រដ្ឋមន្ត្រីការបរទេសជប៉ុននឹងមកទស្សនកិច្ចនៅកម្ពុជានៅថ្ងៃអាទិត្យ ដោយភ្ជាប់នូវប្រាក់ជំនួយនិងកំចីរាប់លានដុល្លារ
រដ្ឋមន្ត្រីការបរទេសជប៉ុន លោក តារ៉ូ កូណូ (Taro Kono) នឹងអញ្ជើញមកបំពេញទស្សនកិច្ចជាផ្លូវការនៅកម្ពុជា នាថ្ងៃអាទិត្យចុងសប្តាហ៍នេះ ដើម្បីពង្រឹងទំនាក់ទំនងទ្វេភាគី និងដើម្បីអបអរសាទរខួប ៦០ឆ្នាំ នៃការបង្កើតទំនាក់ទំនងការទូតរវាងប្រទេសទាំងពីរ។ ដំណើរទស្សនកិច្ចនេះ គឺចំពេលដែលព្រះមហាក្សត្រកម្ពុជា បានយាងទៅបំពេញទស្សនកិច្ចនៅប្រទេសជប៉ុនចាប់ពីថ្ងៃទី៦ ដល់ថ្ងៃទី៩ មេសា ហើយជាអ្វីដែលអ្នកវិភាគបានលើកឡើងថា ជាសញ្ញាល្អដែលប្រទេសជប៉ុននឹងដើរតួនាទីជាអ្នកសម្របសម្រួលជម្លោះនយោបាយនៅកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥១
បើគ្មានការប្រែប្រួលទេ រដ្ឋមន្ត្រីការបរទេសជប៉ុន លោក តារ៉ូ កូណូ ( Taro Kono) នឹងអញ្ជើញមកបំពេញទស្សនកិច្ចជាផ្លូវការនៅកម្ពុជា នៅថ្ងៃអាទិត្យ ទី ៨ មេសា ចុងសប្តាហ៍នេះ ដោយបាននាំមកនូវប្រាក់កំចីដែលមានការប្រាក់ទាប និងជំនួយឥតសំណង រាប់សិបលានដុល្លារអាមេរិកផង។ នេះបើយោងតាមសេចក្តីប្រកាសរបស់ក្រសួងការបរទេសកម្ពុជា នៅល្ងាចថ្ងៃទី៦មេសានេះ។
បើតាមសេចក្តីប្រកាសនេះ នៅក្នុងអំឡុងពេលនៃដំណើរទស្សនកិច្ចនៅប្រទេសកម្ពុជា លោក តារ៉ូ កូណូ (Taro Kono) នឹងអញ្ជើញចូលជួបសម្តែងការគួរសម ជាមួយលោកនាយករដ្ឋមន្ត្រី ហ៊ុន សែន នៅឯវិមានសន្តិភាព និងចូលជួបពិភាក្សាទ្វេភាគី ជាមួយរដ្ឋមន្ត្រីក្រសួងការបរទេសកម្ពុជាលោក ប្រាក់ សុខុន ផងដែរ។ ក្រៅពីនេះ លោក តារ៉ូ កូណូ រដ្ឋមន្ត្រីការបរទេសជប៉ុន នឹងចុះហត្ថលេខាលើលិខិតប្តូរសារ និងកំណត់ហេតុ នៃការពិភាក្សា ស្តីពីការផ្តល់ហិរញ្ញប្បទានរបស់រដ្ឋាភិបាលជប៉ុនមកកាន់រដ្ឋាភិបាលកម្ពុជា ជាមួយរដ្ឋមន្ត្រីការបរទេសកម្ពុជាលោក ប្រាក់ សុខុន ក្រោមអធិបតីភាពរបស់លោកនាយករដ្ឋមន្ត្រី ហ៊ុន សែន។ ក្នុងនោះរួមមាន៖ ទី១.ការចុះហត្ថលេខា លើកំណត់ហេតុស្តីពី ហិរញ្ញប្បទានឥតសំណង ឬ ជំនួយឥតសំណងមកដល់ប្រទេសកម្ពុជា ក្នុងទំហំទឹកប្រាក់ ៥០០លានយ៉េន ឬប្រហាក់ប្រហែលជាង ៤.៦ លានដុល្លារអាមេរិក សម្រាប់អនុវត្តគម្រោងកម្មវិធីអភិវឌ្ឍន៍សេដ្ឋកិច្ច និងសង្គម នៅកម្ពុជា និងទី២. គឺឥណទានសម្បទាន ឬកំចីដែលមានការប្រាក់ទាបប្រមាណជា ៩.២១៦ លានយ៉េន ឬប្រមាណជិត ៨៦ លានដុល្លារសហរដ្ឋអាមេរិក សម្រាប់អនុវត្តគម្រោងពង្រីកប្រព័ន្ធខ្សែបញ្ជូន និងចែកចាយអគ្គិសនី នៅរាជធានីភ្នំពេញ ជំហានទី។ សេចក្តីប្រកាសរបស់ក្រសួងការបរទេសកម្ពុជាបានកត់សំគាល់ថា ឆ្នាំ២០១៨នេះ គឺជាខូបអនុស្សាវរីយ៍លើកទី៦០ នៃការបង្កើតទំនាក់ទំនងការទូតរវាងប្រទេសកម្ពុជា និងជប៉ុនផង។
គួរជំរាបជូនថា ដំណើរទស្សនកិច្ចរបស់រដ្ឋមន្ត្រីការបរទេសជប៉ុននៅកម្ពុជានេះ គឺធ្វើឡើង ចំពេលដែលព្រះមហាក្សត្រកម្ពុជា សម្តេចព្រះ បរមនាថ នរោត្តម សីហមុនី បានយាងទៅបំពេញទស្សនកិច្ចនៅប្រទេសជប៉ុន ចាប់ពីថ្ងៃទី៦ ដល់ថ្ងៃទី៩ មេសា ដើម្បីចូលរួមសម្ពោធមហាសាលប្រជុំ Nalanda Mahavihara និងបុណ្យរំលឹកខួបលើកទី៤ នៃទិវាព្រះពុទ្ធសាសនាអន្តរជាតិនៅក្នុងប្រទេសជប៉ុន។
ទោះយ៉ាងណាក្តី លោក ព្រាប កុល នាយកប្រតិបត្តិអង្គការតម្លាភាពកម្ពុជា បានចាត់ទុកថា ការយាងទៅប្រទេសជប៉ុនរបស់ព្រះមហាក្សត្រកម្ពុជានៅពេលនេះ គឺជាសញ្ញាល្អសម្រាប់ទំនាក់ទំនងរវាងកម្ពុជានិងជប៉ុន ក៏ដូចជាសម្រាប់ឱកាសនៃការលើកកំពស់តួនាទីរបស់ជប៉ុន នៅក្នុងការជួយដល់កម្ពុជាទាំងផ្នែកសេដ្ឋកិច្ច និងនយោបាយផង។ មានន័យថា ប្រទេសជប៉ុន នឹងដើរតួនាទីសំខាន់ ក្នុងការសម្របសម្រួលជម្លោះនយោបាយនៅកម្ពុជា និងស្របពេលដែលរដ្ឋមន្ត្រីការបរទេសជប៉ុនអញ្ជើញមកបំពេញទស្សនកិច្ចនៅកម្ពុជានៅចុងសប្តាហ៍នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ