ទីភ្នាក់ងារបារាំងដើម្បីអភិវឌ្ឍន៍ផ្តល់កំចី២៦លានដុល្លារអោយកម្ពុជាពង្រីកប្រព័ន្ធស្រោចស្រព
កសិករខ្មែរក្នុងខេត្តកំពង់ធំ សៀមរាប បន្ទាយមានជ័យ និងកណ្តាល គួរមានសង្ឃឹមខ្លះហើយ ដែលនៅពេលនេះ គម្រោងស្តារប្រព័ន្ធធារាសាស្ត្រ១១កន្លែង និងព្រែកនានា៣០កន្លែងទៀត មានប្រាក់សម្រាប់អនុវត្ត។នោះជាប្រាក់ឥណទានសម្បទាន ២០លានអឺរ៉ូ ឬប្រហែល២៦លានដុល្លារសហរដ្ឋអាមេរិក ដែលក្រសួងសេដ្ឋកិច្ចនិងហិរញ្ញវត្ថុបានទទួលពីទីភ្នាក់ងារបារាំងសម្រាប់ការអភិវឌ្ឍន៍។ កិច្ចព្រមព្រៀងខ្ចីប្រាក់ ដែលបានចុះហត្ថលេខានៅរសៀលថ្ងៃចន្ទនេះ ត្រូវគេរំពឹងថានឹងរួមចំណែកក្នុងការបង្កើនផលិតផលស្រូវ ដើម្បីសម្រេចផែនការនាំអង្ករចេញឱ្យបាន១លានតោន នៅឆ្នាំ២០១៥។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
ក្រសួងសេដ្ឋកិច្ចនិងហិរញ្ញវត្ថុកម្ពុជា នារសៀលថ្ងៃចន្ទនេះ បានចុះកិច្ចព្រមព្រៀងឥណទានសម្បទាន ដែលមានតម្លៃ២០លានអឺរ៉ូ ឬប្រមាណជា ២៦លានដុល្លារសហរដ្ឋអាមេរិក ជាមួយទីភ្នាក់ងារបារាំងសម្រាប់ការអភិវឌ្ឍន៍ និងជាមួយស្ថានទូតបារាំងនៅកម្ពុជា។ ប្រាក់ដែលរដ្ឋាភិបាលកម្ពុជាខ្ចីនេះ គឺសម្រាប់យកទៅប្រើលើគម្រោងអភិវឌ្ឍន៍វិស័យធារាសាស្ត្រនិងកសិកម្មកម្ពុជា និយាយឱ្យចំគឺដើម្បីស្តារប្រព័ន្ធធារាសាស្ត្រ១១កន្លែងនៅខេត្តកំពង់ធំ ខេត្តសៀមរាប និងខេត្តបន្ទាយមានជ័យ ព្រមទាំងស្តារព្រែក៣០កន្លែងទៀតនៅខេត្តកណ្តាល។ ជារួម ផ្ទៃដី១ម៉ឺន៦ពាន់ហិកតានឹងត្រូវស្រោចស្រពដោយសារឥណទានសម្បទានទីភ្នាក់ងារបារាំងសម្រាប់ការអភិវឌ្ឍន៍ ដែលផ្តល់ឱ្យរដ្ឋាភិបាលកម្ពុជាលើកដំបូង។
លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ បានថ្លែងថា ឥណទានសម្បទានរបស់ទីភ្នាក់ងារបារាំងនេះ រួមចំណែកជាពិសេសក្នុងការជម្រុញផលិតកម្មស្រូវរបស់កម្ពុជា។ កម្ពុជា ដែលមានផែនការនាំអង្ករចេញឱ្យបាន១លានតោននៅឆ្នាំ២០១៥។ ក្នុងរយៈពេល១០ខែនៃឆ្នាំ២០១៣នេះ កម្ពុជាបាននាំអង្ករចេញចំនួន ជិត៣សែនតោន ពោលគឺកើនឡើង១០១ភាគរយ បើប្រៀបធៀបទៅឆ្នាំមុន ក្នុងរយៈពេលដូចគ្នា។
លោក ស៊ែរ្ស ម៉ូស្ទូរ៉ា (Serge Mostura) ឯកអគ្គរដ្ឋទូតបារាំងប្រចាំនៅកម្ពុជា បានថ្លែងថា កសិកម្មកម្ពុជា ពឹងផ្អែកលើការផលិតស្រូវជាសំខាន់។ ដោយបានថ្លែងថា ប្រទេសបារាំងគាំទ្រការងារកសិកម្មនៅកម្ពុជា លោក ម៉ូស្ទូរ៉ា បានកត់សម្គាល់ថា មុនឆ្នាំ១៩៩៨ ប្រទេសកម្ពុជានាំអង្ករចូល ដោយសារតែផលិតកម្មក្នុងស្រុកមិនគ្រប់គ្រាន់ ប៉ុន្តែក្រោយឆ្នាំ១៩៩៨ ប្រទេសនេះបាននាំអង្ករចេញ ដោយសារការផលិតលើសតម្រូវការក្នុងស្រុក។ ប្រទេសបារាំងជាប្រទេសទី២នៅអឺរ៉ុប ដែលនាំអង្ករផ្កាម្លិះកម្ពុជាចូលច្រើនជាងគេ។
លោកស្រី នីណែល អ៊ុលឡាវ ម៉ូរ៉េរ៉ា (Ninel Ulloa Maureira) ដែលជាតំណាងទីភ្នាក់ងារបារាំងសម្រាប់ការអភិវឌ្ឍន៍ ថ្លែងថា ស្ថាប័នរបស់លោកស្រីមានមោទនភាពខ្លាំង ក្នុងការធ្វើឱ្យការគ្រប់គ្រងប្រព័ន្ធធារាស្ត្រនៅកម្ពុជា មាននិរន្តរភាព តាមរយៈការផ្ទេរកិច្ចការគ្រប់គ្រងទៅឱ្យសហគមន៍អ្នកប្រើប្រាស់ទឹក ដូចជាសហគមន៍ព្រៃនប់ជាដើម ដែលបានទទួលជំនួយពីទីភ្នាក់ងារបារាំងនេះ។ ទីភ្នាក់ងារបារាំងសម្រាប់ការអភិវឌ្ឍន៍បានផ្តល់ហិរញ្ញប្បទានប្រមាណជា២៧០លានអឺរ៉ូ ក្នុងការចូលរួមអភិវឌ្ឍសេដ្ឋកិច្ចនិងសង្គមកិច្ចកម្ពុជា តាំងពីឆ្នាំ១៩៩៣។ លោកស្រី ម៉ូរ៉េរ៉ាបានបន្ថែមថា ជំនួយរបស់ទីភ្នាក់ងារបារាំងថ្ងៃនេះជាយុទ្ធសាស្ត្រថ្មី ដែលកម្ពុជាអាចប្រើដើម្បីសម្រេចគោលបំណងនៃការនាំអង្ករចេញរបស់កម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ