សកម្មជនការពារព្រៃឈើប្រារព្ធខួបពីរឆ្នាំនៃការបាញ់សម្លាប់លោក ឈុត វុទ្ធី ដោយគ្មានការរារាំង
សកម្មជនការពារព្រៃឈើ និស្សិត រួមទាំងប្រជាពលរដ្ឋ និងព្រះសង្ឈប្រមាណជា១០០អង្គនិងនាក់ នៅថ្ងៃសៅរិ៍នេះ បានមកជួបជុំគ្នា ត្រង់ចំណុចវាលបី ក្នុងស្រុកមណ្ឌលសីមា ខេត្តកោះកុង ដើម្បីប្រារព្ធខួបពីរឆ្នាំនៃការបាញ់សម្លាប់លោក ឈុត វុទ្ធី សកម្មជនការពារព្រៃឈើដ៍សកម្ម។ អ្នកឃ្លាំមើលសិទ្ធិមនុស្សប្រចាំខេត្តកោះកុង បានបញ្ជាក់ថា ពិធីបានប្រារព្ធធ្វើឡើង ដោយគ្មានការរារាំងពីអាជ្ញាធរនោះទេ។
ចុះផ្សាយនៅថ្ងៃ៖
ស្តាប់ - ០២:២៥
អ្នកចូលរួមទាំងអស់ បានចំណាយពេលជាង២ម៉ោង ដើម្បីធ្វើដំណើរចេញពីទីរួមខេត្តកោះកុង តាំងពីម៉ោង៨និង៣០នាទីព្រឹកថ្ងៃសៅរ៍នេះ ឆ្ពោះទៅកាន់ទីតាំងនៃការប្រារព្ធពិធីជាទីនៃការបាញ់សំលាប់លោក ឈុត វុទ្ធី សកម្មជនការពារព្រៃឈើ ដែលស្ថិតនៅចំណុចវាលបី ក្នុងស្រុកមណ្ឌលសីមា ខេត្តកោះកុង។
ការប្រារព្ធខួប២ឆ្នាំនៃការបាញ់សំលាប់លោក ឈុត វុទ្ធី សកម្មជនការពារព្រៃឈើរូបនេះ បានចាប់ផ្តើមឡើង នៅប្រមាណជាម៉ោង១១ព្រឹក ដោយអ្នកចូលរួមជាង១០០នាក់ បានដើរដង្ហែរក្បួនចំងាយ៣០០ម៉ែត្រ ឆ្ពោះទៅកាន់ទីតាំងនៃការបាញ់សំលាប់លោក ឈុត វុទ្ធី ដោយមានកាន់បដា អមដោយការស្រែកច្រៀងចំរៀងស្តីពីធនធានធម្មជាតិនៅក្នុងប្រទេសកម្ពុជាផងដែរ។ នេះបើតាមការបញ្ជាក់ពីលោក ឈឹម សាវុធ នាយកប្រតិបត្តិអង្គការការពារធនធានធម្មជាតិនៅថ្ងៃសៅរិ៍នេះ។
លោកបន្តថា សកម្មជនការពាព្រៃឈើ រួមទាំងព្រះសង្ឃដែលមកពីខេត្តចំនួន៦ រួមមានខេត្តកំពង់ធំ ព្រះវិហារ កោះកុង ស្ទឹងត្រែង និងខេត្តពោធិ៍សាត់ បានទៅជួបជុំគ្នានៅទីតាំងនៃការបាញ់សំលាប់លោក ឈុត វុទ្ធី ស្ថិតក្នុងស្រុកមណ្ឌលសីមា ខេត្តកោះកុង ដោយពិធីបានចាប់ផ្តើមបន្តដោយការសូត្រជីវប្រវត្តិរបស់លោក ឈុត វុទ្ធី និងបន្តមក ក៍មានការចេញសេចក្តីថ្លែងការណ៍រួមមួយដោយមានការចុះហត្ថលេខាពីគ្រប់អង្គការសង្គមស៊ីវិលផងដែរ ហើយចុងក្រោយ ក៍មានពិធីបង្សុកូល ឧទ្ទិសកុសលជូនដល់វិញ្ញាណក្ខន្ធសពលោកឈុត វុទ្ធី មុនពេលធ្វើសន្និសីទកាសែតបញ្ចប់កម្មវិធី។
លោក ឈុត វុទ្ធី ដែលជាប្រធានអង្គការការពារធនធានធម្មជាតិដ៏ល្បីល្បាញក្នុងប្រទេសកម្ពុជា ត្រូវបានគេបាញ់សម្លាប់កាលពីថ្ងៃទី២៦ មេសា ឆ្នាំ២០១២កន្លងទៅ នៅត្រង់ចំណុចវាលបី ក្នុងស្រុកមណ្ឌលសីមា ខេត្តកោះកុង នៅចន្លោះម៉ោង១០ទៅម៉ោង១២ថ្ងៃត្រង់ ខណៈដែលលោកបានចុះទៅស៊ើបអង្កេត និងថតយករូបភាពជុំវិញសកម្មភាពបទល្មើលព្រៃឈើ នៅតំបន់ព្រៃជួរភ្នំក្រវាញ។ ភ្លាមៗក្រោយមរណភាពនោះ រដ្ឋាភិបាលបានបង្កើតក្រុមគណៈកម្មការស៊ើបអង្កេតមួយ ហើយសាលាដំបូងខេត្តកោះកុងបានជម្រះក្តីសំណុំរឿងនេះ ជារឿងក្តីមនុស្សឃាតដោយអចេតនា។
ប៉ុន្តែយ៉ាងណាក៍ដោយ លោក អ៊ិន គង់ជិត អ្នកសម្របសម្រួលអង្គការលីកាដូប្រចាំខេត្តកោះកុង នៅតែសំដែងការសោកស្តាយចំពោះចំណាត់ការរបស់អាជ្ញាធររដ្ឋាភិបាលនៅក្នុងសំណុំរឿង។ លោកថា ជាការស៊ើបអង្កេត គ្រាន់តែដើម្បីបិទសំណុំរឿងនេះទៅវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ