ជំនួយដល់ពលករនៅច្រកទ្វារប៉ោយប៉ែតក្លាយជាជម្លោះ
ទាំងអាជ្ញាធររដ្ឋាភិបាល ទាំងសង្គមស៊ីវិល និងបក្សប្រឆាំងនៅតែបន្តជួយអន្តរាគមន៍ជាបន្តបន្ទាប់ដល់ពលករឆ្លងដែនខុសច្បាប់ដែលអាជ្ញាធរថៃចាប់បញ្ជូនមកវិញ។ ប៉ុន្តែ ការប៉ះទង្គិចគ្នាខ្លះៗបានកើតឡើងរវាងអាជ្ញាធរនិងក្រុមយុវជនខ្មែរក្រោមក៏ដូចជារវាងអាជ្ញាធរនិងតំណាងបក្សប្រឆាំងនៅពេលចែកអំណោយដល់ពលករ។ អង្គការសង្គមស៊ីវិលដែលតាមដានរឿងនេះបានអំពាវនាវឲ្យមានការបើកទូលាយក្នុងការចូលរួមជួយពលករខ្មែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
គិតមកទល់នឹងថ្ងៃនេះ តួលេខពលករឆ្លងដែនខុសច្បាប់ដែលអាជ្ញាធរថៃចាប់បញ្ជូនត្រឡប់មកវិញបានកើនដល់ជាង២សែននាក់ហើយ។ នេះបើយោងតាមតួលេខដែលផ្តល់ដោយអាជ្ញាធររដ្ឋាភិបាល។ ការបញ្ជូនពលករខ្មែរមកវិញក៏នៅតែមិនទាន់ចប់នៅឡើយដែរ។ ស្របពេលដែលទាំងអាជ្ញាធរ ទាំងសង្គមស៊ីវិល ទាំងបក្សប្រឆាំងនិងសម្បុរសជននានាកំពុងសម្រុកចែកអំណោយដល់ពលករ ការប៉ះទង្គិចគ្នាខ្លះបានកើតឡើង។
ជាក់ស្តែងកាលពីយប់ថ្ងៃពុធ អាជ្ញាធរដែនដីបានប៉ះសម្តីជាមួយយុវជនមួយក្រុមដែលដែលមានពាក់អាវយឺតសញ្ញាទង់ជាតិខ្មែរកម្ពុជាក្រោមហើយចុះចែកអំណោយដល់ពលករ។ ក្រុមយុវជនទាំងនោះបានចោទប្រកាន់អាជ្ញាធរក្រុងប៉ោយប៉ែតថាបានរារាំងពួកគេមិនឲ្យផ្តល់អំណោយដល់ពលករខ្មែរ ប៉ុន្តែ ភាគីអាជ្ញាធរវិញចោទក្រុមយុវជនទាំងនោះថាជាការកេញចំណេញនយោបាយ។
ដោយឡែក ក្រុមតំណាងរាស្ត្រគណបក្សសង្គ្រោះជាតិនិងសមាជិកព្រឹទ្ធសភាគណបក្សសម រង្ស៊ី ដឹកនាំដោយលោក កឹម សុខា ក៏បានធ្វើដំណើរទៅដល់ទីក្រុងប៉ោយប៉ែតដែរនៅថ្ងៃព្រហស្បតិ៍នេះដើម្បីជួបជាមួយពលករ។ លោក ស៊ុម ចាន់គារ មន្ត្រីអង្គការអាដហុកប្រចាំខេត្តបន្ទាយមានជ័យបានប្រាប់វិទ្យុបារាំងថា មុនការទៅដល់របស់មន្ត្រីបក្សប្រឆាំង មានក្រុមមនុស្សដើរស្រែកប្រាប់ពលករតាមមីក្រូថាកុំឲ្យជឿតាមការឃោសនារបស់បណបក្សនយោបាយ។ លោកសង្ស័យថានេះជាការរៀបចំរបស់អាជ្ញាធរដែលបានធ្វើឲ្យប៉ះពាល់ដល់សិទ្ធិនយោបាយរបស់ពលរដ្ឋ។
លោក កឹម សុខា អនុប្រធានគណបក្សសង្គ្រោះជាតិក៏បានឲ្យដឹងតាមបណ្តាញសង្គមហ្វេសប៊ុករបស់ខ្លួនថា មានការប៉ះទង្គិចគ្នាបន្តិចបន្តួចនៅពេលដែលលោកចូលទៅដល់ជំរុំពលករខ្មែរនៅទីក្រុងប៉ោយប៉ែត។ ភ្នាក់ងារការពារសិទ្ធិមនុស្សអង្គការអាដហុក លោក ស៊ុម ចាន់គារ បានកត់សម្គាល់ថា ចំនួនពលករដែលភាគីថៃដឹកបញ្ជូមនកវិញបានថយចុះហើយនៅពេលនេះ។
យ៉ាងណាក៏ដោយ លោកបញ្ជាក់ថា ការចែកអំណោយដល់ពលករទាមទារឲ្យមានការចូលរួមទូលំទូលាយពីគ្រប់មជ្ឈដ្ឋាន។ ជម្លោះជុំវិញការជួយពលកររក៏ត្រូវបានមជ្ឈដ្ឋានជាច្រើនសម្តែងការសោកស្តាយហើយបានអំពាវនាវឲ្យអ្នកនយោបាយត្រូវចៀសវាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ