ចំណុចសំខាន់ៗដែលមិនត្រូវគ្នាក្នុងការរៀបចំសេចក្តីស្នើច្បាប់ស្តីពី គជប ត្រូវបានពិភាក្សា
មតិផ្សេងគ្នាក្នុងចំណុចសំខាន់ៗ មួយចំនួនដែលគណៈកម្មការចម្រុះរបស់គណបក្សប្រជាជនជនកម្ពុជា និងគណបក្សសង្គ្រោះជាតិចរចាមិនត្រូវគ្នាក្នុងការរៀបចំសេចក្តីស្នើច្បាប់ ស្តីពី គជប ត្រូវបានពិភាក្សា។ មតិផ្សេងគ្នាទាំង ១៥ ចំណុចនោះ រួមមាន ការតែងតាំងថ្នាក់ដឹកនាំគជប អំណាច ភារកិច្ច ការទទួលខុសត្រូវ និងរបៀបរបបការងាររបស់គជប ជាដើម។ កិច្ចពិភាក្សា ដែលរៀបចំដោយអង្គការសង្គមស៊ីវិល និងមានការចូលរួមពីតំណាងគណបក្សនយោបាយ ព្រមទាំងអ្នកវិភាគសង្គម នៅថ្ងៃព្រហស្បតិ៍នេះ បានធ្វើឡើង ខណៈដែលក្រុមការងារចរចារបស់គណបក្សទាំងពីរ បានព្រាងចប់លើសេចក្តីស្នើច្បាប់ស្តីពី គជប ដែលមាន ៧ជំពូក និង ៦៦ មាត្រា តែនៅមានចំណុចមិនទាន់ស្រុះស្រួលគ្នាចំនួន ១០ មាត្រា។
ចុះផ្សាយនៅថ្ងៃ៖
ស្តាប់ - ០២:២៦
មតិផ្សេងគ្នារបស់ក្រុមការងារចម្រុះគណបក្សទាំងពីរ ក្នុងការរៀបចំសេចក្តីស្នើច្បាប់ ស្តីពី ការរៀបចំ និងការប្រព្រឹត្តទៅ នៃគណៈកម្មាធិការជាតិរៀបចំការបោះឆ្នោត គជប ត្រូវបានសង្គមស៊ីវិល លើកបង្ហាញក្នុងវេទិកាពិភាក្សា នៅព្រឹកថ្ងៃព្រហស្បតិ៍ ទី៣០តុលានេះ។
ចំណុចសំខាន់ៗ ទាំង ១៥ ចំណុចនោះ រួមមាន៖ ការតែងតាំងថ្នាក់ដឹកនាំគជប ត្រូវបានមតិទី១ ថា ប្រធាន ឬអនុប្រធានគជប ត្រូវជ្រើសរើសក្នុងចំណោមគណបក្ស ដែលមានអាសនៈនៅរដ្ឋសភា តែមតិទី២ថា គជបជាអ្នកសម្រេចខ្លួនឯង ដោយមតិភាគច្រើនដាច់ខាតនៃសមាជិកគជបទាំង៩រូប រីឯមតិផ្សេងទៀតថា សមាជិកគជបទី៩ ត្រូវជាប្រធានគជប។
ចំណែកអំណាច ភារកិច្ច ការទទួលខុសត្រូវ និងរបៀបរបបការងាររបស់គជប គឺមានមតិ១ លើកឡើងថា គជបផ្តល់អំណាចដល់គជបថ្នាក់ខេត្តរាជធានី ក្នុងការដកមន្ត្រីបម្រើការនៅក្រោមឱវាទរបស់ខ្លួន តែមតិគណបក្សមួយទៀតថា គជប ជាអ្នកសម្រេចក្នុងការដកមន្ត្រីបម្រើការបោះឆ្នោតនោះជាដើម។
តំណាងសង្គមស៊ីវិលដែលចូលរួមពិភាក្សា លោកហង្ស ពុទ្ធា ចង់ឲ្យគជប ដែលក្រុមការងារគណបក្សប្រជាជនកម្ពុជា និងគណបក្សសង្គ្រោះជាតិ កំពុងចរចា ត្រូវជាស្ថាប័នអព្យាក្រឹត។ សង្គមស៊ីវិល ក៏ស្នើឲ្យគណបក្សទាំងពីរ បើកចំហរ និងពិគ្រោះយោបល់លើពង្រាងច្បាប់គជបនោះផងដែរ។ រីឯលោកសុខ ទូច ស្នើដល់គណបក្សទាំងពីរ រៀបចំយន្តការ និងប្រព័ន្ធក្នុងការជ្រើសរើសសមាជិកគជបថ្មី ខណៈដែលសមាជិកគជបថ្មីទាំង ៩ រូប ត្រូវបានលោកសុខ ទូច មើលឃើញថា មិនឯករាជ្យរួចទៅហើយ ព្រោះជ្រើសចេញពីគណបក្សប្រជាជនកម្ពុជា និងគណបក្សសង្គ្រោះជាតិ។
ក្នុងកិច្ចពិភាក្សា លោក គួយ ប៊ុនរឿន សហប្រធានក្រុមការងាររៀបចំច្បាប់ គជប មកពីគណបក្សសង្គ្រោះជាតិ បានលើកឡើងថា ក្រុមការងារចម្រុះគណបក្សទាំងពីរ បានព្រាងចប់ហើយ លើសេចក្តីស្នើច្បាប់គជប ដែលមាន ៧ ជំពូក និង ៦៦ មាត្រា។ ប៉ុន្តែមកដល់ពេលនេះ មិនទាន់ស្រុះស្រួលគ្នា ចំនួន ១០ មាត្រា ពាក់ព័ន្ធនឹងសមាសភាពក្នុងការតែងតាំងប្រធានអនុប្រធាន គជប លក្ខណៈសម្បត្តិបេក្ខជនសមាជិកគជប ភារកិច្ច និងការទទួលខុសត្រូវរបស់គជប ជាដើម។
លោក គួយ ប៊ុនរឿន បញ្ជាក់ថា ក្រុមការងារចម្រុះគណបក្សទាំងពីរ នឹងបន្តជួបគ្នាទៀត នៅថ្ងៃទី១០វិច្ឆិកា ដើម្បីជជែកលើចំណុចមិនទាន់ស្រុះស្រួលគ្នាទាំង ១០ មាត្រា នោះ មុននឹងរុញទៅថ្នាក់ដឹកនាំកំពូល សម្រេច។
តំណាងគណបក្សប្រជាជនកម្ពុជា ដែលជាដៃគូចរចា មិនបានបញ្ជូនតំណាងចូលរួមកិច្ចពិភាក្សានោះទេ។ តែមានតំណាងពីគណបក្សមិនជាប់ឆ្នោត ដូចជា គណបក្សហ្វ៊ុនស៊ិនប៉ិច គណបក្សសម្ព័ន្ធដើម្បីប្រជាធិបតេយ្យ គណបក្សខ្មែរឈប់ក្រ គណបក្សសាធារណៈរដ្ឋប្រជាធិបតេយ្យ និងគណបក្សសង្គមរាស្ត្ររាជាធិបតេយ្យ ជាដើម។ តំណាងគណបក្សមិនជាប់ឆ្នោត បានជំរុញឲ្យគណបក្សប្រជាជនកម្ពុជា និងគណបក្សសង្គ្រោះជាតិ រៀបចំច្បាប់គជប ដើម្បីធ្វើឲ្យគជប ជាស្ថាប័នជាតិ អព្យាក្រឹត្យ ឯករាជ្យ ឈានទៅរៀបចំការបោះឆ្នោត ដោយយុត្តិធម៌ និងត្រឹមត្រូវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ