ក្រសួងមហាផ្ទៃ បង្កើតគណៈកម្មការជួយពលករមកពីថៃ
ក្រសួងមហាផ្ទៃ កាលពីថ្ងៃអង្គារទី១៧ មិថុនា បានប្រកាសបង្កើតគណៈកម្មការជំនាញមួយ ដែលមានសមាជិក ៩រូប ដើម្បីសហការសម្របសម្រួលទទួលពលរដ្ឋខ្មែរមកពីប្រទេសថៃ ការរៀបចំការដឹកជញ្ជូន ការធានានូវបញ្ហាសុមាលភាព។ ដោយឡែកការឆ្លងដែនខុសច្បាប់ ក៏ជាវិធានការម៉ឺងម៉ាត់មួយរបស់គណៈកម្មការពិសេសនេះផងដែរ។ សង្គមស៊ីវិលស្វាគមន៍ចំពោះគណៈកម្មការរបស់ក្រសួងមហាផ្ទៃនេះ។
ចុះផ្សាយនៅថ្ងៃ៖
ស្តាប់ - ០២:០៣
គណៈកម្មការជំនាញ ដើម្បីត្រួតពិនិត្យ ណែនាំ និងសហការសម្របសម្រួល អំពីបញ្ហាពលករខ្មែរដែលភាគីថៃ បានបញ្ជូនមកកាន់កម្ពុជាវិញ គឺត្រូវបានបង្កើតឡើង ដោយភ្ជាប់ជាមួយនឹងភារៈកិច្ចធំ។ នោះបើតាមសេចក្តីប្រកាសក្រសួងមហាផ្ទៃ។ ក្រុមគណៈកម្មការ ដែលមានសមាសភាព ៩រូបដឹកនាំដោយ លោកឌុល គឿន រដ្ឋលេខាធិការក្រសួងមហាផ្ទៃនេះ នឹងសម្របសម្រួលការទទួលពលករពីប្រទេស នៅតាមច្រកព្រំដែន ដោយធ្វើការជាមួយបណ្តាខេត្តជាប់ព្រំដែនកម្ពុជា-ថៃ។
ការសម្របសម្រួលកន្លែងស្នាក់នៅបណ្តោះអាសន្ន អាហារថ្នាំពេទ្យ គ្រូពេទ្យ ដើម្បីធានាបាននូវសុខមាលភាពពលករទាំងអស់ ការដឹកជញ្ជូនដោយសុវត្ថតិភាពពីតំបន់ព្រំដែនទៅកាន់មូលដ្ឋានរៀងៗខ្លួន។ និង ការអនុវត្តយ៉ាងម៉ឺងម៉ាត់នូវការទប់ស្កាត់ការឆ្លងកាត់ព្រំដែនខុសច្បាប់ និងបទល្មើសឆ្លងដែនគ្រប់ប្រភេទជាដើម។
សេចក្តីសម្រេចបង្កើតគណៈកម្មការពិសេសដែលចុះហត្ថលេខាដោយនាយករដ្ឋមន្ត្រីស្តីទី លោក ស ខេង នេះគឺធ្វើឡើងក្រោយពេលដែលពលករកម្ពុជាខុសច្បាប់រ៉ាប់ម៉ឺននាក់ត្រូវបានរដ្ឋាភិបាលយោធាថៃដឹកជញ្ជូនមកកាន់កម្ពុជាវិញយ៉ាងគំហុកតាំងពីដើមខែមិថុនាមក។ គិតត្រឹមយប់ថ្ងៃទី១៧ មិថុនាម្សិលមិញ មានពលករខ្មែរប្រមាណ១៧ម៉ឺន ១ពាន់អ្នកហើយ ដែលត្រូវបានបញ្ជូនមកដល់ទឹកដីកម្ពុជាវិញ នេះបើតាមការបញ្ជាក់ពី លោក គោ សុំ សារឿត អភិបាលខេត្តបន្ទាយមានជ័យដែលបានប្រាប់វិទ្យុបារាំងនៅថ្ងៃពុធនេះ។ លោកអភិបាលដដែល បានបញ្ជាក់ថា កម្លាំងអាជ្ញាធរគ្រប់ប្រភេទ រួមទាំងក្រុមគ្រូពេទ្យ ប្រមាណ២ពាន់នាក់ កំពុងរងចាំទទួលពលករ និងផ្តល់សេវាសុខភាព ម្ហូបអាហារ និងការដឹកជញ្ជូនផងដែរ។
សូមបញ្ជាក់ជូនថា ទាក់ទងនឹងការដឹកជញ្ជូនពលករខ្មែរយ៉ាងគំហុកនេះ រដ្ឋាភិបាលកម្ពុជា និងថៃតាមរយៈក្រសួងការបរទេសនិងស្ថានទូត បានឯកភាពគ្នាបង្កើតបណ្តាញទំនាក់ទំនង hot line រវាងភាគីទាំងពីដើម្បីដោះស្រាយបញ្ហាបន្ទាន់ៗដែលពលករខ្មែរជួបប្រទះនៅក្នុងប្រទេសថៃ និងពេលកំពុងធ្វើដំណើរមកកាន់កម្ពុជាវិញ។ បើទោះបីជាយ៉ាងណាក៏ដោយ សង្គមស៊ីវិល លោក មឿងតុលា ប្រធានកម្មវិធីសិទ្ធិការងារនៃមជ្ឈមណ្ឌលអប់រំច្បាប់សម្រាប់សហគមន៍ បានស្វាគមន៍ចំពោះការបង្កើតគណៈកម្មការរបស់រដ្ឋាភិបាលនេះ។ ប៉ុន្តែអ្វីដែលសំខាន់ជាងនេះទៅទៀតសម្រាប់រដ្ឋាភិបាលកម្ពុជា គឺការបង្កើតការងារដល់ពលករទាំងអស់ដើម្បីទប់ស្កាត់ការចំណាកស្រុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ