា លោក ហ៊ុន សែន អនុវត្តនយោបាយការបរទេស ទន់ភ្លន់ តែមិនទន់ជ្រាយ
បន្ទាប់ពីឡាវ យល់ព្រមដកទ័ពចេញពីទឹកដីកម្ពុជានៅថ្ងៃស្អែក ក្រោយលោក ហ៊ុន សែន ចុះទៅដោះស្រាយរឿងនេះដោយផ្ទាល់ដល់ឡាវ អ្នកវិភាគ សង្គមស៊ីវិល និងអ្នកនយោបាយចាត់ទុកការចេញមុខរបស់លោក ហ៊ុន សែន ជាឥរិយាបថទន់ភ្លន់ តែមិនទន់ជ្រាយ។ ហើយពួកគេស្នើឲ្យ លោក ហ៊ុន សែន បន្តអនុវត្តភាពម៉ដ្ឋចត់បែបនេះ លើបញ្ហាព្រំដែនជាមួយប្រទេសផ្សេងទៀត ជាពិសេសវៀតណាម ឲ្យដូចឡាវឣ៊ីចឹងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
«ការដោះស្រាយបែបទន់ភ្លន់ឣ៊ីចឹងវាគឺជារឿងល្អ ចៀសជាងការហៅមន្ត្រីទូតរបស់ឡាវមកស្ដីឲ្យ» នេះគឺជាការយល់ឃើញរបស់លោក ឆាំ ប៊ុនថេត អ្នកវិភាគសង្គម និងនយោបាយ។ លោកបន្ថែមថា ឥរិយាបថលោក ហ៊ុន សែន គឺជាទង្វើមួយបញ្ជាក់ថា កម្ពុជាចូលចិត្តប្រើការចរចាដោយសន្តិភាព មិនមែនហិង្សា។ នេះមានន័យថា នយោបាយដោះស្រាយបញ្ហាព្រំដែនរបស់លោក ហ៊ុន សែន ជាមួយឡាវ គឺទន់ភ្លន់ តែមិនទន់ជ្រាយទេ។ លោកហ៊ានថា ដូច្នេះតាមរយៈបទបញ្ជា៦ថ្ងៃឲ្យឡាវដកទ័ពចេញ និងការចល័តទ័ពកម្ពុជាទៅកាន់តំបន់មានជម្លោះ។
ចំណែក លោក សូរ ចន្ថា អ្នកវិភាគនយោបាយដែរនោះ មានយោបល់ថា ការចេញមុខដោះស្រាយបញ្ហាព្រំដែនដោយផ្ទាល់របស់លោក ហ៊ុន សែន គឺរកច្រកចេញលឿនប្រសើរជាងការបញ្ជូនត្រឹមថ្នាក់មន្រ្តីឲ្យទៅដោះស្រាយ។ ទន្ទឹមនឹងការស្វាគមន៍លោក សូរ ចន្ថា ថា ការចេញមុខរបស់លោក ហ៊ុន សែន នៅពេលនេះទំនងជាហេតុផលមួយនៅមុនការបោះឆ្នោតជាតិដើម្បីបង្ហាញថា លោកភាពមានខ្លាំងនៅក្នុងការដោះស្រាយបញ្ហាព្រំដែន។
ចំពោះលោក សន ជ័យ ប្រធានអង្គការសម្ព័ន្ធគណនេយ្យភាពសង្គមបានចាប់អារម្មណ៍ថា ការដោះស្រាយបញ្ហាព្រំដែនរវាងកម្ពុជា និងឡាវពីមុនមកមិនសូវជាស្វិតស្វាញប៉ុន្មានទេ ដែលរូបភាពនេះមើលទៅកម្ពុជាហាក់ដូចជាចាញ់ប្រៀបឡាវ។
ដោកឡែក លោក សាម អ៊ីន អគ្គលេខាធិការគណបក្សប្រជាធិបតេយ្យមូលដ្ឋានថា ឥរិយាបថលោក ហ៊ុន សែន គឺជាយុទ្ធសាស្ត្រល្អដើម្បីបញ្ចៀសសង្គ្រាមដែលអាចនឹងកើតឡើងនៅតាមព្រំដែន។ ហើយនេះវាមិនមែនជាការបង្ហាញពីភាពអន់ខ្សោយរបស់កម្ពុជាដែលនាយករដ្ឋមន្ត្រីធ្វើដំណើរដោយផ្ទាល់ទៅដោះស្រាយបញ្ហានោះទេ។
តែផ្ទុយទៅវិញលោក សុន ឆ័យ តំណាងរាស្ត្រគណបក្សសង្គ្រោះជាតិថា នេះគឺជាកាតព្វកិច្ចនាយករដ្ឋមន្ត្រីដែលត្រូវតែចេញមុខដោះស្រាយបញ្ហាក្នុងនាមជាមេដឹកនាំប្រទេស។ បើតាមលោក សុន ឆ័យ អ្វីដែលលោក ហ៊ុន សែន បានធ្វើមិនមែនទន់ភ្លន់ចំពោះឡាវពេកទេ តែជាភាពម៉ឺងម៉ាត់ដើម្បីឲ្យពលរដ្ឋទុកចិត្ត។ លោកស្នើឲ្យលោក ហ៊ុន សែន គួរតែអនុវត្តនយោបាយម៉ឺងម៉ាត់បែបនេះ ជាមួយប្រទេសជិតខាងកម្ពុជានៅភាគខាងកើតផង។ នោះគឺប្រទេសវៀតណាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ