ប្រតិកម្មធ្លាក់មកជាហូរហែក្រោយចាប់ខ្លួនលោក កឹម សុខា
ប្រតិកម្មរិះគន់បានធ្លាក់មកជាហូរហែទាំងក្នុង និងក្រៅប្រទេសក្រោយរដ្ឋាភិបាលចាប់ខ្លួនលោក កឹម សុខា ពីទោសក្បត់ជាតិ។ ប្រតិកម្មទាំងនោះបានបារម្ភពីដំណើរការប្រជាធិបតេយ្យនៅកម្ពុជា ហើយថែមទាំងមើលឃើញពីផលប៉ះពាល់ដល់ដំណើរការបោះឆ្នោតជាតិនាឆ្នាំក្រោយដែរ។
ចុះផ្សាយនៅថ្ងៃ៖
ស្តាប់ - ០២:៥៥
ការចាប់ខ្លួន លោក កឹម សុខា កំពុងធ្វើឲ្យស្ថានការណ៍វិវឌ្ឍន៍ទៅកម្រិតថ្មីមួយទៀតគួរឱ្យបារម្ភ។ នេះគឺជាខ្លឹមនៃសេចក្ដីថ្លែងការណ៍របស់សភាអាស៊ានឃ្លាំមើលសិទ្ធិមនុស្ស នៅព្រឹកថ្ងៃអាទិត្យនេះ ។ សភាអាស៊ាន បន្តទៀតថា ខណៈការបោះឆ្នោតកំពុងខិតជិតមកដល់ ការចាប់ខ្លួនលោក កឹម សុខា នៅពេលនេះ បានបង្ហាញកាន់តែច្បាស់ពីចេទនាបំផ្លាញគណបក្សប្រឆាំងពីសំណាក់គណបក្សកាន់អំណាច។
សភាអាស៊ានឃ្លាំមើលសិទ្ធិមនុស្សកត់សម្គាល់ថា អស់រយៈពេលជាច្រើនខែមកហើយ ដែលការប៉ុនប៉ងរបស់រដ្ឋាភិបាល ក្នុងការបំភិតបំភ័យគណបក្សប្រឆាំង ចេះតែកើនឡើង ។ ហើយនៅពេលនេះ វាហាក់ដូចជា លោកនាយករដ្ឋមន្រ្តីហ៊ុនសែន ភ័យខ្លាចការបោះឆ្នោត ហើយមិនចង់ឲ្យមានការប្រកួតប្រជែង។ សភាអាស៊ានឃ្លាំមើលសិទ្ធិមនុស្សដដែលបានអំពាវនាវឲ្យមានការដោះលែងលោក កឹម សុខា ជាបន្ទាន់ ដោយគ្មានលក្ខខណ្ឌ។
ចំណែក អង្គការឃ្លាំមើលសិទ្ធិមនុស្ស Human Right Watch បានចេញសេចក្តីថ្លែងការណ៍មួយដោយចាត់ទុកថា ស្ថានភាពសិទ្ធិមនុស្សនៅកម្ពុជា កំពុងតែដើរថយក្រោយ។ តាមរយៈការចាប់ខ្លួនលោក កឹម សុខា នាពេលនេះ Human Right Watch ក៏បានអំពាវនាវឲ្យ ម្ចាស់ជំនួយបរទេស បើកកិច្ចប្រជុំជាមួយនឹងបណ្តាស្ថានទូតកម្ពុជាប្រចាំនៅប្រទេសជាម្ចាស់ជំនួយ ដើម្បីពិភាក្សាពីបញ្ហានេះ។
ងាកមកមើលប្រតិកម្មនៅក្នុងស្រុកវិញ លោក មឿន តុលា នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថា សង់ត្រាល់ (Central)មើលឃើញថា ការចាប់ខ្លួនលោក កឹម សុខា ធ្វើឡើងខុសនីតិវិធី។ ខុសនីតិវិធីនីត្រង់ថា ការចាប់ខ្លួននេះធ្វើឡើងនៅម៉ោង១២យប់ដែលផ្ទុយពីគោលការណ៍ព្រហ្មទណ្ឌដែលមិនអនុញ្ញាតឲ្យសមត្ថកិច្ចចូលទៅចាប់ខ្លួនដល់ក្នុងផ្ទះទាំងកណ្ដាលយប់បែបនេះទេ។ ធ្ងន់ធ្ងរយ៉ាងក៏ដោយសមត្ថកិច្ចគួរតែឡោមព័ទ្ធផ្ទះសិន ដើម្បីចាប់ខ្លួននៅម៉ោង៦ព្រឹកវិញ។ នេះបើតាមលោក មឿន តុលា។
លោក មឿន តុលា យល់ថា ស្ថានភាពនយោបាយនៅកម្ពុជាកំពុងដើរថយក្រោយបន្ទាប់ពីការចាប់ខ្លួនមេដឹកនាំគណបក្សប្រឆាំងដែលជាដៃគូរប្រកួតប្រជែងដ៏សំខាន់របស់គណបក្សកាន់អំណាច។ លោកបន្ថែមវា មិនមែនជាសញ្ញាល្អប៉ុន្មានទេ ដែលផ្សារភ្ជាប់រឿងនេះជាមួយអាមេរិកនោះព្រោះអាមេរិកគឺជាទីផ្សារនៃការនាំចេញដ៏សំខាន់របស់កម្ពុជា។
ចំណែក លោក សៀ ភារម្យ ប្រធានអង្គការសិទ្ធិលំនៅដ្ឋានមើលឃើញថា ចំណាត់ការរបស់រដ្ឋាភិបាលចំពោះលោក កឹម សុខា ធ្វើឡើងរាងចាស់ដៃបន្តិច ព្រោះបើលោក កឹម សុខា មានទោសក្បត់ជាតិមែន ហេតុអ្វីពីមុនមករដ្ឋសភាទទួលស្គាល់គាត់ជាសមាជិកសភាទៅវិញ។ លោកបន្ថែមថា ខ្លឹមសារលោក កឹម សុខា និយាយក្នុងវីដេអូពាក់ព័ន្ធនឹងសហរដ្ឋអាមេរិក គួរតែមានការសិក្សាឲ្យបានច្បាស់លាស់សិន។ បើពុំដូច្នោះទេ កម្ពុជានឹងទទួលរងការរិះគន់ជាបន្តបន្ទាប់ពីសហគមន៍អន្តរជាតិ។ នេះបើតាមលោក សៀ ភារម្យ។
លោក សូរ ចន្ថា អ្នកតាមដានបញ្ហាសង្គម និងនយោបាយក៏យល់ឃើញដូចគ្នាដែរថាគួរតែមានការស៊ើបអង្កេតឲ្យបានច្បាស់លាស់សិនមុនពេលចោទលោក កឹម សុខា ពី បទក្បត់ជាតិ ព្រោះពាក្យក្បត់ជាតិនេះមានលក្ខណៈធ្ងន់ធ្ងរ។សម្រាប់ លោក សូរ ចន្ថា រឿងនេះជារឿងយោបាយច្រើនជាងវិធានការអនុវត្តច្បាប់។ លោកបន្ថែមថា នៅពេលដែលមេបក្សប្រឆាំងត្រូវបានចាប់ខ្លួនយ៉ាងដូច្នេះ ច្បាស់ណាស់វានឹងប៉ះពាល់ដល់ការបោះឆ្នោតជាតិឆ្នាំក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ