ទិវាសិទ្ធិមនុស្សអន្តរជាតិឆ្នាំនេះចាប់ផ្តើមធ្វើសកម្មភាពពីថ្ងៃទី១ធ្នូតទៅ
ទិវាសិទ្ធិមនុស្សអន្តរជាតិ ថ្ងៃ១០ធ្នូឆ្នាំនេះត្រូវបានក្រុមអង្គការសង្គមស៊ីវិលរៀបចំឲ្យមានក្បួនដង្ហែចេញពីបណ្តាខេត្តនានាចាប់ពីថ្ងៃទី០១ធ្នូតទៅហើយ។សកម្មជនដីធ្លី និងសកម្មជនសិទ្ធិមនុស្សប្រមាណជា ៥០០ នាក់ក្នុងនោះក៏មានទាំងព្រះសង្ឃជាច្រើនអង្គផងចាប់ផ្តើមដង្ហែក្បួនចេញដំណើរពីគោលដៅរៀងៗខ្លួននៅថ្ងៃអាទិត្យនេះឆ្ពោះមកកាន់រាជធានីភ្នំពេញដើម្បីជួបជុំគ្នានៅថ្ងៃទី១០ធ្នូ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
គោលដៅដែលក្រុមសកម្មជនសិទ្ធិមនុស្សគ្រោងចេញដំណើរនៅថ្ងៃអាទិត្យទី០១ធ្នូនេះមានមកពីខេត្តស្វាយរៀង កំពត កំពង់ស្ពឺ ពោធិសាតិ និងកំពង់ធំ។ ក្រុមសកម្មជនទាំងនោះនឹងដើរដង្ហែក្បួនធម្មយាត្រាចេញពីគោលដៅរៀងៗខ្លួនឆ្ពោះមកកាន់រាជធានីភ្នំពេញដើម្បីប្រារព្ធទិវាសិទ្ធិមនុស្សអន្តរជាតិនៅថ្ងៃទី១០ធ្នូ។
លោក យ៉េង វីរៈ នាយកប្រតិបត្តិនៃមជ្ឈមណ្ឌលអប់រំច្បាប់សម្រាប់សហគមន៍ដែលជាសមាជិកក្រុមអ្នករៀបចំធម្មយាត្រានិងសិទ្ធិយាត្រានេះបានប្រាប់វិទ្យុបារាំងអន្តរជាតិថា ក្រុមអ្នកចូលរួមនឹងធ្វើដំណើរដោយថ្មើរជើងក្នុងរយៈចម្ងាយប្រមាណជាពី១៥ទៅ២០គីឡូម៉ែត្រក្នុងមួយថ្ងៃ។ នៅពេលយប់ពួកគេនឹងឈប់សម្រាកដោយមានការប្រារព្ធពិធីល្បែងល្បងប្រាជ្ញា សំណួរចម្លើយស្តីពីសិទ្ធិមនុស្ស រួមទាំងការសម្តែងធម្មទេសនា ដោយសកម្មជនព្រះសង្ឃដែលចូលរួមក្នុងធម្មយាត្រានោះផង។
ទិវាសិទ្ធិមនុស្សអន្តរជាតិ១០ធ្នូឆ្នាំនេះប្រារព្ធឡើងក្រោមប្រធានបទ«មានយុត្តិធម៌ មានសន្តិភាព!»។ ឆ្នាំ២០១៣ នេះជាខួបទី៦៥ឆ្នាំហើយនៃទិវាសិទ្ធិមនុស្សអន្តរជាតិដែលបណ្តាប្រទេសជាច្រើនលើសាកលលោកតែងប្រារព្ធជារៀងរាល់ឆ្នាំ។ ទិវាសិទ្ធិមនុស្សអន្តរជាតិគឺជាឱកាសដែលអង្គការសង្គមស៊ីវិល សកម្មជនសិទ្ធិមនុស្ស ប្រជាពលរដ្ឋ អង្គការជាតិនិងអន្តរជាតិរួមទាំងរដ្ឋាភិបាលផងបបង្ហាញពីកិច្ចខិតខំរបស់ខ្លួនក្នុងកិច្ចការការពារសិទ្ធិមនុស្ស។
យោងតាមសេចក្តីប្រកាសព័ត៌មាន ធម្មយាត្រានិងសិទ្ធិយាត្រានេះនឹងមកជួបជុំគ្នានៅមុខរដ្ឋសភាជាតិដើម្បីប្រគល់ឯកសារមួយចំនួនស្តីពីស្ថានភាពសិទ្ធិមនុស្សនៅកម្ពុជាដល់អ្នកតំណាងរាស្ត្រជាប់ឆ្នោត។ ក្រុមសង្គមស៊ីវិលបានហៅប្រទេសកម្ពុជាថាកំពុងប្រឈមនឹងបញ្ហាសិទ្ធិមនុស្សជាច្រើន។ ផ្ទុយពីរដ្ឋាភិបាលដែលចាត់ទុកស្ថានភាពសិទ្ធិមនុស្សនៅកម្ពុជាថាមានលក្ខណៈល្អប្រសើរ។
បើយោងតាមលោក យ៉ង វីរៈ នេះមិនមែនជាលើកទី១ទេដែលមានការរៀបចំក្បួនធម្មយាត្រា និងសិទ្ធិយាត្រាបែបនេះ។ សកម្មជនព្រះសង្ឃ និងសកម្មជនសិទ្ធិមនុស្សធ្លាប់បានរៀបចំបែបនេះជាហូរហែរួចមកហើយដើម្បីបួងសួងនិងទាមទារឲ្យប្រទេសជាតិមានសុខសន្តិភាព យុត្តិធម៌សង្គម និងការគោរពសិទ្ធិមនុស្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ