អ្នកគាំទ្រខ្សែភាពយន្ត"កង្វះរូបភាព" សម្ដែងសុទិដ្ឋិនិយម ទោះជារឿងនេះមិនបានឈ្នះពានរង្វាន់អូស្កាក្ដី
ខ្សែភាពយន្ត «កង្វះរូបភាព The Missing Picture» របស់សមិទ្ធិករភាពយន្តខ្មែរ លោក ប៉ាន់ រិទ្ធី មិនបានឈ្នះពានរង្វាន់អូស្ការ ក្នុងផ្នែក ភាពយន្តជាភាសាបរទេសល្អបំផុតទេ។ ពានរង្វាន់នោះ បានធ្លាក់ទៅលើខ្សែភាពយន្ត ពីប្រទេសអ៊ីតាលី រឿង «The Great Beauty» របស់សមិទ្ធិករភាពយន្ត Paolo Sorrentino។ យ៉ាងណាក៏ដោយ អ្នកគាំទ្របានសម្ដែងសុទិដ្ឋិនិយមថា ការលេចមុខនៅក្នុងកម្មវិធីពានរង្វាន់អូស្កានេះ ជាជំហានវិជ្ជមានមួយ ហើយសង្ឃឹមថា ទៅថ្ងៃមុខ កម្ពុជានឹងអាចធ្វើដំណើរបានឆ្ងាយជាងនេះទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
តាំងពីព្រឹកព្រលឹមម៉ោង៨ ថ្ងៃទី៣មីនានេះ ទូរទស្សន៍ចំនួនពីរ នៅមជ្ឈមណ្ឌលសោតទស្សន៍ បុប្ផាណា បានចាប់ផ្ដើមបញ្ចាំងការផ្សាយបន្តផ្ទាល់កម្មវិធីប្រគល់ពានរង្វាន់អូស្កា ដោយមានអ្នកចូលរួមទស្សនាជាង៥០នាក់ ភាគច្រើនជាបរទេស។
ការផ្សាយបន្តផ្ទាល់កម្មវិធីពានរង្វាន់អូស្ការនេះ ធ្វើឡើងដើម្បីលើកទឹកចិត្ត និងអបអរសាទរ ចំពោះវត្តមានខ្សែភាពយន្តកម្ពុជា រឿង «កង្វះរូបភាព» ជាអង់គ្លេសហៅថា The Missing Picture ដែលត្រូវបានដាក់ចូលក្នុងភាពយន្តចំនួនប្រាំចុងក្រោយ សម្រាប់ប្រកួតផ្ដាច់ព្រ័ត្រ យកពានរង្វាន់អូស្កា ក្នុងផ្នែកខ្សែភាពយន្តជាភាសាបរទេសល្អជាងគេបំផុត។ ភាពយន្តឯកសារ រឿង «កង្វះរូបភាព» ត្រូវប្រកួតប្រជែងជាមួយខ្សែភាពយន្ត៤ផ្សេងទៀត មកពីប្រទេសប៉ាឡេស្ទីន អ៊ីតាលី ដាណឺម៉ាក និងប្រទេសប៊ែលហ្ស៊ិក។
ជាលទ្ធផល ខ្សែភាពយន្ត «កង្វះរូបភាព The Missing Picture» របស់សមិទ្ធិករភាពយន្តខ្មែរ លោក ប៉ាន់ រិទ្ធី មិនបានឈ្នះពានរង្វាន់អូស្កា ក្នុងផ្នែក ភាពយន្តជាភាសាបរទេសល្អបំផុតទេ។ ពានរង្វាន់នោះ បានធ្លាក់ទៅលើខ្សែភាពយន្ត ពីប្រទេសអ៊ីតាលី រឿង «The Great Beauty» របស់សមិទ្ធិករភាពយន្ត Paolo Sorrentino។
ទោះជាយ៉ាងនេះក្ដី អ្នកគាំទ្រខ្សែភាពយន្ត «កង្វះរូបភាព» និងជាផលិតករភាពយន្ត លោកស៊ុំ ស៊ីថែន បានសម្ដែងសុទិដ្ឋិនិយមថា ការលេចមុខនៅក្នុងកម្មវិធីពានរង្វាន់អូស្កានេះ ជាជំហានវិជ្ជមានមួយ ហើយលោកសង្ឃឹមថា ទៅថ្ងៃមុខ កម្ពុជានឹងអាចធ្វើដំណើរបានឆ្ងាយជាងនេះទៀត។
ដោយឡែក សមិទ្ធិករភាពយន្តកង្វះរូបភាព លោក ប៉ាន់ រិទ្ធី ផ្ទាល់ ធ្លាប់បានប្រាប់សារព័ត៌មានបរទេសដូច្នេះថា វត្តមានខ្សែភាពយន្តខ្មែរ នៅក្នុងកម្មវិធីអូស្កានេះ គឺជាជ័យជំនះមួយរួចស្រេចទៅហើយ។ ប្រសិនបើរឿង«កង្វះរូបភាព» ទទួលបានពានរង្វាន់អូស្កាមែននោះ វាជាការយកផ្លែឈើដ៏ស្រស់ស្អាតមួយទៀត មកតែងលម្អលើនំខេកដែលមានស្រាប់ដូច្នោះដែរ។
ខ្សែភាពយន្ត «កង្វះរូបភាព The Missing Picture» របស់សមិទ្ធិករភាពយន្តខ្មែរ លោក ប៉ាន់ រិទ្ធី ជាខ្សែភាពយន្តដំបូងបង្អស់របស់កម្ពុជា ដែលត្រូវបានដាក់ចូលក្នុងភាពយន្តចំនួនប្រាំចុងក្រោយ សម្រាប់ប្រកួតផ្ដាច់ព្រ័ត្រ យកពានរង្វាន់អូស្កា។ រឿងនេះរៀបរាប់ពីជីវិតវ័យកុមាររបស់លោកប៉ាន់ រិទ្ធី នៅក្នុងរបបខ្មែរក្រហម ដែលកាលណោះ សមាជិកគ្រួសាររបស់លោកជាច្រើន បានស្លាប់បាត់បង់ជីវិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ