មនុស្ស១,៦ម៉ឺននាក់ត្រូវបានឃាត់ខ្លួនពាក់ព័ន្ធនឹងគ្រឿងញៀននាឆ្នាំ២០១៨
យោងតាមរបាយការណ៍ប្រឆាំងការជួញដូរគ្រឿងញៀនរយៈពេលមួយឆ្នាំ២០១៨នេះ មានមនុស្សប្រមាណ១៦.២៣២នាក់ ត្រូវបានឃាត់ខ្លួនពាក់ព័ន្ធនឹងករណីគ្រឿងញៀនចំនួន៨.០១៨ករណីនៅទូទាំងប្រទេសកម្ពុជា។ ប្រៀបធៀនរយៈពេលដូចគ្នា កាលពីឆ្នាំ២០១៧ ករណីបទល្មើសគ្រឿងញៀនមានការថយចុះ។
ចុះផ្សាយនៅថ្ងៃ៖
ស្តាប់ - ០១:៥៦
របាយការណ៍បឋម ដែលវិទ្យុបារាំងអន្តរជាតិទទួលបានពី លោក មាស វីរឹទ្ធ អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀន គិតចាប់ពីថ្ងៃទី១ ខែមករា ដល់ថ្ងៃទី៣១ ខែធ្នូ ឆ្នាំ២០១៨ អាជ្ញាធរបានបង្ក្រាបបទល្មើសគ្រឿងញៀនសរុបចំនួន ៨.០១៨ករណី និងបានឃាត់ខ្លួនមនុស្សចំនួន ១៦.២៣២នាក់ ដែលមានជនបរទេស ៣១០នាក់នៅក្នុងនោះផងដែរ។
ប្រៀបធៀបនឹងឆ្នាំ២០១៧កន្លងទៅ ករណីបង្រ្កាបបទល្មើសគ្រឿងញៀនមានការថយចុះ ចំនួន១៥៥ករណី ពោលគឺនៅឆ្នាំ២០១៧ អាជ្ញាធរបានបង្ក្រាបបទល្មើសគ្រឿងញៀនចំនួនសរុប ៨ ១៧៣ករណី។ នេះបើតាមរបាយការណ៍ប្រចាំឆ្នាំរបស់អាជ្ញាធរជាតិប្រយុទ្ធប្រឆាំងគ្រឿងញៀន។
តួលេខនេះក៏បានបង្ហាញឲ្យឃើញដែរថា ចំនួនមនុស្ស ដែលត្រូវបានសមត្ថកិច្ចឃាត់ខ្លួន ពាក់ព័ន្ធនឹងករណីគ្រឿងញៀនក៏មានការថយចុះដែរ។ នៅឆ្នាំ២០១៧ សមត្ថកិច្ចបានឃាត់ខ្លួនអ្នកពាក់ព័ន្ធនឹងករណីគ្រឿងញៀនបានចំនួន ១៧.៨០០នាក់ ហើយនៅឆ្នាំ២០១៨នេះ សមត្ថកិច្ចបានឃាត់ខ្លួនអ្នកពាក់ព័ន្ធនឹងករណីគ្រឿងញៀនបានចំនួន ១៦.២៣២នាក់ មានការថយចុះប្រមាណជិត៩ភាគរយ។
សូមជម្រាបជូនថា របាយការណ៍ដដែលឲ្យដឹងថាសមត្ថកិច្ច ចាប់បានសារធាតុញៀនគ្រប់ប្រភេទទំងន់ប្រមាណ៥៣៣គីឡូក្រាម និង៣៧០កញ្ចប់, កញ្ឆាក្រៀមប្រមាណ៧៤គីឡូក្រាម និង១៦ម៉ឺនដើម។
នៅក្នុងឱកាសទិវាអន្តរជាតិនៃការប្រយុទ្ធប្រឆាំងគ្រឿងញៀន នៅថ្ងៃទី២៦ខែមិថុនា ឆ្នាំ២០១៨កន្លងទៅនេះ ប្រទេសកម្ពុជាបាន ធ្វើពិធីដុតបំផ្លាញគ្រឿងញៀនជាង៦០គីឡូក្រាម។ លោក មាស វីរិទ្ធ អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀន ធ្លាប់បានថ្លែងប្រាប់វិទ្យុបារាំងអន្តរជាតិថា ប្រទេសកម្ពុជាបានប្រឹងប្រែងទប់ស្កាត់និងបង្ក្រាបគ្រឿងញៀនក្នុងប្រទេសប្រកបដោយឆន្ទៈខ្ពស់ ខណៈកម្ពុជា ត្រូវបានឧក្រិដ្ឋជនចាត់ទុកថាជាចំណុចឆ្លងកាត់និងចរាចរគ្រឿងញៀន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ