តំណាងអ្នកដឹកនាំកសិករជួបប្រជុំគ្នានៅភ្នំពេញរយៈពេលពីរថ្ងៃ រៀបចំផែនការក្លាយជាសេដ្ឋីស្រុកស្រែ
តំណាងអ្នកដឹកនាំកសិករថ្នាក់ស្រុកចំនួន៦០នាក់ មកពី១៦ខេត្ត ក្នុងប្រទេសកម្ពុជា បានមកជួបប្រជុំគ្នារយៈពេល២ថ្ងៃនៅទីក្រុងភ្នំពេញ ដើម្បីរៀបចំផែនការធ្វើឲ្យក្លាយជាសេដ្ឋីស្រុកស្រែ។ កិច្ចប្រជុំដែលបានធ្វើឡើងចាប់ពីថ្ងៃទី២តុលានេះ និងបញ្ចប់នៅថ្ងៃទី៣តុលាស្អែក ដើម្បីរៀបចំផែនការជាក់លាក់ដែលគេហៅថា សហគមន៍ដែលមានការអភិវឌ្ឍន៍អាស្រ័យដោយខ្លួនឯង ហៅកាត់ថា (ស២២) ។
ចុះផ្សាយនៅថ្ងៃ៖
ស្តាប់ - ០១:២៩
កិច្ចប្រជុំដែលដឹកនាំដោយមជ្ឈមណ្ឌលសិក្សានិងអភិវឌ្ឍន៍កសិកម្មកម្ពុជាហៅកាត់ថា សេដាក(CEDAC)នេះ ធ្វើឡើង ដើម្បីឲ្យអ្នកដឹកនាំកសិករថ្នាក់ស្រុកទាំង៦០ មកពី១៦ខេត្តនេះ រៀបចំផែនការជាក់លាក់សម្រាប់គម្រោងក្លាយជាសេដ្ឋីស្រុកស្រែ ដែលគេហៅថា សហគមន៍ដែលមានការអភិវឌ្ឍន៍អាស្រ័យដោយខ្លួនឯង ហៅកាត់ថា (ស២២)។ ជាផែនការជំហានទី២របស់អង្គការសេដាក ក្រោយពីបញ្ចប់គម្រោងជំហានទី១ ក្នុងការបង្រៀន និងផ្តល់បច្ចេកទេសកសិកម្មដល់កសិករ ចាប់តាំងពីឆ្នាំ១៩៩៧មកនោះ។
លោក យ៉ង សាំងកុមារ ប្រធានមជ្ឈមណ្ឌលសិក្សានិងអភិវឌ្ឍន៍កសិកម្មកម្ពុជា បានលើកឡើងថា សេដាក និងសហគមន៍កសិករបានកំណត់នូវផែនការនេះ រហូតដល់ឆ្នាំ២០២២ ពោលគឺធ្វើយ៉ាងណាឲ្យកសិករខ្មែរដែលស្ថិតនៅក្រោមការគាំទ្ររបស់សេដាក ក្លាយជាសេដ្ឋីស្រុកស្រែ ។ សេដ្ឋីស្រុកស្រែ បើតាមការពន្យល់របស់លោក យ៉ង សាំងកុមារ គឺសំដៅទៅលើកសិករដែលអាចកំណត់ជោគវាសនាបានដោយខ្លួនឯង និងមានជីវភាពធូធារ មានសុខភាពល្អ មានចំណេះដឹង និងមិត្តភាពល្អ។
សូមបញ្ជាក់ថា នៅក្នុងជំហានទី១ ចាប់តាំងពីឆ្នាំ១៩៩៧មក ទល់នឹងពេលបច្ចុប្បន្ននេះ សេដាកបានជួយគាំទ្រផ្នែកបច្ចេកទេសកសិកម្មដល់កសិករខ្មែរបានចំនួនជាង១សែនគ្រួសារ។ ហើយនៅក្នុងជំហានទី២នេះ សេដាកនឹងជ្រើសរើសកសិករយ៉ាងតិច២ម៉ឺនគ្រួសារ រឺអោយបាន១សែនគ្រួសារ ដើម្បីទទួលយកគម្រោងក្លាយជាសេដ្ឋីស្រុកស្រែនេះ។ ហើយបើតាមលោក យ៉ង សាំងកុមារដដែល គិតត្រឹមឆ្នាំ២០១៤នេះ កសិករជាង២ពាន់នាក់ នឹងដាក់ពាក្យចូលរួមនៅក្នុងគម្រោងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ